ເພື່ອເປັນການສຶບຕໍ່ ຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ. ເວົ້າສະເພາະ ສາຍພົວພັນ ແລະ ການຮ່ວມມື ລະຫວ່າງ ສະຫະພັນແມ່ຍິງລາວ ແລະ ສະຫະພັນແມ່ຍິງ ຫວຽດນາມ, ໃຫ້ເພີ່ມພູນຄູນສ້າງ, ແຕກດອກອອກຜົນ ນັບມື້ນັບເຕີບໃຫຍ່ຂະຫຍາຍຕົວ. ດັ່ງນັ້ນ ໃນວັນທີ 7 ກັນຍາ 2017 ທີ່ຜ່ານມາ ຄະນະປະທານສູນກາງສະຫະພັນແມ່ຍິງລາວ ນຳໂດຍ ທ່ານ ດຣ. ນາງ ອິນລາວັນ ແກ້ວບຸນພັນ ກຳມະການສຸນກາງພັກ, ປະທານຄະນະບໍລິຫານງານ ສູນກາງສະຫະພັນແມ່ຍິງລາວ, ໄດ້ຕ້ອນຮັບການຢ້ຽມຢາມຂອງຄະນະຜູ້ແທນຂັ້ນສູງ ຈາກ ສະຫະພັນແມ່ຍິງຫວຽດນາມ, ນຳໂດຍ ທ່ານນາງ ຫງຽນ ທິ ທູ່ ຮາ ກຳມະການສູນກາງພັກກອມມູນິດ, ປະທານຄະນະບໍລິຫານງານ ສະຫະພັນແມ່ຍິງຫວຽດນາມ ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ແລະ ເຄື່ອນໄຫວເຮັດວຽກ ຢູ່ ສປປ ລາວ ລະຫວ່າງວັນທີ 6-8 ກັນຍາ 2017 ຜ່ານມານີ້.
ໂອກາດດຽວກັນນີ້ ທັງ 2 ສະຫະພັນແມ່ຍິງ ລາວ ແລະ ຫວຽດນາມ ໄດ້ຕົກລົງເປັນເອກະພາບ ແລະ ເຊັນຂໍ້ຕົກລົງການຮ່ວມມື ໄລຍະ 2017-2022 ເປັນຕົ້ນແມ່ນ: ການແລກປ່ຽນຂໍ້ມູນຂ່າວສານທາງດ້ານແນວທາງຂອງພັກ, ແລະ ນະໂຍບາຍຂອງລັດຖະບານ ກໍ່ຄືຜົນສຳເລັດ ໃນພາລະກິດ ປົກປັກຮັກສາ ແລະ ພັດທະນາປະເທດຊາດ. ບົດຮຽນ ແລະ ປະສົບການໃນແຕ່ລະຂົງເຂດ ທີ່ກ່ຽວຂ້ອງກັບແມ່ຍິງ. ສຶບຕໍ່ແລກປ່ຽນຄະນະຜູ້ແທນຂັ້ນສູງ ເພື່ອຢ້ຽມຢາມ ແລະ ເຮັດວຽກຮ່ວມກັນ 2 ປີ/ຄັ້ງ. ທັງສອງຝ່າຍຈະພ້ອມກັນຊີ້ນຳແມ່ຍິງແຕ່ລະຂັນ ໃນປະເທດຂອງຕົນ ເພີ່ມທະວີການໂຄສະນາ, ການສຶກສາອົບຮົມໃຫ້ພະນັກງານ, ສະມາຊິກສະຫະພັນແມ່ຍິງ ແລະ ແມ່ຍິງບັນດາເຜົ່າ ປົກປັກຮັກສາ ແລະ ພັດທະນາສາຍພົວພັນທີ່ເປັນມູນເຊື້ອ, ຄວາມສາມັກຄີພິເສດ ລະຫວ່າງ ສອງຊາດ, ສອງອົງການຈັດຕັ້ງ, ພ້ອມທັງຊຸກຍູ້ສົ່ງເສີມການປະຕິບັດບັນດາກິດຈະກຳ, ການພົບປະ, ການແລກປ່ຽນບົດຮຽນປະສົບການ ຊ່ວຍເຫລືອ ເຊີ່ງກັນ ແລະ ກັນ. ພ້ອມກັນພັດທະນາ ປະກອບສ່ວນເຂົ້າປ້ອງກັນຄວາມສະຫງົບຢູ່ບໍລິເວນຊາຍແດນ ໃຫ້ເປັນຊາຍແດນແຫ່ງສັນຕິພາບ, ມິດຕະພາບ ຄວາມຫມັ່ນຄົງທະນົງແກ່ນ ພ້ອມທັງອຳນວຍຄວາມສະດວກ ໃຫ້ແກ່ແມ່ຍິງ ສອງຊາດ ໄດ້ພ້ອມກັນພັດທະນາ.
