ໃນວັນທີ 28 ກັນຍາ ນີ້ ຢູ່ທີ່ປົກຄອງເມືອງຈັນທະບູລີ ທ່ານນາງ ບົວລອນ ວົງດາລາແສນ ຄະນະພັກ ນະຄອນຫລວງ, ເລຂາພັກເມືອງ ເຈົ້າເມືອງຈັນທະບູລີ ໄດ້ຖະແຫລງຕໍ່ສື່ມວນຊົນ ກ່ຽວກັບວາລະ ແລະ ກິດຈະກຳ ທີ່ສຳຄັນ ໃນການສະເຫລີມສະຫລອງ ບຸນອອກພັນສາ ປະວໍລະນາ ແລະ ບຸນຊ່ວງເຮືອ ປະເພນີ ປະຈຳປີ 2017 ທີ່ທ່າວັດຈັນ, ເມືອງຈັນທະບູລີ.

ຈຸດປະສົງເພື່ອເປັນການປົກປັກຮັກສາ ເສີມຂະຫຍາຍມູນເຊື້ອ, ຮິດຄອງປະເພນີອັນດີງາມ ຂອງຊາດລາວ ກໍ່ຄືນະຄອນຫລວງວຽງຈັນ ທີ່ສຶບທອດມາແຕ່ບູຮານນາການ, ຮັບປະກັນໃຫ້ມີຄວາມເບີກບານມ່ວນຊື່ນ, ມີບັນຍາກາດຟົດຟື້ນ ຢູ່ໃນສັງຄົມ ນັບທັງການສະແດງສິລະປະວັນນະຄະດີ, ການແຂ່ງຂັນຊ່ວງເຮືອ ປະເພດຕ່າງໆ, ພ້ອມກັນນັ້ນ ຕ້ອງຮັບປະກັນຄວາມສະຫງົບປອດໄພ ຮອບດ້ານ 100 ສ່ວນຮ້ອຍ, ຕະຫລອດໄລຍະການກະກຽມ, ການດຳເນີນງານບຸນອອກພັນສາ ປະວໍລະນາ ການຄົບງັນ ແລະ ການຊ່ວງເຮືອ. ນອກນັ້ນ ຍັງເປັນການຊຸກຍູ້ໃຫ້ສັງຄົມ ໄດ້ມີການຄ້າຂາຍ ໃຫ້ບໍລິການຕ່າງໆ ໃຫ້ມີລາຍຮັບ, ມີບ່ອນແລກປ່ຽນສິນຄ້າ, ສົ່ງເສີມການຄ້າ-ຂາຍ, ລວມທັງການຜະລິດຕ່າງໆ. ຄຽງຄູ່ກັນນັ້ນ ຍັງຕ້ອງຮັບປະກັນ ຄວາມສະອາດຈົບງາມ ອື່ນໆ.

Editor: ກຳປານາດ ລັດຖະເຮົ້າ