ເນື່ອງໃນໂອກາດວັນສາກົນຕ້ານຢາເສບຕິດຄົບຮອບ 29 ປີ ກະຊວງປ້ອງກັນຄວາມສະຫງົບ ຄະນະກຳມະການແຫ່ງຊາດເພື່ອກວດກາ ແລະຄວບຄຸມຢາເສບຕິດ ໄດ້ຮ່ວມຈັດພິທີຈູດທຳລາຍຢາເສບຕິດຂຶ້ນໃນເມື່ອວັນທີ 25 ມິຖຸນາ 2016 ຢູ່ທີ່ເດີນພະທາດຫຼວງວຽງຈັນ ພາຍໃຕ້ການເປັນປະທານຂອງ ທ່ານທອງລຸນ ສີສຸລິດ ນາຍົກລັດຖະມົນຕີແຫ່ງສາທາລະນະລັດປະຊາທິປະໄຕປະຊາຊົນລາວ ທ່ານ ພົນຕີ ສົມແກ້ວ ສີລາວົງ ລັດຖະມົນຕີ ກະຊວງປ້ອງກັນຄວາມສະຫງົບ ມີບັນດາຜູ້ນຳຂັ້ນສູງ ແລະຜູ້ຕາງໜ້າຈາກກະຊວງປ້ອງກັນຄວາມສະຫງົບ ພ້ອມດ້ວຍຜູ້ຕາງໜ້າອົງການກ່ຽວຂ້ອງເຂົ້າຮ່ວມ

ໃນພິທີອັນມີຄວາມໝາຍຄວາມສຳຄັນ ທ່ານພົນຕີ ສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບ ໄດ້ຂຶ້ນຜ່ານບົດລາຍງານເຖິງສະພາບການປະຕິບັດວຽກງານຮອບດ້ານກ່ຽວກັບການກວດກາ ແລະ ຄວບຄຸມຢາເສບຕິດ ຢູ່ສາທາລະນະລັດປະຊາທິປະໄຕປະຊາຊົນລາວ ໃນໄລຍະໜຶ່ງປີຜ່ານມາ ຢາເສບຕິດທີ່ນຳມາຈູດທຳລາຍ ປະກອບມີດັ່ງນີ້

ຢາບ້າ 4,348,611 ເມັດ (ສີ່ລ້ານສາມແສນສີ່ຫມື່ນແປດພັນຫົກຮ້ອຍສິບເອັດເມັດ) ກັນຊາແຫ້ງ 883 ກິໂລກຣາມ ຢາໄອສ 1.92 ກິໂລກຣາມ ເຮໂລອິນ 34.8 ກິໂລກຣາມ ແປ້ງຝຸ່ນເພື່ອປະສົມຜະລິດຢາເສບຕິດ 105.8 ກິໂລກຣາມ 

ເນື່ອງໃນໂອກາດດັ່ງກ່າວ ທ່ານທອງລຸນ ສີສຸລິດ ນາຍົກລັດຖະມົນຕີແຫ່ງສາທາລະນະລັດປະຊາທິປະໄຕປະຊາຊົນລາວ ກໍ່ໄດ້ໃຫ້ກຽດຂຶ້ນມີຄຳເຫັນສະແດງຄວາມຂອບໃຈ ແລະຍ້ອງຍໍຊົມເຊີຍທຸກພາກສ່ວນໃນທົ່ວສັງຄົມ ພ້ອມທັງບັນດາປະເທດເພື່ອນມິດ ແລະອົງການຈັດຕັ້ງສາກົນທີ່ໄດ້ເຂົ້າຮ່ວມໃນການສະກັດກັ້ນ ແລະການແກ້ໄຂບັນຫາຢາເສບຕິດຢູ່ໃນ ສປປ. ລາວ ຢ່າງໄດ້ຮັບຜົນດີຕະຫຼອດມາ ແລະຍັງໄດ້ໃຫ້ທິດຊີ້ນຳເພື່ອເຮັດໃຫ້ວຽກງານສະກັດກັ້ນ ແລະຕ້ານຢາເສບຕິດໃຫ້ໄດ້ຮັບໝາກຜົນທີ່ດີໃນຊຸມປີຕໍ່ໜ້າ

ໃນພິທີດັ່ງກ່າວ ຄະນະປະທານຢັງໄດ້ຢຽມຊົມການວາງສະແດງຮູບພາບການເຄື່ອນໄຫວວຽກງານຂອງຄະນະກຳມະການແຫ່ງຊາດເພື່ອກວດກາ ແລະຄວບຄຸມຢາເສບຕິດ ແລະຕົວຢ່າງຂອງຢາເສບຕິດທີ່ຍຶດໄດ້ຫລັງຈາກນັ້ນ  ກໍ່ໄດ້ມີການຈູດທຳລາຍຢາເສບຕິດປະເພດຕ່າງໆທີ່ສານໄດ້ຕັດສິນແລ້ວ ເຊິ່ງປະກອບມີຢາບ້າ ກັນຊາແຫ້ງ ຢາໄອສ ເຮໂລອິນ ແປ້ງຝຸ່ນເພື່ອປະສົມຜະລິດຢາເສບຕິດ ແລະອື່ນໆ