ໃນວາລະຂອງການດຳເນີນກອງປະຊຸມ ຄົບຄະນະກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ລະຫວ່າງວັນທີ 21-23 ກັນຍາ 2017 ແລະ ໃນວັນທີ 22 ກັນຍາ ນີ້ ທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ ໄດ້ໃຫ້ກຽດໂອລົມຕໍ່ກອງປະຊຸມ ຄັ້ງນີ້, ເຂົ້າຮ່ວມ ມີລັດຖະມົນຕີ, ຮອງລັດຖະມົນຕີ, ຫົວຫນ້າກົມ-ຮອງກົມ, ພະແນກການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ ຢ່າງພ້ອມພຽງ.
ທ່ານ ຮອງປະທານສະພາແຫ່ງຊາດ ໄດ້ກ່າວວ່າ: ກອງປະຊຸມຄົບຄະນະ ຄັ້ງນີ້ ຂອງຄະນະກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ແມ່ນເປັນການຈັດຕັ້ງປະຕິບັດກົດຫມາຍວ່າດ້ວຍສະພາແຫ່ງຊາດ ເປັນການຮຽກໂຮມສາມະຊິກ ຂອງຄະນະກຳມາທິການ ເພື່ອປຶກສາຫາລື, ແລກປ່ຽນຄວາມເຫັນຕໍ່ບັນດາວຽກງານທີ່ສຳຄັນ ຈຳນວນຫນຶ່ງ ເພື່ອສ້າງຄວາມເຂັ້ມແຂງ ແລະ ຄວາມເປັນເອກະພາບກັນ ໃນການປະຕິບັດຫນ້າທີ່ ເປັນເສນາທິການໃຫ້ແກ່ສະພາແຫ່ງຊາດ ຕາມທີ່ກຳນົດໄວ້ ໃນຫມວດທີ 4 ຂອງກົດຫມາຍສະພາແຫ່ງຊາດ.
ພ້ອມກັນນັ້ນ ກອງປະຊຸມຄັ້ງນີ້ ຍັງໄດ້ຄົ້ນຄວ້າແລກປ່ຽນຄຳເຫັນຕໍ່ເນື້ອໃນຂອງກອງປະຊຸມ ເຊິ່ງໃນແຕ່ລະບັນຫາ ລ້ວນແລ້ວແຕ່ມີຄວາມສຳຄັນ ແລະ ຈຳເປັນຕ້ອງໄດ້ຍົກສູງຄວາມຮັບຜິດຊອບໃນການຄົ້ນຄວ້າ ແລະ ປະກອບຄຳເຫັນ ໃນຖານະເປັນເສນາທິການໃຫ້ກັບສະພາແຫ່ງຊາດ ກໍ່ຄືການເປັນຕົວແທນແຫ່ງສິດຜົນປະໂຫຍດຂອງປະຊາຊົນ. ຕໍ່ກັບການໂອລົມ ຄັ້ງນີ້ ທ່ານ ຮອງປະທານສະພາແຫ່ງຊາດ ຍັງໄດ້ມີຄຳຄິດເຫັນບາງບັນຫາ ເຊັ່ນ: ຫນຶ່ງ ກໍ່ຄື ບັນຫາກ່ຽວກັບພາລະບົດບາດນິຕິບັນຍັດ ຂອງສະພາແຫ່ງຊາດ, ນັ້ນກໍ່ຄື ການສ້າງ ແລະ ປັບປຸງກົດຫມາຍ, ອີກຫນຶ່ງບົດບາດ ຂອງສະພາແຫ່ງຊາດ ແມ່ນການປະຕິບັດພາລະບົດບາດ ພິຈາລະນາ ແລະ ຮັບຮອງບັນຫາສຳຄັນຂອງຊາດ, ເຊີ່ງກອງປະຊຸມສະໄຫມສາມັນເທື່ອທີ 4 ທີ່ຈະມາເຖິງນີ້ ສາມາຊິກສະພາ ແມ່ນຈະໄດ້ພ້ອມກັນຄົ້ນຄວ້າປະກອບຄຳເຫັນ ແລະ ພິຈາລະນາຮັບເອົາຮ່າງບົດສະຫລຸບແຜນພັດທະນາເສດຖະກິດ-ສັງຄົມ 9 ເດືອນ ປີ 2017 ແລະ ຄາດຄະເນປະຕິບັດຫມົດປີ 2017 ແລະ ທິດທາງແຜນພັດທະນາເສດຖະກິດ-ສັງຄົມ 2018, ສາມ ຄື ການປະຕິບັດບົດບາດໃນການຕິດຕາມກົດກາ ຂອງສະພາແຫ່ງຊາດ ເຊິ່ງຄະນະກຳມະການ ກໍ່ຄືສະມາຊິກສະພາແຕ່ລະທ່ານ ຈະຕ້ອງໄດ້ຕິດຕາມກວດກາ ລັດຖະທຳມະນູນ, ກົດຫມາຍ, ຕິດຕາມກວດກາປະຕິບັດມະຕີຂອງສະພາແຫ່ງຊາດ, ມະຕິຄະນະປະຈຳສະພາແຫ່ງຊາດ, ການປະຕິບັດຫນ້າທີ່ວຽກງານ ຂອງການນຳ ກໍ່ຄືອຳນາດການປົກຄອງແຕ່ລະຄັ້ງ, ສະເພາະກອງປະຊຸມສະໄຫມສາມັນ ເທື່ອທີ 4 ຊອງສະພາແຫ່ງຊາດ ກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ຮັບຜິດຊອບກົດຫມາຍ ຢູ່ 6 ສະບັບ ( ໃນນັ້ນ ສ້າງໃຫມ່ 3 ສະບັບ ແລະ ປັບປຸງອີກ 3 ສະບັບ )
ນອກຈາກການປະຕິບັດ 3 ບົດບາດ ຂອງສະພາແຫ່ງຊາດແລ້ວ ບັນດາທ່ານ ຍັງຕ້ອງໄດ້ເອົາໃຈໃສ່ຄົ້ນຄວ້າເຊື່ອມຊືມ ແລະ ກຳແຫນ້ນພາລະບົດບາດ, ສິດຫນ້າທີ່ ຂອງກຳມາທິການ ເພື່ອໃຫ້ສາມາດປະຕິບັດບົດບາດ ໃນການເປັນເສນາທິການ ແກ່ສະພາແຫ່ງຊາດ ໄດ້ຢ່າງເຕັມສ່ວນ.
ພ້ອມນັ້ນ ຍັງໄດ້ເອົາໃຈໃສ່ກ່ຽວກັບການປະສານສົມທົບວຽກງານພາຍໃນກຳມະທິການ ກໍ່ຄື ລະຫວ່າງ ກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ກັບກຳມາທິການໃນສະພາ, ກຳມາທິການກ່ຽວຂ້ອງ ຂອງສະພາປະຊາຊົນແຂວງ, ກະຊວງ ເພື່ອແລກປ່ຽນທາງດ້ານຂໍິມູນຂ່າວສານ ເຊີ່ງກັນ ແລະ ກັນ ຢ່າງເປັນປົກກະຕິ.
Editor: ກຳປານາດ ລັດຖະເຮົ້າ
