ກະຊວງວິທະຍາສາດ ແລະ ເຕັກໂນໂລຊີ ໄດ້ສະຫຼຸຸບຜົນງານການເຄື່ອນ ໄຫວວຽກງານໄລຍະ 5 ປີ (2011-2015) ພ້ອມທັງຍ້ອງຍໍກົມກອງ ແລະ ບຸກຄົນທີ່ມີ ຜົນງານດີເດັ່ນ ຂຶ້ນໃນ ວັນທີ 12 ຕຸລາ 2017 ຜ່ານມານີ້ ທີ່ຫໍປະຊຸມແຫ່ງຊາດ, ນະຄອນຫລວງວຽງຈັນ ໂດຍການເປັນປະ ທານຂອງ ທ່ານ ບັນດິດ ສາດສະດາຈານ ບໍ່ວຽງຄຳ ວົງດາລາ ລັດຖະມົນຕີກະຊວງ ວິທະຍາສາດ ແລະ ເຕັກໂນໂລຊີ ແລະ ໃຫ້ກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ເຂົ້າຮ່ວມມີບັນດາ ທ່ານຮອງລັດຖະມົນຕີ, ຫົວໜ້າກົມ-ຮອງກົມ, ຕະຫຼອດຮອດ ພະນັກງານ-ຂະແຫນງການທີ່ກ່ຽວຂ້ອງເຂົ້າຮ່ວມ ຢ່າງພ້ອມພຽງ
ໃນພິທີ ທ່ານ ບັນດິດ ສາດສະດາຈານ ບໍ່ວຽງຄຳ ວົງດາລາ ລັດຖະມົນຕີກະຊວງ ວິທະຍາສາດ ແລະ ເຕັກໂນໂລຊີ ໄດ້ຂຶ້ນກ່າວ ສະຫຼຸຸບຜົນງານການເຄື່ອນ ໄຫວວຽກງານໄລຍະ 5 ປີ ຜ່ານມາວ່າ: ກະຊວງວິທະຍາສາດ ແລະ ເຕັກໂນໂລຊີ ໄດ້ຮັບການ ສ້າງຕັ້ງຂຶ້ນໃນເດືອນກັນຍາ ປີ 2011 ໄດ້ກາຍເປັນບາດກ້າວກະໂດດໃໝ່ໃຫ້ ແກ່ການ ສ້າງປະຖົມປັດໄຈຕົ້ນຕໍ ເພື່ອພັດທະນາວິທະຍາສາດແລະ ເຕັກໂນໂລຊີ, ສິດກ່ຽວຂ້ອງກັບລິຂະສິດ ແລະ ການແກ້ໄຂຂໍ້ຂັດແຍ່ງ ຊັບສິນທາງປັນຍາ ໄດ້ທັງໝົດ 2.600 ກວ່າສະບັບ, ໄດ້ສ້າງຕັ້ງຫ້ອງກວດສອບຄຸນນະພາບນ້ຳມັນເຊື້ອໄຟປະຈຳ ຢູ່ບັນດາດ່ານສາກົນ ຊຶ່ງສາມາດເພີ່ມ ລາຍຮັບພາສີອາກອນນ້ຳມັນ ແລະ ຮັບປະກັນໃຫ້ສັງຄົມ ໄດ້ຊົມໃຊ້ນ້ຳມັນ ທີ່ມີຄຸນນະພາບ, ປົກປັກຮັກສາສິ່ງແວດລ້ອມ, ກວດສອບກົງເຕີໄຟຟ້າ ນຳເຂົ້າມາໃໝ່ ຈຳນວນ 247.000 ກວ່າໜ່ວຍ ແລະ ບໍລິການອື່ນໆອີກ.
ສະນັ້ນ ເພື່ອ ສືບຕໍ່ຜັນຂະຫຍາຍມະຕິກອງ ປະຊຸມໃຫຍ່ ຄັ້ງທີ 10 ຂອງພັກ ແລະ ແຜນພັດທະນາເສດຖະ ກິດ-ສັງຄົມແຫ່ງຊາດ 5 ປີ ຄັ້ງ ທີ 8 ໃຫ້ປະກົດຜົນເປັນຈິງ ຕາມທິດພັດທະນາແບບຍືນຍົງ, ກະຊວງວິທະຍາສາດ ແລະ ເຕັກໂນໂລຊີ ຈະສືບຕໍ່ ຈັດຕັ້ງປະຕິບັດແຜນຍຸດທະສາດການພັດທະນາວິທະຍາ ສາດ ແລະ ເຕັກໂນໂລຊີ ຂອງ ສປປ ລາວ ໄລຍະແຕ່ນີ້ ຮອດ ປີ 2030 ແນໃສ່ເຮັດໃຫ້ຂະແໜງ ວຽກງານວິທະຍາສາດ, ເຕັກໂນໂລຊີ ແລະ ນະວັດຕະກຳ ກາຍເປັນກຳລັງແຮງຂັບເຄື່ອນ ໃຫ້ແກ່ການພັດທະນາປະເທດ, ໄປຕາມທິດຫັນເປັນອຸດສາຫະກຳ ແລະ ທັນສະໄໝແບບຍືນຍົງສີຂຽວ, ໃນແຜນຍຸດທະສາດການພັດທະນາດັ່ງກ່າວ ໄດ້ກຳນົດ 6 ແຜນງານຍຸດທະສາດ. ພ້ອມກັນນັ້ນ, ການພັດທະນາວິທະຍາສາດ ແລະ ເຕັກໂນໂລຊີ ໃນຂະແໜງການຕ່າງໆ ໄດ້ເປັນປັດໄຈສຳຄັນ ເພື່ອຮັບປະກັນໃຫ້ເສດຖະກິດ-ສັງຄົມ ມີການຂະຫຍາຍຕົວຢ່າງຕໍ່ເນື່ອງ ແລະ ມີຄວາມໝັ້ນຄົງ.
