ໃນເມື່ອບໍ່ດົນນີ້ ທີ່ຫ້ອງວ່າການປົກຄອງ ນະຄອນຫຼວງວຽງຈັນ ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ເລຂາຄະນະພັກ ເຈົ້າຄອງນະຄອນຫຼວງວຽງຈັນ ໄດ້ຕ້ອນຮັບການເຂົ້າຢ້ຽມຄຳນັບຂອງທ່ານ ນາງ ໂຕທິ ບິກເຈົ່າ ຮອງປະທານແນວໂຮມແຫ່ງຊາດຫວຽດນາມ ຄະນະປະຈຳພັກ ປະທານແນວໂຮມແຫ່ງຊາດ ນະຄອນໂຮ່ຈີມິງ ພ້ອມດ້ວຍຄະນະ ເນື່ອງໃນໂອກາດທີ່ທາງຄະນະ ໄດ້ເດີນທາງມາຢ້ຽມຢາມ ແລະ ເຮັດວຽກຮ່ວມກັບແນວລາວສ້າງຊາດ ນະຄອນຫຼວງວຽງຈັນ ແຕ່ວັນທີ 7-10 ກັນຍານີ້.
ທ່ານ ສິນລະວົງ ຄຸດໄພທູນ ໄດ້ສະແດງຄວາມຊົມເຊີຍ ພ້ອມທັງຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຂອງຄະນະໃນຄັ້ງນີ້ ເຊິ່ງຄະນະກໍ່ໄດ້ພົບປະແລກປ່ຽນຮ່ວມກັນລະຫວ່າງແນວລາວສ້າງຊາດ ນະຄອນຫຼວງວຽງຈັນ ແລະ ແນວໂຮມແຫ່ງຊາດ ນະຄອນໂຮ່ຈີມິງ ພ້ອມດຽວກັນນັ້ນ ໄດ້ຕີລາຄາຄືນ ການຈັດຕັ້ງປະຕິບັດບັນດາວຽກງານທີ່ 2 ຝ່າຍໄດ້ຮ່ວມມືກັນໃນໄລຍະຜ່ານມາໃຫ້ກັນຊາບ ໃນນັ້ນກໍ່ມີຜົນສຳເລັດຫຼາຍໜ້າວຽກທີ່ພົ້ນເດັ່ນ ສຳລັບວຽກງານບາງດ້ານທີ່ຍັງຄ້າງຄາ ກໍ່ພ້ອມກັນສືບຕໍ່ຈັດຕັ້ງປະຕິບັດໃຫ້ສຳເລັດ ເພື່ອເປັນການເສີມສ້າງສາຍພົວພັນມິດຕະພາບທີ່ດີລະຫວ່າງສອງພັກ-ສອງລັດ ກໍ່ຄືປະຊາຊົນສອງຊາດ ລາວ-ຫວຽດນາມ ທີ່ມີມູນເຊື້ອມາແຕ່ດົນນານ ໂດຍສະເພາະ ລະ ຫວ່າງ ແນວລາວສ້າງຊາດນະຄອນຫຼວງວຽງຈັນ ແລະ ແນວໂຮມແຫ່ງຊາດ ນະຄອນໂຮ່ຈີມິງ ໃຫ້ນັບມື້ແຕກດອກອອກຜົນ ແລະ ງອກງາມຍິ່ງຂຶ້ນ ນຳເອົາຜົນປະໂຫຍດສູງສຸດມາສູ່ປະຊາຊົນສອງຊາດ ກໍ່ຄືສອງນະຄອນ ສປປ ລາວ ແລະ ສສ ຫວຽດນາມ ໃຫ້ຂະຫຍາຍຕົວຢ່າງບໍ່ຢຸດຢັ້ງ.
ທ່ານ ນາງ ໂຕທິ ບິກເຈົ່າ ໄດ້ສະແດງຄວາມຂອບໃຈຕໍ່ທ່ານ ສິນລະວົງ ຄຸດໄພທູນ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ເຊິ່ງການມາຢ້ຽມຢາມ ແລະ ເຮັດວຽກຄັ້ງນີ້ ເປັນການຮັດແໜ້ນຄວາມສາມັກຄີ ພ້ອມທັງເສີມຂະຫຍາຍສາຍພົວພັນມິດຕະພາບ ຫວຽດນາມ-ລາວ ທັງເປັນກິດຈະກຳໜຶ່ງ ເພື່ອສະເຫຼີມສະຫຼອງປີສາມັກຄີມິດຕະພາບ ຫວຽດນາມ-ລາວ ໃຫ້ເປັນຂະບວນຟົດຟື້ນ.
Editor: ດາວໄຊ ສີວິໄລ
