ໃນວັນທີ 3 ຕຸລາ 2017 ຜ່ານມາ, ຢູ່ທີ່ເມືອງເຟືອງ ແຂວງວຽງຈັນ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດຄຳສັ່ງ ເລກທີ 15/ນຍ ປະຈໍາ ສົກປີ 2016 – 2017 ແລະ ທິດທາງແຜນການປີ 2018 ຂື້ນທີ່ສະໂມສອນປົກຄອງເມືອງ, ພາຍໃຕ້ການເປັນປະທານຂອງ ທ່ານ ສີຕານ ສຸກປັນຍາ ກຳມະການພັກແຂວງ ເລຂາພັກເມືອງ ເຈົ້າເມືອງໆເຟືອງ, ໃຫ້ກຽດເຂົ້າຮ່ວມຂອງ ທ່ານ ສົມອົກ ໜໍ່ຈະເລີນ ຮອງຫົວໜ້າພະແນກກະສິກຳ ແລະ ປ່າໄມ້ ແຂວງວຽງຈັນ ພ້ອມດ້ວຍຄະນະ ແລະ ບັນດາພະນັກງານກ່ຽວຂ້ອງພາຍໃນເມືອງເຟືອງ ເຂົ້າຮ່ວມ.
ໃນພິທີ ທ່ານ ລີເຮີ່ ເລ່ຍລ້ຽງເຊີ ກຳມະການພັກເມືອງ ຫົວໜ້າຫ້ອງການກະສິກຳ - ປ່າໄມ້ ເມືອງເຟືອງ ໄດ້ຂື້ນຜ່ານບົດສະຫຼຸບການຈັດຕັ້ງປະຕິບັດການຜັນຂະຫຍາຍຄໍາສັ່ງ ຂອງນາຍົກລັດຖະມົນຕີ ສະບັບເລກທີ 15/ນຍ ລົງວັນທີ 13/05/2016 ປະຈຳສົກປີ 2016 – 2017 ແລະ ທິດທາງແຜນການປີ 2018. ໃນໄລຍະຜ່ານມາການຈັດຕັ້ງປະຕິບັດຕົວຈິງແມ່ນໄດ້ເລີ່ມແຕ່ເດືອນ ກໍລະກົດ ປີ 2016 ໂດຍມີຫ້ອງການກະສິກຳ ແລະ ປ່າໄມ້ ເມືອງ, ກອງບັນຊາການ ປກຊ - ປກສ ເມືອງເຟືອງ ໄດ້ສົມທົບກັບຄະນະ ກໍາມະການສະເພາະກິດ ແລະ ບັນດາຫ້ອງການທີ່ກ່ຽວຂ້ອງລົງກວດກາການເຄື່ອນໄຫວຂອງບັນດາໂຮງງານເຟີນີເຈີ, ກວດກາການລັກລອບຕັດ, ເລື່ອຍໄມ້ ແລະ ເຄື່ອນຍ້າຍໄມ້ຢູ່ເຂດເມືອງເຟືອງ + ເມືອງແມດ ໄດ້ນໍາໃຊ້ກຳລັງຕິດຕາມກວດກາຈໍານວນ 65 ຄັ້ງ, ມີ 390 ເທື່ອຄົນ. ສາມາດອາຍັດລົດໄດ້ທັງໝົດ 64 ຄັນ ໃນນີ້ມີລົດຕັອກໆ ຈໍານວນ 18 ຄັນ, ອາຍັດໄມ້ແປຮູບໄດ້ ຈໍານວນ 2.399 ໂຕ, ມີບໍລິມາດ 84.300 ແມັດກ້ອນ, ປະເພດໄມ້ຄຸ້ມຄອງ 1 , 2 ແລະ 3 ເປັນມູນຄ່າ 68 ລ້ານກວ່າກີບ, ຢຶດຈັກສະຕີ່ນ ໄດ້ ຈໍານວນ39 ເຄື່ອງ.
ໃນໂອກາດດັ່ງກ່າວ ພາກສ່ວນກ່ຽວຂ້ອງຍັງໄດ້ພ້ອມກັນເຜົາທຳລາຍຈັກສະຕີ່ນ ຫຼື ເຄື່ອງຂຸດຄົ້ນໄມ້ ທີ່ຍຶດໄດ້ ແລະ ຜິດກົດໝາຍ ຈໍານວນ 39 ເຄື່ອງ, ທັງນີ້ກໍເພື່ອເປັນການປະຕິບັດລະບຽບກົດຫມາຍຢ່າງເຂັ້ມງວດໃນການປະຕິບັດ ຄໍາສັ່ງເລກທີ 15 / ນຍ ເພື່ອເຮັດໃຫ້ການຢຸດຕິການຖາງປ່າ, ການລັກລອບຕັດໄມ້, ເຄື່ອນຍ້າຍໄມ້ ໃຫ້ຫຼຸດໜ້ອຍຖອຍລົງ ແລະ ທັງເປັນການສ້າງກົດໝາຍປ່າໄມ້ ໃຫ້ມີຄວາມເຂັ້ມແຂງ ແລະ ເກີດຜົນສັກສິດ.
ທີມຂ່າວ ແຂວງວຽງຈັນ
Editor: ກຳປານາດ ລັດຖະເຮົ້າ