ພິເສດ ສະຫະພັນແມ່ຍິງ ຫວຽດນາມ ຈະຊ່ວຍເຫລືອສະຫະພັນແມ່ຍິງລາວ ໃນການຈັດຕັ້ງປະຕິບັດ ບັນດາກິດຈະກຳ, ເສີມຂະຫຍາຍມູນເຊື້ອ, ນາມມະຍົດແມ່ຍິງ ແລະ ແມ່ຍິງວິລະຊົນ. ການພັດທະນາຊັບພະຍາກອນມະນຸດ ຝຶກອົບຮົມຍົກລະດັບວິຊາການໃນໄລຍະສັ້ນ ໃຫ້ພະນັກງານສະຫະພັນແມ່ຍິງລາວ ທີ່ສະຖາບັນແມ່ຍິງ ຫວຽດນາມ. ສ່ວນສະຫະພັນແມ່ຍິງລາວ ກໍ່ຈະໄດ້ນຳເອົາການຊຸກຍູ້ສົ່ງເສີມ ໃຫ້ພະນັກງານ ແລະ ລູກຫລານ ໃຫ້ມີໂອກາດໄປສຶກສາຮ່ຳຮຽນ ທີ່ສະຖາບັນແມ່ຍິງຫວຽດນາມ ພ້ອມທັງເປັນເຈົ້າການປະສານສົມທົບກັບພາກສ່ວນໃຫ້ທຶນ ໄປຮຽນໄລຍະຍາວ. ເຊີ່ງທັງສອງຝ່າຍ ຈະພ້ອມກັນຈັດກອງປະຊຸມສຳມະນາກ່ຽວກັບຂົງເຂດວຽກງານ ທີ່ຫນ້າສົນໃຈ ຄື: ແມ່ຍິງກັບການພັດທະນາແບບຍືນຍົງ, ການສ້າງວຽກເຮັດງານທຳໃຫ້ກັບແມ່ຍິງ, ການສ້າງຄູອບຄົວໃຫ້ມີຄວາມຜາສຸກ ແລະ ຫມັ້ນຄົງ, ການຮັກສາສຸຂະພາບ ແລະ ສຸຂະພາບຈະເລີນພັນ, ແມ່ຍິງກັບການອະນຸລັກຮັກສາ ແລະ ເສີມຂະຫຍາຍວັດທະນະທຳ-ຮິດຄອງປະເພນີອັນດີງາມຂອງຊາດ, ແມ່ຍິງກັບການປົກປັກຮັກສາສະພາບແວດລ້ອມ, ການສ້າງຄວາມເຂັ້ມແຂງແກ່ການຈັດຕັ້ງແມ່ຍິງ, ການບຳລຸງພະນັກງານເພດຍິງ, ວຽກງານກວດກາເກັບກຳກ່ຽວກັບການຫາງສຽງໃນສັງຄົມ, ການເຄື່ອນໄຫວທັດສະນະໃນຮູບແບບຜັດປ່ຽນກັນ ເພື່ອແລກປ່ຽນຮ່ວມມືດ້ານການພັດທະນາ, ສົມທົບກັບການວາງສະແດງສິນຄ້າ, ຜະລິດຕະພັນ, ການແລກປ່ຽນວັດທະນະທຳ ແລະ ຮິດຄອງປະເພນີອັນດີງາມ ໃນບຸນສຳຄັນຕ່າງໆ ໃນ ສອງປະເທດ. ພ້ອມທັງເພີ່ມທະວີການຮ່ວມມືກັບສາກົນ ເພື່ອສົ່ງເສີມຄວາມກ້າວຫນ້າຂອງແມ່ຍິງ, ການໃຫ້ຄຳປຶກສາ ເພື່ອປົກປ້ອງສິດຜົນປະໂຫຍດຂອງແມ່ຍິງ ແລະ ເດັກນ້ອຍ.
Editor: ກຳປານາດ ລັດຖະເຮົ້າ
