ກອງປະຊຸມໃຫຍ່ຂອງສະຫະພັນແມ່ຍິງຮາກຖານ ປກສ ຄັ້ງທີ 3 ໄດ້ໄຂຂື້ນຢ່າງເປັນທາງການ ເມື່ອບໍ່ດົນມານີ້, ທີ່ສະໂມສອນກອງບັນຊາການ ປກສ ເມືອງເຊໂປນ, ໂດຍການເປັນປະທານຂອງ ທ່ານນາງ ພູທອງ ພົມມະຈັນ ກຳມະການພັກເມືອງ ປະທານສະຫະພັນແມ່ຍິງເມືອງເຊໂປນ,ທ່ານ ພັນໂທ ວົງສະຫວັນ ແສງມະນີວົງ ຄະນະພັກຮາກຖານ ຮອງຫົວໜ້າກອງບັນຊາການ ປກສ ເມືອງ, ທ່ານ ຮອ້ຍເອກ ນາງ ບຸນເຫຼືອມ ພັນທະວົງ ຮອງຫົວໜ້າພະແນກພະລາທິການ ທັງເປັນປະທານສະຫະພັນແມ່ຍິງກອງບັນຊາການ ປກສ ເມືອງເຊໂປນ, ມີພະແນກຕໍາຫຼວດ, ພະແນກພະລາທິການ, ພະແນກຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ, ພະແນກສັນຕິບານ,ພະແນກການເມືອງ ແລະ ພະແນກ 504 (ຫ້າ ສູນ ສີ່) ເຂົ້າຮ່ວມ ຈໍານວນ 25 ທ່ານ,ຍິງ 13ສະຫາຍ.
ໃນພິທີທ່ານນາງ ບຸນເຫຼືອມ ພັນທະວົງ ກໍ່ໄດ້ຂື້ນຜ່ານບົດສະຫຼຸບການເຄື່ອນໄຫວວຽກງານແມ່ຍິງໃນໄລຍະ 05 ປີ ຂອງຮາກຖານແມ່ຍິງ ປກສ ( 2012-2017 ) ແລະ ແຜນການ 05 ປີ ( 2018-2022 ),ຮາກຖານແມ່ຍິງ ປກສ ແມ່ນຮາກຖານໜຶ່ງ ທີ່ຂື້ນກັບຮາກຖານພັກກອງບັນຊາການ ປກສ ເມືອງເຊໂປນ, ໃນນັ້ນປະກອບມີ 07 ພະແນກການ, ມີສະມາຊິກເອື້ອຍນ້ອງແມ່ຍິງທັງໝົດ 16 ທ່ານ, ຍົກຍ້າຍໄປປະຈໍາການຢູ່ບ່ອນໃໝ່ 01 ທ່ານ, ພັກຜ່ອນບໍານານຮ່ວມຊີວິດກັບບ້ານ ລວມ 02 ທ່ານ, ປະຈຸບັນມີສະມາຊິກແມ່ຍີງທັງໝົດ 13 ທ່ານ,ແມ່ຍິງທີ່ເຂົ້າເປັນສະມາຊິກພັກທັງ ໝົດ 09 ທ່ານ,ສະມາຊິກສົມບູນ 09 ທ່ານ, ມະຫາຊົນກ້າວໜ້າ 03 ທ່ານ, ຜ່ານການສັງເກດ ຕີລາຄາການເຄື່ອນໄຫວໃນໄລຍະ 05 ປີ ຜ່ານມາຮາກຖານແມ່ຍິງ ປກສ ກໍ່ຄືສະຫະພັນແມ່ຍິງແຕ່ລະຂັ້ນໄດ້ຖືເອົາວຽກງານການສຶກສາອົບຮົມການເມືອງແນວຄິດເປັນວຽກສຳຄັນເຊິ່ງໄດ້ນຳໃຊ້ໂດຍຫຼາຍຮູບແບບການສຶກສາອົບຮົມເອື້ອຍນ້ອງແມ່ຍິງເປັນຕົ້ນທີ່ຕົນຮັບຜິດຊອບ, ເຊື່ອມຊຶມມະຕິ ແລະ ເອກະສານຕ່າງໆຂອງພັກ ແລະ ລັດ ແລະໄດ້ປັບປຸງການດຳເນີນກອງປະຊຸມຂັ້ນຂອງຕົນນຳພາອົງການຈັດຕັ້ງສະຫະພັນແມ່ຍິງເຄື່ອນໄຫວປັບປຸງແບບແຜນວິທີເຮັດວຽກ, ຕິດພັນກັບຂະບວນການປະຕິບັດຂໍ້ແຂ່ງຂັນ 03 ດີ ຂອງສະຫະພັນແມ່ຍິງລາວ ເພື່ອເຮັດໃຫ້ການຈັດຕັ້ງແຕ່ລະທ່ານ ມີຄວາມເຂັ້ມແຂງຂື້ນເທື່ອລະກ້າວ ແລະ ແຜນການໃນຕໍ່ໜ້າຈະສືບຕໍ່ຊີ້ນຳໆພາສະມາຊິກແມ່ຍິງຂອງຕົນຮັບຊອບ, ຈັດຕັ້ງຂະຫຍາຍແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດວາງອອກ, ສະຫຼຸບ 03 ເດືອນ, 06 ເດືອນ ແລະ 01 ປີ ໃຫ້ຖືກຕ້ອງສອດຄ່ອງກັບເງື່ອນໄຂສະພາບຕົວຈິງ. ຫຼັງຈາກນັ້ນກໍ່ໄດ້ປ່ອນບັດຄັດເລືອກເອົາຄະນະປະທານສະຫະພັນແມ່ຍິງຮາກຖານ ປກສ ຄັ້ງທີ 03 ຊຸດໃໝ່ ເຊິງມີຜູ້ສະມັກ 05 ທ່ານ, ເລືອກເອົາ 03 ທ່ານ ແລະ ຜົນປະກົດວ່າໄດ້ເລືອກເອົາທ່ານນາງ ບຸນເຫຼືອມ ພັນທະວົງ ເປັນປະທານ,ທ່ານນາງ ເພັນນະພາ ພັງປະເສີດ, ທ່ານນາງ ບຸນຍ່ອມ ເປັນຮອງທັງເປັນປະທານກວດກາ.
ສຸດທ້າຍ ທ່ານນາງ ພູທອງ ພົມມະຈັນ ກໍ່ໄດ້ໃຫ້ກຽດມີຄຳເຫັນ ແລະ ໃຫ້ທິດເຍືອງທາງໃຫ້ແກ່ສະມາຊິກແມ່ຍິງຮາກຖານ ປກສ ການສຶກສາອົບຮົມການເມືອງແນວຄິດ, ສິນທຳປະຕິວັດ,ພັດທະນາຕົນເອງ, ເຄື່ອນໄຫວໃຫ້ມີຄວາມໜັກແໜ້ນເຂັ້ງແຂງ, ເຮັດວຽກເປັນໝູ່ຄະນະ ແລະ ປຶກສາຫາລືປະກອບຄຳຄິດຄຳເຫັນເຊິ່ງກັນ ແລະ ກັນ, ແລະ ໃຫ້ສືບຕໍ່ຂໍ້ແຂ່ງຂັນ 03 ດີ ຂອງສະຫະພັນແມ່ຍິງ ໃຫ້ໄດ້ຮັບຜົນສຳເລັດ,ສືບຕໍ່ປະຕິບັດເຜີຍແຜ່ຂໍ້ແຂ່ງຂັນ 03 ດີ ໃຫ້ສະມາຊິກພາຍໃນຮາກຖານຂອງຕົນຢ່າງທົ່ວເຖິງ.
Editor: ກຳປານາດ ລັດຖະເຮົ້າ