ຈາກນັ້ນທີ່ປະຊຸມໄດ້ຈັດ ພິທີປະດັບຫຼຽນໄຊ, ຫຼຽນກາ ແລະ ໃບຍ້ອງຍໍໃຫ້ແກ່ບຸກຄົນ ແລະ ກົມກອງລວມໝູ່ ດັ່ງນີ້: ຫຼຽນໄຊແຮງງານຊັ້ນ 1 ມີ ຈຳນວນ 13 ທ່ານ ແລະ 1 ກົມກອງ, ຫຼຽນໄຊແຮງງານຊັ້ນ 2 ມີຈຳນວນ 28 ທ່ານ ແລະ 4 ກົມກອງ, ຫຼຽນໄຊແຮງງານຊັ້ນ 3 ມີຈຳນວນ 26 ທ່ານ ແລະ 4 ກົມກອງ, ຫຼຽນກາແຮງງານ ມີຈຳນວນ 33 ທ່ານ ແລະ 3 ກົມກອງ ແລະ ໃບຍ້ອງຍໍຂັ້ນລັດຖະບານ ມີຈຳນວນ 39 ທ່ານ ແລະ 1 ກົມກອງ
ໃນພິທີ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ ຜົນງານການເຄື່ອນໄຫວວຽກງານຂອງ ກະຊວງ ວິທະຍາສາດ ແລະ ເຕັກໂນໂລຊີ ພ້ອມທັງ ເນັ້ນໃຫ້ເອົາໃຈໃສ່ການ ຄົ້ນຄວ້າ-ພັດທະນາວຽກງານ ວິທະຍາສາດ ແລະ ເຕັກໂນໂລຊີ ຈະຕ້ອງຮັບໃຊ້ການພັດທະນາເສດຖະກິດ-ສັງຄົມ ຢ່າງແທ້ຈິງ ເພື່ອໃຫ້ທົ່ວສັງຄົມມີຄວາມເຂົ້າໃຈເຖິງບົດບາດຄວາມສຳຄັນຂອງ ວິທະຍາສາດ ແລະ ເຕັກໂນໂລຊີ, ກະຕຸ້ນໃຫ້ນັກ ຄົ້ນຄວ້າວິທະຍາສາດໜຸ່ມ, ຜູ້ມັກການຄົ້ນຄວ້າ ແລະ ມີການລະດົມທຶນຂອງທົ່ວສັງຄົມ, ມີການພົວພັນຮ່ວມມື ລະຫວ່າງ ການຄຸ້ມຄອງລັດ. ທຸລະກິດເອກະຊົນ ແລະ ຄູ່ຮ່ວມພັດທະນາຮ່ວມມືການລົງທຶນໃສ່ການ ຄົ້ນຄວ້າພັດທະນາໃຫ້ເພີ່ມຂຶ້ນ ນຳໃຊ້ຜົນການຄົ້ນຄວ້າພັດທະນາວິທະຍາສາດ ແລະ ເຕັກໂນໂລຊີ ເຂົ້າໃນບັນດາໂຄງການລົງທຶນ ທີ່ເປັນຍຸດທະສາດລະດັບຊາດ ໂດຍມີການສົມທົບນຳໃຊ້, ຍົກລະດັບວິທະຍາສາດເຕັກໂນໂລຊີ ແລະ ນະວັດຕະກຳ, ສຸມໃສ່ພັດທະນາພື້ນຖານໂຄງລ່າງ ແລະ ການບໍລິການວິທະຍາສາດ ແລະ ເຕັກໂນໂລຊີ ໃນຂົງເຂດກະສິກຳ, ອຸດສາຫະກຳ ແລະ ການບໍລິການ, ສົ່ງເສີມວິສາຫະກິດຂະໜາດກາງ ທີ່ຕິດພັນກັບຂະແໜງການ ທີ່ມີທ່າແຮງຕາມທິດພັດທະນາແບບຍືນຍົງ ແລະ ສີຂຽວ, ພ້ອມກັນນັ້ນ ກໍເອົາໃຈໃສ່ນຳໃຊ້ເຕັກໂນໂລຊີ ທັນສະໄໝ ເຂົ້າໃນບັນດາຂະ ແໜງການຕ່າງໆເຊັ່ນ: ການເງິນ, ທະນາຄານ, ສຶກສາ ແລະ ສາທາລະນະສຸກ ເພື່ອຫັນເປັນທັນສະໄໝ ໃຫ້ທັນກັບການພັດທະນາຂອງຍຸກສະໄໝໃໝ່.
Editor: ກຳປານາດ ລັດຖະເຮົ້າ
