ໃນວັນທີ 7-8 ກັນຍາ 2017 ທີ່ຫໍປະຊຸມແຫ່ງຊາດ ນະຄອນຫລວງວຽງຈັນ, ໄດ້ມີກອງປະຊຸມລັດຖະບານເປີດກວ້າງ ຄັ້ງທີ 1 ປະຈຳປີ 2017, ໂດຍການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາສະມາຊິກລັດຖະບານ, ເຈົ້າຄອງນະຄອນຫລວງວຽງຈັນ, ບັນດາເຈົ້າແຂວງ, ຜູ້ຕາງ ໜ້າອົງການຈັດຕັ້ງພັກ, ສະພາແຫ່ງຊາດ ແລະ ອົງການນິຕິບັດຍັດເຂົ້າຮ່ວມ.
ທ່ານ ທອງລຸນ ສີສຸລິດ ນາຍົກລັດຖະມົນຕີ ກ່າວເປີດກອງປະຊຸມ ວ່າ: ກອງປະຊຸມລັດຖະບານເປີດກວ້າງຄັ້ງທີ 1 ປະຈຳປີ 2017 ໄດ້ຮ່ວມກັນສະຫລຸບຕີລາຄາຄວາມຄືບໜ້າ ໃນການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ ປະຈຳປີ 2017 ແລະ ປຶກສາຫາລື ກ່ຽວກັບທິດທາງຂອງຮ່າງ ແຜນພັດທະນາເສດຖະກິດ-ສັງຄົມ ສຳລັບປີ 2018; ຮັບຟັງລາຍງານການສະຫລຸບຖອດຖອນບົດຮຽນ ແລະ ທິດທາງຜັນຂະຫຍາຍຜົນ ການຢ້ຽມຢາມ ຕ່າງປະເທດ ຂອງການນຳຂັ້ນສູງ ພັກ ແລະ ລັດຖະບານ; ສະຫລຸບຕີລາຄາການຈັດຕັ້ງປະຕິບັດ ມະຕິຄຳສັ່ງແຈ້ງການ ແລະ ການຕົກລົງຂອງລັດຖະບານ ໃນໄລຍະຜ່ານມາ; ສະຫລຸບຕີລາຄາ ການຈັດຕັ້ງປະຕິບັດຄໍາສັ່ງ ເລກທີ 15/ນຍ ກ່ຽວກັບການເພີ່ມທະວີຄວາມເຂັ້ມງວດ ໃນການຄຸ້ມຄອງ ແລະ ກວດກາການຂຸດຄົ້ນໄມ້, ເຄື່ອນຍ້າຍໄມ້ ແລະ ທຸລະກິດໄມ້, ພ້ອມທັງ ທິິດຊີ້ນຳເພີ່ມເຕີມຕ່າງໆ ຂອງລັດຖະບານ ກ່ຽວກັບບັນຫາດັ່ງກ່າວ; ປືກສາຫາລືກ່ຽວກັບທິດທາງ ການສົ່ງເສີມ ການຜະລິດເປັນສິນຄ້າ ແລະ ການຄໍ້າປະກັນຄວາມໜັ້ນຄົງ ດ້ານສະບຽງອາຫານ; ຮັບຟັງການລາຍງານ ກະກຽມຄວາມພ້ອມ ໃນການເປີດປີທ່ອງທ່ຽວລາວ ປີ 2018; ຮັບຟັງລາຍງານສະພາບການແກ້ໄຂສິ່ງກີດຂວາງ ແລະ ການຊົດເຊີຍ ຜູ້ທີ່ໄດ້ຮັບຜົນກະທົບຈາກການກໍ່ສ້າງໂຄງການທາງລົດໄຟລາວ-ຈີນ.
ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ໃຫ້ຮູ້ຕື່ມວ່າ: ບັນຫາທີ່ນຳເຂົ້າກອງປະຊຸມ ໃນຄັ້ງນີ້, ລ້ວນແຕ່ເປັນບັນຫາສຳຄັນ ແລະ ຕິດພັນກັບການຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ X ຂອງພັກ ກໍຄືທິດທາງ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ທີ່ມີບັນດາຂະແໜງການ ແລະ ອົງການປົກຄອງທ້ອງຖິ່ນ ທີ່ເປັນຫົວຈັກຫລັກແຫລ່ງ ໃນການຊຸກຍູ້ ແລະ ຄຸ້ມຄອງການຈັດຕັ້ງປະຕິບັດໃຫ້ມີປະສິດທິຜົນ. ສິ່ງສໍາຄັນກອງປະຊຸມ ຍັງໄດ້ສຸມ ໃສ່ຕີລາຄາຢ່າງກົງໄປກົງມາ ຕໍ່ໝາກຜົນ ແລະ ຂໍ້ຄົງຄ້າງ ໃນການ ຈັດຕັ້ງແຜນພັດທະນາເສດຖະກິດ-ສັງຄົມ ແລະ ປຶກສາຫາລື ບັນຫາສຳຄັນ ທີ່ພົວພັນກັບການຄຸ້ມຄອງລັດ,ຄຸ້ມຄອງສັງຄົມຂອງລັດຖະບານ ກໍຄື ອຳນາດ ການປົກ ຄອງທ້ອງຖິ່ນ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ.
Editor: ຕະວັນ ແສງສະຫວັນ
