ໃນຕອນວັນທີ 1 ກັນຍາ 2017 ທີ່ຜ່ານມາ, ທີ່ຫ້ອງປະຊຸມໃຫຍ່ຂອງແຂວງ ໄດ້ຈັດກອງປະຊຸມສະຫຼຸບບັ້ນດຳເນີນຊີວິດການເມືອງ ປັບປຸງປົວແປງທົ່ວອົງຄະນະພັກແຂວງ ປະຈໍາປີ 2017 ຂື້ນໂດຍພາຍໃຕ້ການເປັນປະທານຂອງ ທ່ານ ວິດົງ ໄຊຍະສອນ ກຳມະການສູນກາງພັກ ເລຂາພັກແຂວງ ເຈົ້າແຂວງໆວຽງຈັນ ເປັນກຽດເຂົ້າຮ່ວມຂອງ ທ່ານ ຈັນສີ ໂພສີຄຳ ກຳມະການ ກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ຄະນະຮັບຜິດຊອບດໍາເນີນຊີວິດການເມືອງປັບປຸງປົວແປງພັກຂັ້ນສູນກາງ, ມີບັນດາຄະນະພັກຂັ້ນແຂວງ, ເມືອງ, ພະແນກການ, ອົງການ, ກົມກອງ.
ຜ່ານການດຳເນີນຊີວິດການເມືອງປັບປຸງປົວແປງ ໃນທົ່ວອົງຄະນະພັກແຂວງວຽງຈັນ ຄັ້ງນີ້ ໄດ້ເປັນການກະຕຸ້ນແນວຄິດຂອງບັນດາຄະນະນຳ, ສະມາຊິກພັກ ໃຫ້ມີການປ່ຽນແປງໃໝ່ ຮູ້ໄດ້ຈຸດດີຈຸດອ່ອນຂອງຕົນເອງ ແລະ ໄດ້ໃຊ້ສິດປະຊາທິປະໄຕ ໃນການລົງຄຳເຫັນໄວ້ວາງໃຈຕໍ່ອົງຄະນະພັກໃນແຕ່ລະຂັ້ນ ແລະ ສະມາຊິກພັກນໍາກັນ. ໂດຍການເລີ່ມຈາກການເຜີຍແຜ່ເຊື່ອມຊຶມສອງເອກະສານຕົ້ນຕໍ ພ້ອມກັນນັ້ນ ແຕ່ລະສະຫາຍໄດ້ຜ່ານບົດສຳຫຼວດຕົນເອງດ້ວຍການຕີລາຄາຄວາມຮັບຜິດຊອບການເມືອງຕາມເນື້ອໃນເອກະສານທີ່ໄດ້ເຊື່ອມຊຶມໂດຍສະເພາະແມ່ນ 6 ເນື້ອໃນຂອງຄຸນທາດການເມືອງ, 7 ເນື້ິອໃນຂອງຄຸນສົມບັດ-ສິນທຳປະຕິວັດ, 4 ເນື້ອໃນຂອງແບບແຜນວິທີນໍາພາ ແລະ ເຮັດວຽກ, ແບບແຜນດໍາເນີນຊີວິດຂອງຄະນະພັກ.
ໃນບັ້ນດຳເນີນຊີວິດການເມືອງປັບປຸງປົວແປງພັກຄັ້ງນີ້ ສາມາດຕີລາຄາຈັດແບ່ງປະເພດ ແລະ ທາບທາມຄະແນນສຽງຄວາມເຊື່ອໝັ້ນໄວ້ວາງໃຈຂອງຄະນະພັກ, ຄະນະນໍາຂັ້ນແຂວງ ຈຳນວນ 50 ທ່ານ, ມີປະເພດແຂງ 40 ທ່ານ, ປະເພດກາງ 10 ທ່ານ, ຄະນະບໍລິຫານງານພັກເມືອງ ຈຳນວນ 345 ທ່ານ, ຍິງ 41 ທ່ານ, ມີປະເພດແຂງ 288 ທ່ານ ; ປະເພດກາງ 57 ທ່ານ ; ອ່ອນ 0, ຄະນະພັກພັກແນກການອົງການ ຈໍານວນ 173 ທ່ານ, ຍິງ 24 ທ່ານ, ມິີປະເພດແຂງ 164 ທ່ານ, ກາງ 8 ທ່ານ, ອ່ອນ 1 ທ່ານ, ຄະນະພັກກອງບັນຊາການ ປກຊ, ປກສ 1.232 ທ່ານ, ຍິງ 239 ທ່ານ, ມີປະເພດແຂງ 991 ທ່ານ, ກາງ 238, ອ່ອນ 2 ທ່ານ, ເສຍທາດ 1 ທາດ, ສະມາຊິກພັກເປັນລັດຖະກອນທົ່ວໄປຂັ້ນແຂວງ ແລະ ເມືອງຈໍານວນ 6.961 ທ່ານ, ຍິງ 2.375 ທ່ານ, ມີປະເພດແຂງ 6164 ທ່ານ, ກາງ 785 ທ່ານ, ອ່ອນ 123 ທ່ານ, ສະມາຊິທົ່ວໄປເປັນປະຊາຊົນຈໍານວນ 7317 ທ່ານ, ຍິງ 1780 ທ່ານ, ມີປະເພດແຂງ 6098 ທ່ານ, ກາງ 1.199 ທ່ານ, ອ່ອນ 20 ທ່ານ ແລະ ຈໍານວນທີ່ບໍ່ໄດ້ຈັດປະເພດ 679 ທ່ານ, ໃນນີ້ມີສະມາຊິກສຳຮອງໄປຮຽນຕໍ່, ຝຶກອົບຮົມ, ພັກເກີດລູກ, ເຈັບເປັນນອນໂຮງໝໍ ແລະ ອື່ນໆ.
ໃນຕອນທ້າຍ ທ່ານ ຈັນສີ ໂພສີຄຳ ກຳມະການກົມການເມືອງສູນກາງພັກ ເລຂາທິການ ສູນກາງພັກ, ຫົວໜ້າຄະນະຈັດຕັ້ງສູນກາງພັກໄດ້ຍ້ອງຍໍຊົມເຊີຍຜົນສຳເລັດກອງປະຊຸມບັ້ນດຳເນີນຊີວິດການເມືອງປັບປຸງປົວແປງພັກຄັ້ງນີ້ ທ່ານຍັງໄດ້ເນັ້ນໜັກໃຫ້ບັນດາ ຄະນະພັກ, ຄະນະນຳ, ສະມາຊິກພັກ ທົ່ວແຂວງວຽງຈັນ ຈົ່ງຮັກສາ ແລະ ເສີມຂະຫຍາຍຜົນງານດັ່ງກ່າວໃຫ້ດີກວ່າເກົ່າ ຄຽງຄູ່ກັນນັ້ນ ການຕັດສິນໃຈປັບປຸງ ແລະ ແກ້ໄຂບັນດາຈຸດອ່ອນ ແລະ ຂໍ້ຄົງຄ້າງເທື່ອລະກ້າວ. ພ້ອມດຽວກັນນີ້ ກໍຍັງຮຽກຮ້ອງມາຍັງບັນດາສະຫາຍໃນຄະນະພັກ ຈົ່ງປຸ້ມລຸມສາມັກຄີ, ເປັນຈິດໜື່ງໃຈດຽວ ພ້ອມກັນຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ 10 ຂອງພັກ, ມະຕິ 5 ຂອງອົງຄະນະພັກແຂວງວຽງຈັນ ໃຫ້ປະກົດຜົນເປັນຈິງ.
Editor: ກຳປານາດ ລັດຖະເຮົ້າ
