ໃນວັນທີ 20 ກັນຍາ 2017 ທ່ານ ສີສະຫວາດ ແກ້ວບຸນພັນ ອະດີດກຳມະການກົມການເມືອງສູນກາງພັກ, ອະດີດປະທານສູນກາງແນວລາວສ້າງຊາດ ໄດ້ລົງພົບປະໂອ້ລົມຕໍ່ພະນັກງານຫຼັກແຫຼ່ງ ແຂວງເຊກອງ ທີ່ສະໂມສອນໃຫຍ່ຂອງແຂວງ ໂດຍການຕ້ອນຮັບຢ່າງອົບອຸ່ນຂອງ ທ່ານ ຖາວອນ ພົມມະໄລລຸນ ກໍາມະການປະຈໍາພັກແຂວງ ຮອງເຈົ້າແຂວງໆເຊກອງ, ມີບັນດາຄະນະປະຈໍາພັກແຂວງ, ກໍາມະການພັກແຂວງ, ພະນັກງານບໍານານອາວຸໂສປະຕິວັດຕະຫລອດຮອດຂະແຫນງການຕ່າງໆອ້ອມຂ້າງແຂວງເຂົ້າຮ່ວມ.
ທ່ານ ອະດີດກໍາມະການກົມການເມືອງສູນກາງພັກ, ອະດີດປະທານສູນກາງແນວລາວສ້າງຊາດ ກໍໄດ້ກ່າວຍ້ອງຍໍຊົມເຊີຍຕໍ່ບັນດາຜົນງານອັນພົ້ນເດັ່ນທີ່ແຂວງເຊກອງຍາດມາໄດ້ໃນໄລຍະຜ່ານມາ ເປັນຕົ້ນບັນດາການນໍາພັກ-ລັດ, ບັນດາຫົວຫນ່ວຍທຸລະກິດ ໄດ້ເປັນກໍາລັງແຮງຊຸກດັນໃຫ້ແກ່ການພັດທະນາເສດຖະກິດ-ສັງຄົມຂອງແຂວງ ມີຄວາມເຂັ້ມແຂງ, ປະກອບສ່ວນອັນໃຫຍ່ຫຼວງ ໃຫ້ແກ່ການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍ ເຂັ້ມແຂງຮອບດ້ານ, ສ້າງບ້ານເປັນ ຫົວໜ່ວຍພັດທະນາ ແລະ ການບຸກທະລຸໃນການແກ້ໄຂຄວາມທຸກຍາກຂອງປະຊາຊົນບັນດາເຜົ່ານັບມື້ດີຂຶ້ນເປັນກ້າວໆ.
ນອກຈາກນັ້ນ ທ່ານ ສີສະຫວາດ ແກ້ວບຸນພັນ ກໍໄດ້ເນັ້ນໜັກໃຫ້ແຂວງເຊກອງຖືສໍາຄັນ ແລະ ເອົາໃຈໃສ່ວຽກງານແນວຄິດ-ການເມືອງເປັນກົກຂອງຖັນແຖວພະນັກງານຫລັກແຫລ່ງ, ສະມາຊິກພັກໃຫ້ກໍາແຫນ້ນ ແລະ ເຊື່ອມຊຶມແນວທາງຂອງພັກຢ່າງເລິກເຊິ່ງ ພ້ອມທັງຍົກສູງຄວາມຮັບຜິດຊອບທາງດ້ານການເມືອງ ເອົາການສຶກສາອົບຮົມແນວຄິດການເມືອງຕິດພັນກັບການຝຶກຜົນຫລໍ່ຫລອມດ້ານຄຸນທາດການເມືອງຄຸນສົມບັດສິນທໍາປະຕິວັດ ເພື່ອເຮັດໃຫ້ພະນັກງານສະມາຊິກພັກມີສະຕິສະເຫມີໃນການຕ້ານກັບການເຄື່ອນໄຫວມ້າງເພດ້ານແນວຄິດຈິດຕະສາດຂອງອິດທິກໍາລັງປໍລະປັກເພື່ອເຮັດໃຫ້ຖັນແຖວພະນັກງານ ສະມະຊິກພັກມີຄວາມປອດໄສຂາວສະອາດ.
Editor: ກຳປານາດ ລັດຖະເຮົ້າ
