ກອງປະຊຸມແນະນຳການຈັດຕັ້ງປະຕິບັດ ການຮັບແຈ້ງຊັບສິນຂອງພະນັກງານ-ລັດຖະກອນຮອບທີ 2 ປີ 2017 ທົ່ວແຂວງວຽງຈັນ ໄດ້ຈັດຂຶ້ນໃນວັນທີ 12 ກັນຍາ 2017 ຜ່ານມາ ຢູ່ທີ່ສະໂມສອນໃຫຍ່ຂອງແຂວງ ໂດຍການໃຫ້ກຽດເຂົ້າຮ່ວມຂອງ ທ່ານ ພົນຈັດຕະວາ ຊີດາລໍ່ ຈົ່ງຕົ່ງເຈ້ຍຊ້າ ຮອງເລຂາພັກແຂວງ, ຫົວໜ້າກອງບັນຊາການທະຫານ ແຂວງວຽງຈັນ, ມີບັນດາຄະນະປະຈໍາ, ກໍາມະການພັກແຂວງ, ເລຂາພັກເມືອງ, ຫົວໜ້າພະແນກການ, ອົງການ, ກົມກອງ ແລະ ລັດວິສາຫະກິດພາຍໃນແຂວງເຂົ້າຮ່ວມ.
ໃນກອງປະຊຸມໄດ້ຮັບຟັງການເຜີຍແຜ່ດຳລັດ ວ່າດ້ວຍການແຈ້ງຊັບສິນ ເລກທີ 159/ລບ, ລົງວັນທີ 4 ມິຖຸນາ 2013 ທີ່ສະເໜີໂດຍ ທ່ານ ພົນຈັດຕະວາ ຊີດາລໍ່ ຈົ່ງຕົ່ງເຈ້ຍຊ້າ ໃຫ້ຮູ້ວ່າ: ເພຶ່ອກໍານົດຫຼັກການ, ລະບຽບການ ແລະ ມາດຕະການກ່ຽວກັບການແຈ້ງຊັບສິນ ແລະ ລາຍຮັບຂອງພະນັກງານ-ລັດຖະກອນ, ທະຫານ, ຕຳຫຼວດທີ່ສັງກັດຢູ່ໃນກົງຈັກການຈັດຕັ້ງຂອງພັກ-ລັດ, ແນວລາວສ້າງຊາດ, ອົງການ ຈັດຕັ້ງມະຫາຊົນ, ລັດວິສາຫະກິດ, ລັດວິສາຫະກິດປະສົມ, ລັດຮຸ້ນສ່ວນ ເຄື່ອນໄຫວປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ, ມີປະສິດທິຜົນ ແລະ ມີຄວາມໂປ່ງໃສ ແນໃສ່ສະກັດກັ້ນ ແລະ ຕ້ານການສໍ້ລາດບັງຫຼວງໃນກົງຈັກການຈັດຕັ້ງທີ່ກ່າວມານັ້ນ ເພຶ່ອປະກອບສ່ວນເຂົ້າໃນການສ້າງສາ, ພັດທະນາປະເທດຊາດ ໃຫ້ຈະເລີນຮຸ່ງເຮືອງ ແລະ ສີວິໄລ.
ທ່ານ ວິນັດ ສີສຸວົງ ຄະນະປະຈຳພັກແຂວງ ປະທານກວດກາພັກ ຫົວໜ້າພະແນກກວດກາລັດແຂວງວຽງຈັນ ໄດ້ກ່າວໃນບົດແນະນຳການຈັດຕັ້ງປະຕິບັດດຳລັດວ່າດ້ວຍ ການແຈ້ງຊັບສິນ (ສະບັບປັບປຸງ) ເລກທີ 46/ອກລ,ລົງວັນທີ 20 ກຸມພາ 2017 ບາງຕອນວ່າ: ປະເພດຊັບສິນ, ລາຍຮັບ ແລະ ໜີ້ສິນທີ່ຕ້ອງແຈ້ງ ມີປະເພດທີ່ດິນ, ປະເພດສິ່ງປຸກສ້າງ, ພາຫະນະ ແລະ ກົນຈັກການຜະລິດຕ່າງໆ, ປະເພດວັດຖຸມີຄ່າ, ພັນທະບັດ, ເງິນຝາກທະນາຄານ, ເງິນຝາກກອງທຶນ ແລະ ສະຖາບັນການເງິນອື່ນໆ, ບັນຊີຮຸ້ນ, ປະເພດລາຍຮັບຕ່າງໆ, ປະເພດໜີ້ຕ້ອງຮັບ ແລະ ໜີ້ຕ້ອງສົ່ງ ແລະ ມູນຄ່າປະເພດຊັບສິນ ແລະ ລາຍຮັບ.
ສຳລັບພະນັກງານທີ່ຂຶ້ນກັບ ກົມການເມືອງສູນກາງພັກຄຸ້ມຄອງ ມີເລຂາຄະນະພັກແຂວງ, ທະຫານ, ຕຳຫຼວດຊັ້ນພົນຈັດຕະວາຂຶ້ນໄປ, ພະນັກງານທີ່ຂຶ້ນກັບ ຄະນະເລຂາທິການສູນກາງພັກຄຸ້ມຄອງມີຮອງເລຂາພັກ, ຄະນະປະຈຳພັກ, ກຳມະການພັກແຂວງ ແລະ ເລຂາພັກເມືອງ, ຮອງເຈົ້າແຂວງ, ຮອງປະທານສະພາປະຊາຊົນແຂວງ, ເຈົ້າເມືອງ ແລະ ເລຂາທິການ, ປະທານຄະນະກຳມາທິການສະພາປະຊາຊົນແຂວງ ແລະ ພະນັກງານວິຊາການຂັ້ນປະລິນຍາເອກ, ສາດສະດາຈານ. ກຳນົດເວລາຈັດຕັ້ງປະຕິບັດການແຈ້ງຊັບສິນ ແລະ ລາຍຮັບຂອງພະນັກງານແຕ່ລະເປົ້າໝາຍ ຕາມສິດຄຸ້ມຄອງຂອງແຕ່ລະຂັ້ນແມ່ນຄົບຮອບ 2 ປີໃດ ໃຫ້ແຈ້ງເທຶ່ອໜຶ່ງ, ການດຳເນີນການແຈ້ງຊັບສິນ ແລະ ລາຍຮັບແຕ່ລະຄັ້ງໃຫ້ສຳເລັດພາຍໃນ 6 ເດືອນ, ສຳລັບຢູ່ ແຂວງວຽງຈັນ ຄາດຄະເນຈະໃຫ້ສຳເລັດ ໃນທ້າຍເດືອນກັນຍາ 2017ນີ້, ເຊິ່ງທົ່ວແຂວງມີພະນັກງານ-ລັດຖະກອນທັງໝົດ 11.819 ຄົນ, (ໜຶ່ງໝື່ນໜຶ່ງພັນແປດຮ້ອຍກ່ວາຄົນ).
Editor: ກຳປານາດ ລັດຖະເຮົ້າ
