ທ່ານ ພັນຄໍາ ວິພາວັນ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດແຫ່ງ ສ ປ ປ ລາວ, ພ້ອມຄະນະ ໄດ້ຢຽມຢາມ ແລະ ເຮັດວຽກຢູ່ເມືອງວຽງທອງ, ແຂວງບໍລິຄຳໄຊ ໂດຍການຕ້ອນຮັບຂອງ ທ່ານ ປະລິນຍາເອກ ກອງແກ້ວ ໄຊສົງຄາມ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງບໍລິຄຳໄຊ ພ້ອມຄະນະ ຈາກນັ້ນທ່ານກໍ່ໄດ້ໃຫ້ກຽດໂອ້ລົມ ແລະ ໃຫ້ທິດຊີີ້ນໍາວຽກງານ ປ້ອງກັນຊາດ ປ້ອງກັນຄວາມສະຫງົບ ຢູ່ທີ່ຫ້ອງປະຊຸມສຳນັກງານຫ້ອງວ່າການປົກຄອງເມືອງວຽງທອງ ໂດຍມີພະນັກງານກຳນໍາຫຼັກແຫຼ່ງຂອງແຂວງ ຂອງເມືອງເຂົ້າຮ່ວມ
ໂອກາດນີ້ ທ່ານ ກອງແກ້ວ ໄຊສົງຄາມ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງບໍລິຄຳໄຊ ໄດ້ລາຍງານຫຍໍ້ກຽ່ວກັບສະພາບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມຂອງແຂວງບໍລິຄຳໄຊ ໃຫ້ທານຮອງປະທານປະເທດໄດ້ຮັບຊາບ ໂດຍລວມແລ້ວແຂວງຍັງສືບຕໍ່ມີສະຖຽນລະພາບທາງດ້ານການເມືອງຢ່າງໜັ້ກແໜ້ນ ສັງຄົມມີຄວາມເປັນລະບຽບຮຽບຮ້ອຍດີໂດຍພື້ນຖານ ເສດຖະກິດສືບຕໍ່ມີການຂະຫຍາຍຕົວຢ່າງຕໍ່ເນື່ອງ ແລະ ຄວາມທຸກຫຍາກນັບມືຖືກຕີຖອຍເປັນກ້າວ ລວມຍອດມູນຄ່າເພີ່ມຜະລິດຕະພັນພາຍໃນ GDP ຂອງແຂວງມີມູນຄ່າ 4 ພັນ 474 ຕື້ກວ່າກີບ, ດ້ວຍອັດຕາການຂະຫຍາຍຕົວ 8% ໃນນັ້ນຂົງເຂດກະສິກຳ ແລະ ປ່າໄມ້ຂະຫຍາຍຕົວໃນລະດັບ 3,5% ກວມເອົາ 40,2% ຂອງ GDP ຂົງເຂດ ອຸດສະຫະກຳ ແລະ ການກໍ່ສ້າງ ຂະຫຍາຍຕົວໃນລະດັບ 11,02 % ກວມເອົາ 31,4%ຂອງ GDP ຂົງເຂດບໍລິການຂະຫຍາຍຕົວໃນລະດັບ 8,93% ກວມເອົາ 28,4%ຂອງ GDP ຕອນທ້າຍທ່ານຍັງໄດ້ເໜັ້ນໃຫ້ ອົງຄະນະພັກແຂວງ ຄະນະພັກເມືອງຕະຫຼອດຮອດອຳນາດການປົກຄອງທຸກພາກສ່ວນ ຈົ່ງໄດ້ເພີ່ມທະວີເອົາໃຈໃສ່ ວຽກງານປ້ອງກັນຊາດ ປ້ອງກັນຄວາມສະຫງົບ ເຮັດໃຫ້ທົ່ວປວງຊົນມີຄວາມສະຫງົບໂດຍພື້ນຖານ ເອົາໃຈໃສ່ຄຸ່ມຄອງສຳມະນາຄົວ ຕິດຕາມການເຄື່ອນຍ້າຍເຂົ້າອອກຂອງພົນລະເມືອງພາຍໃນແຂວງຕາງແຂວງ ແລະ ຕ່າງປະເທດ ທີ່ບໍ່ຖືກຕ້ອງຕາມລະບຽບການ ແກ້ໄຂບັນຫາຕັ້ງສະນໍາ ແລະ ປະກົດການຫຍໍ້ທໍ່ທາງສັງຄົມ ເປັນຕົ້ນບັນຫາຢາເສບຕິດ ແລະ ອື່ນໆ ເພື່ອແນໃສເຮັດໃຫ້ແຂວງ ມີສະຖຽນລະພາບທາງດ້ານການເມືອງຢ່າງໜັ້ກແໜ້ນ ແລະ ສັງຄົມມີຄວາມເປັນລະບຽບຮຽບຮ້ອຍ ຈາກນັ້ນທ່ານ ແລະ ຄະນະໄດ້ໄປພົບປະພໍ່ແມ່ປະຊາຊົນບ້ານວັງຫີນ, ເມືອງວຽງທອງ ໂດຍການຕ້ອນຮັບ ແລະ ລາຍງານສະພາບການຈັດຕັ້ງບ້ານ ຈາກ ທ່ານ ໄມສອນ ພົມມີໄຊ ນາຍບ້ານວັງຫີນ ວ່າ ທົ່ວບ້ານມີພົນລະເມືອງທັງໝົດ 1.475 ຄົນ, ຍິງ733 ຄົນ ມີ 204 ຫຼັງຄາເຮືອນ ມີ 304 ຄອບຄົວ ມີ 3 ເຜົ່າຄື: ເຜົ່າລາວລຸ່ມ ເຜົ່າເມີ່ຍ ແລະ ເຜົ່າມົ້ງ ໂອກາດນີ້, ທ່ານຮອງປະທານປະເທດ ໄດ້ໂອ້ລົມ ແລະ ຮຽກຮ້ອງໃຫ້ພໍ່ແມ່ປະຊາຊົນບ້ານວັງຫິນ ຈົ່ງໄດ້ມີຄວາມສາມັກຄີຊອ່ຍເຫຼືຶອເຊີ່ງກັນ ແລະ ກັນ ພ້ອມກັນທຳມາຫາກິນດ້ວຍຄວາມຊື່ສັດບໍລິສຸດ ຖືກຕອ້ງຕາມລະບຽບແບບກົດໝາຍ ພ້ອມກັນທຳການຜະລິດໃຫ້ຫຼາຍກາຍເປັນສິນຄ້າ ເພື່ອຫາລາຍຮັບເຂົ້າຄອບຄົວໃຫ້ນັບມືນັບດີຂຶ້ນ
ທີມຂ່າວ ແຂວງບໍລິຄຳໄຊ
Editor: ກຳປານາດ ລັດຖະເຮົ້າ
