ໃນທ້າຍອາທິດຜ່ານມານີ້ ທ່ານ ໜູໄຊ ຈັນດາວົງ ຄະນະປະຈໍາພັກເມືອງຮອງເຈົ້າເມືອງ ທັງແມ່ນສະມາຊິກສະພາປະຊາຊົນແຂວງ ສາລະວັນ ໄດ້ລົງພົບປະອໍານາດການປົກຄອງ ແລະ ພໍ່ແມ່ປະຊາຊົນ 2 ກຸ່ມພູຖໍ້າພວງ ແລະ ໜອງແສງໂດຍມີທ່ານ ພັນຕີ ທອງຄໍາ ເຫມມະໄຊ, ທ່ານ ຄໍາເພັດ ແສງໃສສຸກ ເລຂາຄະນະພັກ, ຫົວໜ້າກຸ່ມພູຖໍ້າພວງ ແລະ ກຸ່ມໜອງແສງ ພ້ອມດ້ວຍອໍານາດການປົກຄອງບ້ານພາຍໃນກຸ່ມ ແລະ ພໍ່ແມ່ປະຊາຊົນ 3 ບ້ານ, ຄື: ບ້ານ ນາພະບາງນ້ອຍ, ບ້ານ ນາທົມ ແລະ ບ້ານ ນາທຶນໃຕ້ ໃຫ້ການຕ້ອນຮັບ ແລະ ເຂົ້າຮ່ວມຮັບຟັງ ເກືອບ 230 ຄົນ.
ໃນການລົງເຄື່ອນໄຫວ ຄັ້ງນີ້ ທ່ານ ຜູ້ແທນ ສະພາປະຊາຊົນແຂວງ ໄດ້ນໍາເອົາຜົນສໍາເລັດຂອງ 2 ກອງປະຊຸມ ຄື: ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ VIII ແລະ ກອງປະຊຸມສະໄໝສາມັນເທື່ອທີ 3 ຂອງສະພາປະຊົນແຂວງຊຸດທີ I ມາເຜີຍແຜ່ ເຊິ່ງທັງສອງກອງປະຊຸມໄດ້ພິຈາລະນາ ແລະ ຮັບຮອງເອົາຫຼາຍບັນຫາສໍາຄັນ ຕາມການສະເໜີຂອງ ຄະນະລັດຖະບານ ແລະ ຄະນະປົກຄອງແຂວງ, ນອກຈາກນີ້, ທ່ານຍັງນໍາເອົາຄວາມຢື້ຢາມຖາມຂ່າວ ແລະ ຄວາມເປັນຫ່ວງເປັນໃຍ ມາຍັງອໍານາດການປົກຄອງບ້ານ ແລະ ພໍ່ແມ່ປະຊາຊົນທັງ ສອງກຸ່ມ ແລະ ຟັງການລາຍງານສະພາບການພັດທະນາເສຖະກິດ-ສັງຄົມຂອງກຸ່ມ ແລະ ບັນດາຄໍາສະເໜີ ຂອງອໍານາດການປົກຄອງ ແລະ ພໍ່ແມ່ປະຊາຊົນ. ເຊິ່ງບັນຫາທີ່ປະຊາຊົນສະເໜີ ສ່ວນໃຫຍ່ແມ່ນກ່ຽວກັບການພັດທະນາດ້ານພື້ນຖານ ໂຄງລ່າງເປັນຕົ້ນເສັ້ນທາງ, ຂົວ, ໂຮງຮຽນ, ຄູສອນ ແລະ ນອກຈາກນີ້ຍັງ ມີບັນຫາລາຄາຜົນຜະລິດກະສີກໍາຕົກຕໍ່າ, ບັນຫາວຽກເຮັດງານທໍາ ຮຽນຈົບມາແລ້ວບໍ່ມີວຽກເຮັດ ແລະ ອື່ນໆ. .
ໃນການລົງເຄື່ອນໄຫວຄັ້ງນີ້ ທ່ານຜູ້ແທນຍັງໄດ້ນໍາເອົາບານເຕະ, ບານຕີ, ກະຕໍ້ຫວາຍ ແລະ ປື້ມຂຽນຈໍານວນໜຶ່ງມອບໃຫ້ 2 ໂຮງຮຽນປະຖົມນາພະບາງນ້ອຍ ແລະ ປະຖົມນາທຶນໃຕ້ນຳອີກດ້ວຍ.
Editor: ດາວໄຊ ສີວິໄລ
