ເມື່ອບໍ່ດົນມານີ້ ຢູ່ທີ່ຫ້ອງປະຊຸມຂອງ ໂຮງຮຽນການເມືອງການປົກຄອງ ແຂວງໄຊຍະບູລີ ໄດ້ຈັດພິທີປາຖະກາຖາວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວຄົບຮອບ 15 ປີ ໃຫ້ກຽດເຜີຍແຜ່ໂດຍ ທ່ານ ຄຳສຸກ ທໍ່ ຮອງເລຂາພັກແຂວງ, ກຳມະການສູນກາງແນວລາວສ້າງຊາດ, ປະທານແນວລາວສ້າງຊາດແຂວງ ຜູ້ຊີ້ນຳວຽກງານອົງການຈັດຕັ້ງມະຫາຊົນຂັ້ນແຂວງ, ມີບັນດາ ຄະນະປະຈໍາພັກແຂວງ ກໍາມະການພັກແຂວງ ຫົວໜ້າ, ຮອງຫົວໜ້າ ພະແນກການ,ທະຫານ ຕ່ຳຫຼວດ ພະນັກງານອາວຸໂສບຳນານ ພ້ອມດ້ວຍພະນັກງານອ້ອມຂ້າງແຂວງເຂົ້າຮ່ວມ.
ໃນພິທີ ທ່ານ ຄໍາສຸກ ທໍ່ ໄດ້ໃຫ້ກຽດ ປາຖະກາຖາ ວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 15 ປີ ນັບແຕ່ວັນທີ່ 9 ກັນຍາ 2002 ເປັນວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ໂດຍວັນດັ່ງກ່າວມີຄວາມໝາຍຄວາມສຳຄັນຢ່າງຍິ່ງ ຕໍ່ກຳລັງຖັນແຖວນັກຮົບປະຕິວັດທົ່ວປະເທດ ເພື່ອແນ່ໃສ່ໃຫ້ຄົນລຸ້ນຫຼັງ ກໍາໄດ້ມູນເຊື້ອອັນພິລະອາດຫານຂອງນັກຮົບ ມີຄວາມເອກອ້າງທະນົງໃຈຕໍ່ຜົນງານການຕໍ່ສູ້ ກອບກູ້ເອກະລາດຂອງຊາດເຮົາ ພ້ອມນີ້ທ່ານຍັງຍົກໃຫ້ເຫັນເຖິງ ປະຫວັດມູນເຊື່ອການຕໍ່ສູ້ອັນຍາວນານ ແລະ ມີໄຊທີ່ຍິ່ງໃຫຍ່ໃນແຕ່ລະໄລຍະ ການປະກອບສ່ວນ ແລະ ຜົນງານການເຄື່ອນໄຫວຂອງນັກຮົບເກົ່າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ສະພາບຄວາມຈຳເປັນທີ່ຈະພາໃຫ້ເກີດພາລະບົດບາດ ສິດ ແລະ ໜ້າທີ່ຂອງອົງການຈັດຕັ້ງ ສະຫະພັນນັກຮົບເກົ່າແຫ່ງຊາດ ລວມທັງແຜນການທິດທາງເຄື່ອນໄຫວລວມ ຂອງສະຫະພັນນັກຮົບເກົ່າ ໃນການປະກອບສ່ວນສ້າງສາພັດທະນາເສດຖະກິດສັງຄົມ ໃຫ້ຈະເລີນຮຸ່ງເຮືອງຕາມແນວທາງນະໂຍບາຍ ການປ່ຽນແປງ ໃໝ່ ຂອງພັກ-ລັດຖະບານວາງໄວ້.
Editor: ກຳປານາດ ລັດຖະເຮົ້າ
