ກອງປະຊຸມຄະນະລັດຖະບານ ຮ່ວມກັບເຈົ້າຄອງນະຄອນຫຼວງວຽງຈັນ ແລະບັນດາເຈົ້າແຂວງ ໄດ້ໄຂຂຶ້ນໃນຕອນເຊົ້າຂອງວັນທີ 23 ມິຖຸນາ 2016 ຜ່ານມາ ຢູ່ທີ່ຫ້ອງປະຊຸມລັດຖະບານ ສຳນັກງານນາຍົກລັດຖະມົນຕີ ພາຍໃຕ້ການເປັນປະທານ ຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ. ລາວ ມີບັນດາທ່ານ ຮອງນາຍົກລັດຖະມົນຕີ ສະມາຊິກລັດຖະບານ ເຈົ້າຄອງນະຄອນຫຼວງວຽງຈັນ ແລະບັນດາເຈົ້າແຂວງ ໃນທົ່ວປະເທດເຂົ້າຮ່ວມ
ກອງປະຊຸມຄັ້ງນີ້ ໄດ້ດຳເນີນເປັນເວລາ 2 ວັນເຕັມ ແຕ່ວັນທີ 23 - 24 ມິຖຸນາ ເຊິ່ງໄລະດຳເນີນກອງປະຊຸມແມ່ນຈະໄດ້ຮັບຟັງລາຍງານການຈັດຕັ້ງປະຕິບັດວຽກງານທີ່ສຳຄັນ ຮີບດ່ວນຂອງລັດຖະບານ ແລະທ້ອງຖິ່ນ ເປັນຕົ້ນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນ ແລະແຜນທ້າຍສົກປີ 2015 - 2016 ມາດຕະການເກັບລາຍຮັບ 3 ເດືອນທ້າຍສົກປີ 3 ເດືອນໄລຍະຂ້າມຜ່ານ ແລະການກະກຽມສ້າງແຜນການ-ການເງິນ ປີ 2017 ແຜນການແກ້ໄຂສະພາບຄ່ອງຕົວ ແລະຟື້ນຟູເສດຖະກິດ ໃນສະເພາະໜ້າ ແລະຍາວນານ ການເບີກຈ່າຍເງິນເດືອນງວດ 3 (ເດືອນ 4 ແລະ ເດືອນ 5) 2016 ການຈັດຕັ້ງປະຕິບັດ ແລະຜັນຂະຫຍາຍຄໍາສັ່ງ ເລກທີ 15/ນຍ. ລົງວັນທີ 13 ພຶດສະພາ 2016 ວ່າດ້ວຍການເພີ່ມທະວີເຂັ້ມງວດ ໃນການຄຸ້ມຄອງ ແລະກວດກາການຂຸດຄົ້ນໄມ້ ແລະທຸລະກິດໄມ້ ຮ່າງຄຳສັ່ງ ຂອງນາຍົກລັດຖະມົນຕີ ວ່າດ້ວຍການສ້າງແຂວງເປັນຫົວໜ່ວຍຍຸດທະສາດສ້າງເມືອງ ເປັນຫົວໜ່ວຍເຂັ້ມແຂງຮອບດ້ານ ແລະສ້າງບ້ານເປັນຫົວໜ່ວພັດທະນາ
ໃນໂອກາດກ່າວເປີດກອງປະຊຸມ ທ່ານນາຍົກລັດຖະມົນຕີ ໄດ້ຮຽກຮ້ອງໃຫ້ບັນດາທ່ານທີ່ເຂົ້າຮ່ວມກອງປະຊຸມໃນຄັ້ງນີ້ ຈົ່ງຍົກສູງຄວາມຮັບຜິດຊອບໃນການປະກອບຄຳຄິດເຫັນ ເຂົ້າໃສ່ແຕ່ລະຫົວຂໍ້ ແລະຕໍ່ແຕ່ລະບັນຫາ ໂດຍຍົກໃຫ້ເຫັນສະພາບຂອງການຈັດຕັ້ງປະຕິບັດ ຂໍ້ສະດວກ ຂໍ້ຫຍຸ້ງຍາກ ແລະມາດຕະການແກ້ໄຂດ້ວຍລັກສະນະສັງເຂບ ແລະຖືກຈຸດ
