ກອງປະຊຸມຄົບຄະນະບໍລິຫານງານ ສູນກາງຊາວໜຸ່ມປະຊາຊົນປະຕິວັດລາວ ຄັ້ງທີ 2 ສະໄໝ VII. ດຳເນີນຂື້ນພາຍໃຕ້ຄຳຂວັນ “ຕັ້ງໜ້າຈັດຕັ້ງປະຕິບັດ ວຽກງານຊາວໝຸ່ມ-ເຍົາວະຊົນດ້ວຍຄວາມເຄັ່ງຮ້ອນ, ສ້າງບັນໃດທຳອິດໃຫ້ແຂ່ງແກ່ນເພື່ອກ້າວສູ່ຄາດໝາຍທີ່ວາງໄວ້” ກອງປະຊຸມແມ່ນຈັດຂຶ້ນເມື່ອວັນທີ 27 ມິຖຸນາ 2016 ທີ່ນະຄອນຫລວງວຽງຈັນ ໂດຍການເປັນກຽດເຂົ້າຮ່ວມຂອງທ່ານ ພັນຄຳ ວິພາວັນ ຮອງປະທານປະເທດ ແຫ່ງສາທາລະນະລັດປະຊາທິປະໄຕປະຊາຊົນລາວ ແລະການເປັນປະທານຂອງທ່ານ ສອນທະນູ ທຳມະວົງ ເລຂາຄະນະ ບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ພ້ອມດ້ວຍຄະນະບໍລິຫານງານ ພະນັກງານ ແລະ ແຂກຖືກເຊີນ ເຂົ້າຮ່ວມ
ກອງປະຊຸມຄົບຄະນະຄັ້ງນີ້ ໄດ້ສຸມໃສ່ຄົ້ນຄວ້າປະກອບຄຳຄິດເຫັນສະຫລຸບຕີລາຄາການເຄື່ອນໄຫວຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນຊາວໜຸ່ມ ທົ່ວປະເທດ ຄັ້ງທີ VII ໃນໄລຍະ 6 ເດືອນຕົ້ນປີ ສາມາດເຄື່ອນໄຫວປະຕິບັດວຽກງານໃນແຕ່ລະດ້ານເປັນຕົ້ນໄດ້ສຶກສາອົບຮົມການເມືອງແນວຄິດນັບທັງສູນກາງ ແລະທ້ອງຖິ່ນ ໄດ້ເຊື່ອມຊຶມ ແລະຜັນຂະຫຍາຍມະຕິກອງປະຊຸມໃຫຍ່ ຜູ້ແທນຊາວໜຸ່ມ ທົ່ວປະເທດ ຄັ້ງທີ VII ຢ່າງເປັນເຈົ້າການ ແລະທິດທາງແຜນການ 1 ປີ ຕໍ່ໜ້າ ພ້ອມຮັບຟັງການຈັດຕັ້ງຜັນຂະຫຍາຍແຜນພັດທະນາຊາວໜຸ່ມ-ເຍົາວະຊົນ ຄັ້ງທີ I ການສະຫລຸບຕີລາຄາຂະບວນການແຂ່ງຂັນ 4 ບຸກ ຂອງຊາວໜຸ່ມ ແລະ ການປັບປຸງແຈ້ງການການປັບປຸງ 4 ບຸກ ການແນະນຳກ່ຽວກັບການຈັດຕັ້ງປະຕິບັດກົດລະບຽບຂອງຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ແລະກົດໝາຍເຍົາວະຊົນທັນວາ ຜ່ານຮ່າງມະຕິການແບ່ງງານ ແບ່ງຄວາມຮັບຜິດຊອບຂອງຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ຊຸດທີ VII ຮ່າງບົດແນະນຳກ່ຽວກັບວຽກງານປົກປ້ອງສິດ ຜົນປະໂຫຍດຂອງຊາວໜຸ່ມ-ເຍົາວະຊົນ ຮ່າງພາລະບົດບາດຂອງສູນກາງຊາວໜຸ່ມປະຊາຊົນປະຕິວັດລາວ ຮ່າງພາລະບົດບາດຂອງຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ກະຊວງ-ອົງການ ບັນດາເອກະສານກ່ຽວກັບໂຄງການຂອງຊາວໜຸ່ມປະຊາຊົນ ປະຕິວັດລາວ
ໃນຕອນທ້າຍຂອງກອງປະຊຸມ ທ່ານຄຳພັນ ວິພາວັນ ຍັງໄດ້ເນັ້ນໃຫ້ຄະນະຊາວໜຸ່ມປະຊາຊົນປະຕິວັດລາວ ເອົາໃຈໃສ່ເປັນພິເສດໃນການສຶກສາອົບຮົມແນວຄິດການເມືອງ ວັດທະນະທຳ ແລະມູນເຊື້ອແນວທາງນະໂຍບາຍຂອງພັກ ແລະນຳພາຂະບວນການເຄື່ອນໄຫວຕ່າງໆ ຂອງຊາວໜຸ່ມໃຫ້ມີຄວາມຟົດຟື້ນແຂງແຮງສືບຕໍ່ຜັນຂະຫຍາຍແຜນງານພັດທະນາວຽກງານຊາວໜຸ່ມ ແລະເຍົາວະຊົນເປັນຂະບວນກວ້າງຂວາງ ແລະຕໍ່ເນື່ອງ ເລັ່ງໃສ່ສ້າງຕົວແບບຂອງ ຊາວໜຸ່ມຮຽນດີ ຮຽນເກັ່ງ ເຮັດວຽກວິຊາສະເພາະດີເດັ່ນ ສ້າງເສດຖະກິດ ແກ້ໄຂຊີວິດການເປັນຢູ່ໃຫ້ດີຂຶ້ນ ຊ່ວຍເຫລືອສັງຄົມ ແລະອື່ນໆ
