ໃນວັນທີ 28 ສິງຫາ 2017 ນີ້ ທີ່ນະຄອນຫລວງວຽງຈັນ, ຄອບຄົວ ທ່ານ ອຸ່ນເນື້ອ ພິມມະສອນ ຮ່ວມມືກັບ ສານປະຊາຊົນສູງສຸດ ແລະ ກະຊວງຍຸຕິທໍາ ໄດ້ເປີດຫ້ອງມູນເຊື້ອ ທັງເປັນຫ້ອງສະໜຸດຂອງທ່ານ ອຸ່ນເນື້ອ ພິມມະສອນ ແລະ ໄດ້ຂຽນປະຫວັດການເຄື່ີອນໄຫວຂອງເພີ່ນ ໄວ້ໃຫ້ລູກຫລານ ຄົນລຸ້ນໜຸ່ມໄດ້ສຶກສາຄົ້ນຄ້ວາ ແລະ ເປັນແບບຢ່າງ ໃນການຝືກຝົນຫລໍ່ຫລອມ ມູນເຊື້ອຄຸນສົມບັດອັນດີງາມ ຂອງອະດີດປະທານສານປະຊາຊົນສູງສຸດ ຄົນທໍາອິດ ຂອງ ສປປ ລາວ.
ທ່ານ ຄໍາພັນ ສິດທິດໍາພາ ປະທານສານປະຊາຊົນສູງສຸດ ກ່າວວ່າ: ທ່ານ ອຸ່ນເນື້ອ ພິມມະສອນ ໄດ້ອຸທິດເຫື່ອແຮງ ສະຕິປັນຍາຄວາມສາມາດ ເຂົ້າໃນການພັດທະນາລະບົບສານປະຊາຊົນ ເຖິງແມ່ນວ່າເພີ່ນຈະໄປຮັບຜິດຊອບວຽກງານ ຢູ່ໃນຂົງເຂດອື່ນກໍຕາມ, ແຕ່ເພີ່ນກໍມີຄວາມຮັບຮູ້ ແລະ ເຂົ້າໃຈດີ ກ່ຽວກັບວຽກງານຂອງສານປະຊາຊົນ ໂດຍມີຄວາມເອົາໃຈໃສ່, ມີຄວາມເປັນຫ່ວງເປັນໄຍ ຕໍ່ການເຄື່ອນໄຫວວຽກງານ ຂອງສານປະຊາຊົນຕະຫລອດມາ.
ການເປີດຫ້ອງມູນເຊື້ອດັ່ງກ່າວ ໃນຄັ້ງນີ້, ກໍເພື່ອອຸທິດໃຫ້ແກ່ວັນຄ້າຍວັນເກີດຂອງ ທ່ານ ອຸ່ນເນື້ອ ພິມມະສອນ ຄົບຮອບ 100 ປີ, ທັງແມ່ນຢູ່ໃນບັນຍາກາດ ແຫ່ງການສະເຫລີມສະຫລອງວັນສ້າງຕັ້ງສານປະຊາຊົນສູງສຸດ ຄົບຮອບ 35 ປີ, ທີ່ມີຄວາມໜາຍສໍາຄັນສູງສຸດ ໃຫ້ແກ່ຄອບຄົວ, ລູກຫລານ, ຍາດພີ່ນ້ອງ ຂອງທ່ານ ອຸ່ນເນື້ອ ພິມມະສອນ ແລະ ກໍມີຄວາມໜາຍສໍາຄັນປະຫວັດສາດ ໃຫ້ແກ່ອົງການສານປະຊາຊົນ ໄດ້ມີບ່ອນສຶກສາຄົ້ນຄ້ວາຮໍ່າຮຽນເອົາຄຸນສົມບັດ ແບບແຜນການດໍາລົງຊີວິດ, ການເຄື່ອນໄຫວວຽກງານຂອງທ່ານ ແລະ ຂໍຮັບຈົດຈໍາທຸກຄໍາສັ່ງສອນ, ຜົນງານ, ຄຸນງາມຄວາມດີຂອງທ່ານ ໃຫ້ໜັ້ນຄົງ ຍືນຍົງຕະຫລອດໄປ.
Editor: ຕະວັນ ແສງສະຫວັນ
