ໃນ ວັນທີ 27 ກັນຍາ 2017 ຢູ່ທີ່ ສໍານັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍານັບຂອງ ທ່ານ ພົນເອກ ອານຸພົງ ເຜົ່າຈິນດາ ລັດຖະມົນຕີວ່າການກະຊວງມະຫະໄທ ແຫ່ງ ຣາຊະອານາຈັກໄທ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ນັບແຕ່ວັນທີ 24-28 ກັນຍາ 2017 ຜ່ານມານີ້ ໂອກາດດັ່ງກ່າວ, ທ່ານ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການເດີນ ທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້, ເຊິ່ງເປັນການປະກອບສ່ວນອັນສຳຄັນ ເຂົ້າໃນການເສີມຂະຫຍາຍ ສາຍພົວພັນການຮ່ວມມືຮອບດ້ານ ລະຫວ່າງ ສອງປະເທດ ລາວ-ໄທ ທີ່ມີມາແຕ່ດົນນານແລ້ວນັ້ນ ໃຫ້ໄດ້ຮັບການພັດທະນາ ແລະ ແຕກດອກອອກຜົນຍິ່ງໆຂຶ້ນ. ພ້ອມທັງ, ອວຍພອນໃຫ້ ທ່ານ ພົນເອກ ອານຸພົງ ເຜົ່າຈິນດາ ຈົ່ງປະສົບຜົນສຳເລັດ ໃນການເດີນທາງມາເຄື່ອນໄຫວວຽກງານ ໃນຄັ້ງນີ້.
ພ້ອມດຽວກັນນີ້, ທ່ານ ພົນເອກ ອານຸພົງ ເຜົ່າຈິນດາ ກໍໄດ້ສະແດງຄວາມຂອບໃຈ ຕໍ່ ທ່ານ ສອນໄຊ ສີພັນດອນ ທີ່ໄດ້ສະຫຼະເວລາອັນມີຄ່າ ໃຫ້ການຕ້ອນຮັບຢ່າງອົບອຸ່ນ ໃນຄັ້ງນີ້, ພ້ອມທັງ ແຈ້ງຈຸດປະສົງຂອງການເດີນທາງມາ ສປປ ລາວ ໃນຄັ້ງນີ້, ທ່ານຮອງນາຍົກລັດຖະມົນຕີຊາບ ໂດຍສະເພາະແມ່ນ ຜົນຂອງການເຂົ້າຮ່ວມກອງປະຊຸມ ລະຫວ່າງ ບັນດາເຈົ້າແຂວງ ແລະ ຜູ້ວ່າ ຣາຊະການ ຈັງຫວັດ, ລາວ-ໄທ ຄັ້ງທີ 10 ທີ່ຈັດຂື້ນທີ່ນະຄອນຫລວງວຽງຈັນ.
Editor: ກຳປານາດ ລັດຖະເຮົ້າ
