ໃນວັນທີ 12 ຕຸລາ 2017 ຜ່ານມານີ້, ທີ່ສູນຝືກອົບຮົມ ໂຄງການເກັບກູ້ລະເບີດແຫ່ງຊາດ ບ້ານອີ່ໄລ, ເມືອງນາຊາຍທອງ, ນະຄອນຫຼວງວຽງຈັນ; ໄດ້ມີພິທີ ມອບ-ຮັບ ອາຄານສູນຝືກອົບຮົມ ໃຫ້ແກ່ໂຄງການເກັບກູ້ລະເບີດແຫ່ງຊາດ ( UXO Lao ), ໂດຍການເປັນກຽດເຂົ້າຮ່ວມ ແລະ ກ່າວຮັບຂອງ ທ່ານ ປະລິນຍາເອກ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ທ່ານ ທະເກຊິ ຮິກິ ຮະລະ ເອກອັກຄະລັດຖະທູດ ຍີປຸ່ນ ປະຈຳ ສປປ ລາວ, ຜູ້ຕາງໜ້າອົງການໄຈກ້າ ປະຈຳ ສປປ ລາວ, ມີບັນດາຫົວໜ້າຫ້ອງການ, ອຳນວຍການ, ເຈົ້າເມືອງ, ບັນດາກົມ, ອົງການຈັດຕັ້ງພາຍໃນ ແລະ ຕ່າງປະເທດ , ພະນັກງານ ແລະ ແຂກຖືກເຊີນເຂົ້າຮ່ວມ.
ໂຄງການກໍ່ສ້າງອາຄານສູນຝືກດັ່ງກ່າວແມ່ນຖືກດໍາເນີນໂດຍ ໂຄງການ UXO Lao ຮ່ວມກັບອົງການ ເຈມັສ ( JMAS ) ໂດຍການສະໜັບສະໜູນຈາກລັດຖະບານຍີປຸ່ນ , ໂຄງການແມ່ນເລີ່ມແຕ່ ປີ 2014-2017 ເປັນເວລາ 3 ປີສໍາເລັດ, ສູນຝືກອົບຮົມດັ່ງກ່າວ ປະກອບມີ: ອາຄານຊັ້ນດຽວ ລວມມີ 3 ຫລັງ ພາຍໃນອາຄານມີຫ້ອງຮຽນ, ຫໍພັກ, ຫ້ອງວາງສະແດງ, ຫ້ອງການສູນຝືກ, ເຮືອນຄົວ-ໂຮງອາຫານ, ຫ້ອງນ້ຳ ແລະ ສິງອຳນວຍຄວາມສະດວກອື່ນໆ, ເຊິ່ງລວມມູນຄ່າທັງໝົດ 2 ລ້ານ 5 ແສນ 9 ຫມື່ນໂດລາສະຫະລັດ; ອັນສຳຄັນແມ່ນໂຄງການດັ່ງກ່າວເຮັດໃຫ້ພະນັກງານ ຄກລ ຈຳນວນ 235 ຄົນ ໄດ້ຮັບການຝືກອົບຮົມຫຼັກສູດວິທີຕັດບົ່ມໄດ້ເລື່ອຍໆ .
ພ້ອມນີ້ໂຄງການ ຄກລ ແລະ ອົງການ ເຈມັສ ຍັງໄດ້ຮ່ວມກັນໃນການທົດລອງນໍາໃຊ້ກົນຈັກທຳລາຍລະເບີດລູກຫ່ວານ ທີ່ພວມຈັດຕັ້ງປະຕິບັດ ຢູ່ແຂວງຊຽງຂວາງ ເປັນປີທີ 2 ແລ້ວ, ເຕັກນິກຂອງກົນຈັກນີ້ແມ່ນມີຄວາມທັນສະໄໝ ແລະ ຖືເປັນທຳອິດໃນໂລກ ທີ່ໄດ້ນຳໃຊ້ເຂົ້າໃນການທຳລາຍລະເບີດລູກຫວ່ານ ຢູ່ໃນ ສປປ ລາວ.
ພີິທີດັ່ງກ່າວ ທ່ານ ປອ ຄໍາແພງ ໄຊສົມແພງ ໄດ້ກ່າວມີຄໍາເຫັນວ່າ: ໃນນາມຕາງໜ້າລັດຖະບານ ສປປ ລາວ, ຂໍສະແດງຄວາມຮູ້ບຸນຄຸນຢ່າງລົ້ນເຫຼືອ ແລະ ສະແດງຄວາມຊົມເຊີຍຢ່າງສຸດໃຈ ຕໍ່ ລັດຖະບານຍີປຸ່ນ, ປະຊາຊົນຍີປຸ່ນ, ອົງການ ເຈມັດສ ແລະ ເອກອັກຄະລັດຖະທູດ ຍີປຸ່ນ ປະຈຳ ສປປ ລາວ ທີ່ຍາມໃດກໍ່ໃຫ້ການຊວ່ຍເຫຼືອ ແລະ ສະໜັບສະໜູນ ສປປ ລາວ ຕະຫຼອດມາ ແລະ ຫວັງຢ່າງຍິ່ງວ່າ ລັດຖະບານຍີປຸ່ນ ຈະສືບຕໍ່ຊ່ວຍເຫຼືອ ໂຄງການເກັບກູ້ລະເບີດແຫ່ງຊາດ ໃນການຈັດຕັ້ງປະຕິບັດວຽກງານຊ່ວຍເຫຼືອ ແລະ ເອົາໃຈໃສ່ດຳເນີນໂຄງການໄດ້ຮັບຜົນສຳເລັດຕາມເປົ້າໝາຍທີ່ວາງໄວ້ ໂດຍສະເພາະ 3 ແຂວງພາກໃຕ້ ໃຫ້ມີຜົນສຳເລັດເປົ້າໝາຍ ເພື່ອເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າຂອງລາວຂອບເຂດທົ່ວປະເທດ ໄດ້ມີຊີວິດປອດໄພຈາກລະເບີດບໍ່ທັນແຕກ.
Editor: ກຳປານາດ ລັດຖະເຮົ້າ
