ເພື່ອແນໃສ່ເພີ່ມທະວີຄວາມຮັບຮູ້ເຂົ້າໃຈ ແລະ ປູກຈິດສຳນຶກທົ່ວສັງຄົມ ໂດຍສະເພາະແມ່ນໄວໜຸ່ມຮຸ່ນສືບທອດຂອງສອງຊາດ ລາວ-ຫວຽດນາມ ກ່ຽວກັບສາຍພົວພັນມິດຕະພາບອັນເປັນມູນເຊື້ອຄວາມສາມັກຄີພິເສດ ແລະ ການຮ່ວມມືຮອບດ້ານຢ່າງເລິກເຊິ່ງກວ້າງຂວາງ ນັບມື້ຂະຫຍາຍຕົວ ແລະ ມີປະສິດທິຜົນ ສູນກາງສະຫະພັນແມ່ຍິງລາວ ໄດ້ຈັດພິທີໂຮມຊຸມນຸມສະເຫຼີມສະຫຼອງ ສອງວັນປະຫວັດສາດ ລາວ-ຫວຽດນາມ ຄື: ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 40 ປີ ແລະ ວັນສ້າງຕັ້ງສາຍພົວພັນການທູດ ຄົບຮອບ 55 ປີ ພິທີດັ່ງກ່າວ ໄດ້ຈັດຂື້ນທີ່ຫໍວັດທະນະທຳແຫ່ງຊາດ ນະຄອນຫຼວງວຽງຈັນ ໂດຍເປັນປະທານຂອງທ່ານນາງ ອິນລາວັນ ແກ້ວບຸນພັນ ປະທານສູນກາງສະຫະພັນແມ່ຍິງລາວ, ມີ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ທ່ານນາງ ຫງວຽນ ທິ ທູ່ ຮາ ປະທານສູນກາງສະຫະພັນແມ່ຍິງຫວຽດນາມ, ນອກນີ້ ຍັງມີບັນດາພັນລະຍາການນຳ ແມ່ປ້າອາວຸໂສ ບັນດາຄະນະບໍລິຫານງານສະພັນແມ່ຍິງສູນກາງ ນະຄອນຫຼວງວຽງຈັນ, ເມືອງ ແລະ ນັກທຸລະກິດຍິງເຂົ້າຮ່ວມ.

ໃນພິທີປະທານສູນກາງສະຫະພັນແມ່ຍິງລາວ ແລະ ຫວຽດນາມ ໄດ້ຜັດປ່ຽນກັນຂຶ້ນກ່າວມີຄຳເຫັນວ່າ: ໃນຖານະເປັນຕົວແທນສິດຜົນປະໂຫຍດອັນຊອບທຳຂອງແມ່ຍິງ-ເດັກນ້ອຍ ທັງສອງຊາດ ມີສາຍພົວພັນຮ່ວມມືກັນຢ່າງສະໜິດແໜ້ນ ດ້ວຍໄມຕີຈິດມິດຕະພາບອັນດູດດື່ມ ນັບແຕ່ໄລຍະແຫ່ງການຕໍ່ສູ້ປົດປ່ອຍຊາດ ຈົນຮອດໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ໂດຍໄດ້ເພີ່ມພູນຄູນສ້າງມູນເຊື້ອຄວາມສາມັກຄີພິເສດຢ່າງສະໝ່ຳສະເໝີ ຮ່ວມມືແລກປ່ຽນຂໍ້ມູນຂ່າວສານກ່ຽວກັບຂະບວນການແມ່ຍິງ ຢູ່ໃນລະດັບພາກພື້ນ ແລະ ໃນເວທີສາກົນ ພ້ອມທັງໃຫ້ການສະໜັບ ສະໜູນເຊິ່ງກັນ ແລະ ກັນ ໃນເວທີອາຊຽນ ສະໜັບສະໜູນທາງດ້ານນະໂຍບາຍການພົວພັນຮ່ວມມືກັບຕ່າງປະເທດຂອງສອງອົງການຈັດຕັ້ງແມ່ຍິງ.

ດ້ວຍຜົນງານຂອງການພົວພັນຮ່ວມມືຊ່ວຍເຫຼືອເຊິ່ງກັນ ແລະ ກັນ ແລະ ການແລກປ່ຽນຂໍ້ມູນຂ່າວສານດ້ານຕ່າງໆຢ່າງຕໍ່ເນື່ອງຕະຫຼອດມາ ສອງພັກ ສອງລັດ ເວົ້າສະເພາະແມ່ນສອງອົງການຈັດຕັ້ງແມ່ຍິງ ລາວ-ຫວຽດນາມ ໄດ້ຮັບການຍ້ອງຍໍ ແລະ ມອບຫຼຽນໄຊຂັ້ນຕ່າງໆໃຫ້ກັນ ແລະ ກັນ ເຊັ່ນ: ລັດຖະບານຫວຽດນາມ ໄດ້ມອບຫຼຽນໄຊມິດຕະພາບ ແລະ ຫຼຽນທີ່ລະນຶກໃຫ້ແກ່ການນຳຂັ້ນສູງຂອງແມ່ຍິງລາວ ແລະ ລັດຖະບານລາວ ກໍ່ໄດ້ມອບຫຼຽນໄຊອິດສະຫຼະຊັ້ນ 1 ແລະ ຫຼຽນໄຊມິດຕະພາບ ໃຫ້ການນຳຂັ້ນສູງແມ່ຍິງຫວຽດນາມ ເຊັ່ນດຽວກັນ.

ໃນຕອນທ້າຍພິທີ ທ່ານຮອງນາຍົກລັດຖະມົນຕີ ຕາງໜ້າໃຫ້ລັດຖະບານ ແລະ ສູນກາງສະຫະພັນແມ່ຍິງລາວ ຍັງໄດ້ໃຫ້ກຽດປະດັບຫຼຽນໄຊອິດສະຫຼະ ຊັ້ນ 2 ຊັ້ນ 3 ແລະ ຫຼຽນກາແຮງງານໃຫ້ກົມກອງລວມໝູ່ ແລະ ບຸກຄົນຂອງສູນກາງສະຫະພັນແມ່ຍິງຫວຽດນາມ ເນື່ອງໃນໂອກາດສະເຫຼີມສະຫຼອງສອງວັນປະຫວັດສາດ ລາວ-ຫວຽດນາມ ແລະ ຫວຽດນາມ-ລາວ ພ້ອມນີ້ ບັນດາແຂກຍັງໄດ້ຊົມກິດຈະກຳຕ່າງໆທີ່ທາງສູນກາງສະຫະພັນແມ່ຍິງລາວຈັດຂຶ້ນ ເປັນຕົ້ນ ກິດຈະກຳສະແດງສິລະປະວັນນະຄະດີ ວາງສະແດງຮູບພາບການເຄື່ອນໄຫວ ວາງສະແດງ ແລະ ຂາຍເຄື່ອງຫັດຖະກຳ ແລະ ອາຫານລາວ-ຫວຽດນາມ ຕື່ມອີກ ອັນໄດ້ເຮັດໃຫ້ພາຍໃນງານເຕັມໄປດ້ວຍບັນຍາກາດຟົດຟື້ນ.

Editor: ກຳປານາດ ລັດຖະເຮົ້າ