ໃນວັນທີ 13 ກໍລະກົດ  2016 ທີ່ຜ່ານມາ ຢູ່ທີ່ສຳນັກງານສູນກາງສະຫະພັນແມ່ຍິງລາວ ໄດ້ຈັດງານຖະແຫລງ່າວ ເພື່ອກະກຽມສະເຫລີມສະຫລອງວັນສ້າງຕັ້ງສະຫະພັນແມ່ຍິງລາວ ຄົບຮອບ 61 ປີ ແລະກຽມກອງປະຊຸມອົງຄະນະພັກ ສູນກາງສະຫະພັນແມ່ຍິງລາວຄັ້ງທີ 3 ເຊິ່ງຈະໄດ້ຈັດຂື້ນໃນໄວໄວນີ້ 

ທ່ານນາງອິນລາວັນ ແກ້ວບຸນພັນ ກຳມະການສູນກາງພັກ ປະທານຄະນະບໍລິຫານສູນກາງສະຫະພັນແມ່ຍິງລາວ ໄດ້ກ່າວໃນພິທີຖະແຫລງວ່າ ເພື່ອເປັນການກະກຽມຄວາມພ້ອມໃຫ້ແກ່ການສະເຫລີມສະຫລອງ 61 ປີ  ແຫ່ງການສ້າງຕັ້ງສະຫະພັນແມ່ຍິງລາວ ໃຫ້ມີເນື້ອໃນຄວາມຫມາຍເລີກເຊີ່ງ ແລະເປັນຂະບວນການກວ້າງຂວາງໃນທົ່ວປະເທດ  ຄະນະປະທານສູນກາງສະຫະພັນແມ່ຍິງລາວ ໄດ້ສ້າງເປັນແຜນງານແຜນກິດຈະກຳລະອຽດ ຄື 

ໄດ້ອອກແຈ້ງການເຖິງຄະນະບໍລິຫານງານສູນກາງສະຫະພັນແມ່ຍິງລາວ ຄະນະປະທານສະຫະພັນແມ່ຍິງກະຊວງ ແລະອົງການຈັດຕັ້ງສູນກາງນະຄອນຫລວງ ແລະແຂວງ ກ່ຽວກັບການສະເຫລີມສະຫລອງວັນສ້າງຕັງອົງການຈັດຕັ້ງສະຫະພັນແມ່ຍິງລາວ ຄົບຮອບ 61 ປີ ໃຫ້ມີເນື້ອໃນ ແລະບັນຍາກາດທີ່ພົດພື້ນ ຕິດພັນກັບການສະຫລຸບຕີລາຄາການພັດທະນາແມ່ຍິງກັບວິຊາສະເພາະ 

ແຕ່ງຕັ້ງຄະນະຮັບຜິດຊອບສະເຫລີມສະຫລອງວັນສ້າງຕັງອົງການຈັດຕັ້ງສະຫະພັນແມ່ຍິງລາວຄົບຮອບ 61 ປີ ສຳເລັດໂດຍພື້ນຖານ 

ຊຸກຍູ້ຂະບວນການອົບຮົມການເມືອງແນວຄິດ ການແຂ່ງຂັນຂະບວນການ 3 ດີ ຕິດພັນກັບຂະບວນການປະຕິບັດວຽກງານວິຊາສະເພາະຂອງແຕ່ລະຄົນ 

ປັບປຸງກົງຈັກການຈັດຕັ້ງການຊີ້ນຳນຳພາແບບແຜນການເຮັດວຽກ ຂະບວນການປະກອບສ່ວນພັດທະນາເສດຖະກິດສັງຄົມ  ແກ້ໄຂຄວາມທຸກຍາກ ແນໃສ່ປະຕິບັດສິດສະເຫມີພາບ ລະຫວ່າງ ຍີງຊາຍ ຢ່າງແທ້ຈິງ 

ສິ່ງທີ່ພົ້ນເດັ່ນແມ່ນການຊຸກຍູ້ການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງ ກັບຂະບວນການຮັກຊາດ ແລະພັດທະນາ  ຂະບວນການພັດທະນາຮອບດ້ານຂອງສະຫະພັນແມ່ຍິງໃນທົ່ວປະເທດ ເຊິ່ງມີຫລາຍບ້ານຫລາຍເມືອງ ແລະຫລາຍແຂວງ ໄດ້ກາຍເປັນຕົວແບບ ແລະຖືກສະເຫນີໃຫ້ໄດ້ທຸງໄຊ ຂອງສະຫະພັນແມ່ຍິງ 

ສ້າງກິດຈະກຳໂຄສະນາປະຫວັດສາດ ມູນເຊື້ອ ຜົນງານ ແລະການເຕີບໃຫຍ່ຂອງສະຫະພັນແມ່ຍິງລາວ ຕິດພັນກັບຂະບວນການລວມຂອງຊາດຂອງພັກ ໂດຍຜ່ານສື່ມວນຊົນເປັນພາຫານະໂຄສະນາໃຫ້ກວ້າງຂວາງ ແລະເຂົ້າເຖິງກຸ່ມເປົ້າຫມາຍ 

ພ້ອມນັ້ນຍັງໄດ້ຈັດການປະເມີນການຈັດຕັ້ງປະຕິບັດວຽກງານ (ວິຊາສະເພາະ) ກວດກາສະມາຊິກພັກເຂັ້ມແຂງ ຫນ່ວຍຮູ້ນຳພາຮອບດ້ານ  

ຜ່ານມາ ຕໍ່ກັບຂະບວນການດັ່ງກ່າວ ຄະນະຮັບຜິດຊອບໄດ້ຈັດໃຫ້ມີສຳພາດ ອະນຸກຳມະການໃນການກຽມພ້ອມເພື່ອສະເຫລີມສະຫລອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄຽງຄູ່ກັນນັ້ນ ຍັງໄດ້ມີການຈັດກິດຈະກຳບໍລິຈາກເລຶອດຢູ່ທີ່ສູນບໍລິຈາກເລຶອດແຫ່ງຊາດ ແຂ່ງຂັນກິລາສາມັກຄີພາຍໃນ 3 ອົງການຈັດຕັ້ງມະຫາຊົນ ພາຍໃນ ສູນກາງສະຫະພັນແມ່ຍິງລາວ ແລະໃນວັນທີ 15 ກໍລະກົດ 2016 ຢູ່ທີ່ຫໍວັດທະນະທຳແຫ່ງຊາດ ນະຄອນຫລວງວຽງຈັນ ຍັງໄດ້ມີພິທີໂຮງຊຸມນຸມ ເພື່ອສະເຫລີມສະຫລອງວັນສ້າງຕັ້ງ ສະຫະພັນແມ່ຍິງລາວ ຄົບຮອບ 61 ປີ ຢ່າງຟົດຟື້ນ