ກະຊວງວິທະຍາສາດ ແລະ ເຕັກໂນໂລຊີ ໄດ້ຈັດກອງປະຊຸມຂະແຫນງວິທະຍາສາດ ແລະ ເຕັກໂນໂລຊີ ຂື້ນໃນວັນທີ 11 ຕຸລາ 2017 ນີ້ ທີ່ກະຊວງດັ່ງກ່າວ , ກອງປະຊຸມຄັ້ງນີ້ ໂດຍໄດ້ຮັບກຽດ ຮ່ວມເປັນປະທານ ຂອງ ທ່ານ ບັນດິດ ສາດສະດາຈານ ບໍ່ວຽງຄຳ ວົງດາລາ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ເຂົ້າຮ່ວມມີບັນດາຮອງລັດຖະມົນຕີ, ຮອງເຈົ້າແຂວງ, ຜູ້ແທນກອງປະຊຸມຈາກສູນກາງ ແລະ ທ້ອງຖີ່ນ ໃນທົ່ວປະເທດ, ລວມທັງຂະແຫນງການທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມ ດັ່ງກ່າວ, ຜູ້ເຂົ້າຮ່ວມ ໄດ້ຮັບຟັງການລາຍງານສະພາບລວມການຈັດຕັ້ງປະຕິບັດວຽກງານ ທາງດ້ານວິທະຍາສາດ ແລະ ເຕັກໂນໂລຊິ ປະຈຳປີ 2017 ແລະ ແຜນປີ 2018 ໃນທົ່ວປະເທດ ປະກອບມີ 5 ຫົວຂໍ້ໃຫຍ່ ຄື:
- ສະພາບໂດຍລວມ, ຜົນສຳເລັດ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້, ບັນດາທິດທາງແຜນງານຕໍ່ຫນ້າ, ມາດຕະຖານໃນການຈັດຕັ້ງປະຕິບັດ
ໃນ 1 ປີຜ່ານມາ ການເຄື່ອນໄຫວວຽກງານວິທະຍາສາດ ແລະ ເຕັກໂນໂລຊີ ຢູ່ປະເທດເຮົາ ໄດ້ມີການຫັນປ່ຽນ ຢ່າງຕັ້ງຫນ້າໃນຫລາຍດ້ານ, ຫລັກໆແມ່ນການຜັນຂະຫບາຍ ແລະ ຈັດຕັ້ງປະຕິບັດເນື້ອໃນ ຂອງມະຕິກອງປະຊຸມໃຫຍ່ ຄັ້ງທີ 10 ຂອງພັກ, ໂດຍສະເພາະສຶບຕໍ່ຜັນຂະຫບາຍທິດນຳ 4 ບຸກທະລຸ. ຕະຫລອດໄລຍະ 1 ປີຜ່ານມາ ວຽກງານວິທະຍາສາດ ແລະ ເຕັກໂນໂລຊີ ແມ່ນໄດ້ປະກອບສ່ວນອັນສຳຄັນໃນການພັດທະນາຂະແຫນງການ ກໍ່ຄືຜົນສຳເລັດລວມ ຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ເຮັດໃຫ້ບົດບາດຂອງວຽກງານວິທະຍາສາດ ແລະ ເຕັກໂນໂລຊີ ນັບມື້ນັບພົ້ນເດັ່ນຂື້ນ ໃນຂະບວນປົກປັກຮັກສາ ແລະ ພັດທະນາປະເທດ. ໃນຫນຶ່ງປີຜ່ານມາ ຂະແຫນງວິທະຍາສາດ ແລະ ເຕັກໂນໂລຊີ ຍາດໄດ້ຫລາຍຜົນງານທີ່ຫນ້າພູມໃຈ ທີ່ພົ້ນເດັ່ນ ຄື: ວຽກງານການເມືອງແນວຄິດ, ວງກງານກໍ່ສ້າງພັກ, ວຽກງານປັບປຸງກົງຈັກການຈັດຕັ້ງ, ວຽກງານໂຄສະນາເຜີຍແຜ່ ແລະ ສ້າງຈິດສຳນຶກ, ວຽກງານບຸກຄະລາກອນ ແລະ ພັດທະນາຊັບພະຍາກອນມະນຸດ, ວຽກງານສ້າງນິຕິກຳ, ວຽກງານຄົ້ນຄວ້າ ແລະ ພັດທະນາວິທະຍາສາດ ແລະ ເຕັກໂນໂລຊີ, ການພັດທະນາພື້ນຖານໂຄງລ່າງ ແລະ ການບໍລິຫານ, ວຽກງານຊັບສິນທາງປັນຍາ, ວຽກງານມາດຕະຖານ ແລະ ວັດແທກ, ວຽກງານເຕັກໂນໂລຊີຂໍ້ມຸນຂ່າວສານ.
Editor: ກຳປານາດ ລັດຖະເຮົ້າ
