ພິທີເຊັນຂໍ້ຕົກລົງການຮ່ວມມືສອງຝ່າຍ ລະຫວ່າງ ສະຫະພັນແມ່ຍິງລາວ ແລະ ສະຫະພັນແມ່ຍິງຫວຽດນາມ ຈັດຂຶ້ນໃນອາທິດຜ່ານມາ ທີ່ສູນກາງສະຫະພັນແມ່ຍິງລາວ ຮ່ວມລົງນາມຂອງທ່ານນາງ ອິນລາວັນ ແກ້ວບຸນພັນ, ປະທານສູນກາງສະຫະພັນແມ່ຍິງລາວ ແລະ ທ່ານນາງ ຫວງຽນ ທິທູ່ຮ່າ, ປະທານສູນກາງສະຫະພັນແມ່ຍິງຫວຽດ ນາມ.
ການຮ່ວມມືຄັ້ງນີ້ ສອງຝ່າຍໄດ້ຕົກລົງເປັນເອກະພາບຮ່ວມມື ໄລຍະປີ 2017-2022 ເປັນຕົ້ນ ການແລກປ່ຽນຂໍ້ມູນຂ່າວສານທາງດ້ານແນວທາງຂອງພັກ ແລະ ນະໂຍບາຍຂອງລັດຖະບານ ກໍ່ຄື ຜົນສຳເລັດໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ບົດຮຽນ ແລະ ປະສົບການໃນແຕ່ລະຂົງເຂດທີ່ກ່ຽວຂ້ອງກັບແມ່ຍິງ ສືບຕໍ່ແລກປ່ຽນຄະນະຜູ້ແທນຂັ້ນສູງ ເພື່ອໄປຢ້ຽມຢາມ ແລະ ເຮັດວຽກຮ່ວມກັນ 2 ປີຕໍ່ຄັ້ງ ສອງຝ່າຍພ້ອມກັນຊີ້ນຳແມ່ຍິງແຕ່ລະຂັ້ນຂອງປະເທດຕົນ ເພີ່ມທະວີວຽກງານໂຄສະນາສຶກສາອົບຮົມໃຫ້ພະນັກງານ ສະມາຊິກແມ່ຍິງ ແລະ ແມ່ຍິງບັນດາ ເຜົ່າ ປົກປັກຮັກສາ ພັດທະນາສາຍພົວພັນທີ່ເປັນມູນເຊື້ອ ຄວາມສາມັກຄີພິເສດລະຫວ່າງສອງຊາດ ສອງອົງການຈັດຕັ້ງ ຊຸກຍູ້ສົ່ງເສີມການປະຕິບັດບັນດາກິດຈະກຳ ພົບປະແລກປ່ຽນບົດຮຽນປະສົບການຊ່ວຍເຫຼືອເຊິ່ງກັນ ແລະ ກັນພິເສດ ສະຫະພັນແມ່ຍິງຫວຽດນາມ ຈະຊ່ວຍເຫຼືອສະຫະພັນແມ່ຍິງລາວ ໃນການຈັດຕັ້ງປະຕິບັດບັນດາກິດຈະກຳ ເສີມຂະຫຍາຍມູນເຊື້ອນາມມະຍົດແມ່ຍິງ ແລະ ແມ່ຍິງວິລະຊົນ ການພັດທະນາຊັບພະຍາກອນມະນຸດ ຊ່ວຍເຫຼືອຍົກລະດັບວິຊາການໄລຍະສັ້ນ ໃຫ້ພະນັກງານແມ່ຍິງລາວ ທີ່ສະຖາບັນແມ່ຍິງຫວຽດນາມ.
ສຳລັບ ສະຫະພັນແມ່ຍິງລາວ ຈະໄດ້ເອົາໃຈໃສ່ຊຸກຍູ້ສົ່ງເສີມໃຫ້ພະນັກງານ ແລະ ລູກຫຼານສະໝັກໄປເຂົ້າໂຮງຮຽນໄລຍະຍາວ ທີ່ສະຖາບັນແມ່ຍິງຫວຽດນາມ ພ້ອມທັງເປັນເຈົ້າການພົວພັນກັບພາກສ່ວນຜູ້ຮັບຜິດຊອບທຶນໄປຮຽນໄລຍະຍາວ ສອງຝ່າຍພ້ອມກັນຈັດກອງປະຊຸມສຳມະນາ ກ່ຽວກັບບັນດາຂົງເຂດວຽກງານທີ່ສອງຝ່າຍມີຄວາມສົນໃຈ ຄື: ແມ່ຍິງກັບການພັດທະນາແບບຍືນຍົງ ການສ້າງວຽກເຮັດງານທຳໃຫ້ແມ່ຍິງ ສ້າງຄອບຄົວໃຫ້ມີຄວາມຜາສຸກ ແລະ ໝັ້ນຄົງ ຮັກສາສຸຂະພາບ ແລະ ສຸຂະພາບຈະເລີນພັນ ແມ່ຍິງການອະນຸຮັກຮັກສາ ແລະ ເສີມຂະຫຍາຍວັດທະນະທຳ ແລະ ຮີດຄອງປະເພນີອັນດີງາມຂອງຊາດ ແລະ ແມ່ຍິງແຕ່ລະປະເທດ ປົກປັກຮັກສາສະພາບແວດລ້ອມ ສ້າງຄວາມເຂັ້ມແຂງໃຫ້ແກ່ການຈັດຕັ້ງແມ່ຍິງບຳລຸງພະນັກງານເພດຍິງ ວຽກງານກວດກາເກັບກຳຫາງສຽງສັງຄົມ ເຄື່ອນໄຫວທັດສະນະສຶກສາຕາມຮູບແບບຜັດປ່ຽນກັນ ເພື່ອແລກປ່ຽນຮ່ວມມືດ້ານການພັດທະນາ ສົມທົບການວາງສະແດງສິນຄ້າ ຜະລິດຕະພັນ ແລກປ່ຽນວັດທະນະທຳ ແລະ ຮີດຄອງປະເພນີອັນດີງາມໃນບຸນສຳຄັນຕ່າງໆຂອງສອງປະເທດ ພ້ອມທັງເພີ່ມທະວີຮ່ວມມືກັບສາກົນ ເພື່ອສົ່ງເສີມຄວາມກ້າວໜ້າຂອງແມ່ຍິງ ການໃຫ້ຄຳປຶກສາເພື່ອປົກປ້ອງສິດຜົນປະໂຫຍດຂອງແມ່ ຍິງ ແລະ ເດັກນ້ອຍ ເຊິ່ງທັງໝົດນີ້ ແມ່ນສະຫະພັນແມ່ຍິງສອງປະເທດ ຈະພ້ອມກັນຈັດຕັ້ງປະຕິບັດໃນ 5 ປີຕໍ່ໜ້າ 2017-2022.
Editor: ດາວໄຊ ສີວິໄລ
