ພະນັກງານໄອຍະການແຂວງ ແລະ ປກສ ແຂວງ ຈຳນວນ 60 ກ່ວາທ່ານ, ຈາກ 4 ແຂວງພາກເໜືອ ເຂົ້າຮ່ວມຝຶກອົບຮົມກ່ຽວກັບການຕໍ່ຕ້ານອາຊະຍາກຳ ທີ່ມີການຈັດຕັ້ງ ນັບແຕ່ວັນທີ 25-28 ກັນຍາ 2017 ທີ່ແຂວງອຸດົມໄຊ ການຝຶກອົບຮົມດັ່ງກ່າວຈັດຂຶ້ນຮ່ວມກັນໂດຍ ອົງການໄອຍະການປະຊາຊົນສູງສຸດ ແລະ ສະຖາບັນຊ່ວຍເຫຼືອດ້ານກົດໝາຍ ແລະ ວິຊາການ ຈາກລຸກຊຳບວກ. ກິດຈະກຳນີ້ແມ່ນສ່ວນໜຶ່ງຂອງຊຸດຝຶກອົບຮົມທີ່ ສະຖາບັນ ILSTA ຈັດຂຶ້ນສຳລັບ ພະນັກງານບັງຄັບໃຊ້ກົດໝາຍຂອງລາວ ໃນຂອບເຂດທົ່ວປະເທດ. ການຝຶກອົບຮົມແມ່ນໄດ້ສຸມໃສ່ການສຶກສາລົງເລີດກ່ຽວກັບ ການຄ້າມະນຸດ, ການລັກລອບນຳຄົນເຂົ້າ-ອອກເມືອງ ແລະ ການນຳສະເໜີກ່ຽວກັບການຕໍ່ຕ້ານການຟອກເງິນ. ໜ່ວຍງານຂໍ້ມູນຕໍ່ຕ້ານການຟອກເງິນ ຂອງທະນາຄານແຫ່ງ ສປປ ລາວ ໄດ້ນຳສະເໜີ ບົດບາດ ແລະ ໜ້າທີ່ຂອງຕົນໃນການຕໍ່ຕ້ານ ການຟອກເງິນໃນຂອບເຂດທົ່ວປະເທດ. ຜູ້ເຂົ້າຮ່ວມໄດ້ພ້ອມກັນສຶກສາຄົ້ນຄວ້າ ກໍລະນີສຶກສາ ແລະ ວິເຄາະຂໍ້ກົດໝາຍໃນຂັ້ນຕອນການດຳເນີນຄະດີຕາມກອບກົດໝາຍ.
ຊຸດຝຶກອົບຮົມຄັ້ງນີ້ ກ່າວເປີດ ໂດຍ ທ່ານ ໄຊຊະນະ ໂຄດພູທອນ ຮອງປະທານອົງໄອຍະການສູງສຸດ ສປປ ລາວ, ເຊິ່ງທ່ານໄດ້ຮຽກຮ້ອງໃຫ້ພະນັກງານທີ່ເຂົ້າຮ່ວມ ຕັ້ງໃຈຮໍ່າຮຽນເອົາປະສົບການ ແລະ ວິທີປະຕິບັດທີ່ດີຂອງສາກົນ. ພະນັກງານອົງການໄອຍະການປະຊາຊົນ ແລະ ປກສ ຈາກ ນະຄອນຫຼວງວຽງຈັນ, ແຂວງຝົ້ງສາລີ, ຫົວພັນ, ຊຽງຂວາງ ແລະ ອຸດົມໄຊ ຖືກເຊີນເຂົ້າຮ່ວມ. ຊຸດຝຶກອົບຮົມຄັ້ງນີ້ ມີການນຳສະເໜີໂດຍຫຍໍ້ກ່ຽວກັບປະເພດຂອງອາຊະຍາກຳ ຄື: ອາຊະຍາກຳທາງສິ່ງແວດລ້ອມ ເຊັ່ນ: ການຄ້າຂາຍສັດປ່າ ທີ່ຜິດກົດໝາຍ; ອາຊະຍາກຳຮຸນແຮງ ອາຊະຍາກຳຢາເສບຕິດ; ຮວມທັງອາຊະຍາກຳທີ່ເກີດຂຶ້ນໃໝ່ ເຊັ່ນ: ອາຊະຍາກຳທາງຄອມພິວເຕີ ແລະ ອາຊະຍາກຳຄໍເສື້ອຂາວ (ກ່ຽວກັບການສໍ້ລາດບັງຫຼວງ) ແລະ ສິ້ນສຸດດ້ວຍ ການນຳສະເໜີສະເພາະກ່ຽວກັບ ການຕ້ານການຟອກເງິນ ຊຸດຝຶກອົບຮົມຄັ້ງນີ້ແມ່ນໄດ້ຮັບການຊ່ວຍເຫຼືອທາງການເງິນຈາກ ກະຊວງການເງິນ ປະເທດລຸກຊຳບວກ ຊ່ວຍປັບປຸງ ຄວາມຮັບຮູ້, ຄວາມເຂົ້າໃຈ ແລະ ນຳສະເໜີວິທີປະຕິບັດທີ່ດີ ໃນການຕໍ່ສູ້ກັບອາຊະຍາກຳປະເພດຕ່າງໆ ທີ່ມີການຈັດຕັ້ງ ແລະ ເຊື່ອມໂຍງກັບການຟອກເງິນ.
Editor: ກຳປານາດ ລັດຖະເຮົ້າ
