ພິທີດັ່ງກ່າວໄດ້ມີຂຶ້ນໃນວັນທີ 15 ກຸມພາ 2018 ຜ່ານມາ ຢູ່ທີ່ຫ້ອງປະຊຸມຄະນະກວດກາພັກ-ລັດ ແຂວງວຽງຈັນ ໂດຍການເປັນກຽດເຂົ້າຮ່ວມຂອງ ທ່ານນາງ ສຸກສະຫວັນ ພະຈອມພົນ ຮອງປະທານສະຫະພັນແມ່ຍິງ ແຂວງວຽງຈັນ, ມີ ທ່ານ ຈັນແປງ ດວງພະຈັນ ກໍາມະການພັກແຂວງ ເລຂາຫນ່ວຍພັກ ຫົວຫ້າຄະນະໂຄສະນາອົບຮົມ ແຂວງວຽງຈັນ, ມີບັນດາປະທານຫນ່ວຍສະຫະພັນແມ່ຍິງອ້ອມຂ້າງ ແລະ ສະມາຊິກແມ່ຍິງ ພາຍໃນໜ່ວຍສະຫະພັນແມ່ຍິງຄະນະໂຄສະນາອົບຮົມ ແຂວງວຽງຈັນເຂົ້າຮ່ວມ.

ທ່ານ ນາງ ມະນີຈັນ ທຳມະໂຄດ ຫົວຫນ້າ ໜ່ວຍສະຫະພັນແມ່ຍິງ ຄະນະໂຄສະນາອົບຮົມ ແຂວງວຽງຈັນ ໄດ້ຂຶ້ນຜ່ານບົດສະຫລຸບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີ ຄະນະພັກກໍຄືຄະນະຊີ້ນຳການຈັດຕັ້ງປະຕິບັດວຽກງານ 3 ດີໄດ້ເອົາໃຈໃສ່ຈັດຕັ້ງປະຕິບັດວຽກງານຢ່າງເຕັມເມັດເຕັມໜ່ວຍ ມີຄວາມຮັບຮູ້ເຂົ້າໃຈຕື່ນຕົວ ແລະ ຫ້າວຫັນຜ່ານຜ່າຄວາມຫຍຸ້ງຍາກຕັ້ງຫນ້າປະກອບສ່ວນເຂົ້າໃນວຽກງານວິຊາສະເພາະທີ່ທາງຂັ້ນເທິງໄດ້ມອບຫມາຍໃຫ້ ມີຄວາມເອົາໃຈໃສ່ໃນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີ ມີຄວາມອຸນອຽນທຸ່ນທ່ຽງເຊື່ອຫມັ້ນຕໍ່ການຊີ້ນຳ-ນຳພາຂອງພັກ ມີທັດສະນະຖືກຕ້ອງຮັກສາຮີດຄອງປະເພນີອັນດີງາມ ເຮັດໃຫ້ໜ່ວຍແມ່ຍິງຄະນະໂຄສະນາອົບຮົມສາມາດຕີລາຄາປະເມີນຜົນບັນລຸໄດ້ຕາມມາດຖານ ແລະ ເງື່ອນໄຂ ສາມາດຮັບຮອງເປັນໜ່ວຍແມ່ຍິງ 3 ດີ ໃນໂອການີ້ຍັງໄດ້ມອບໃບຍ້ງຍໍ ແລະ ໃບຢັ້ງຢືນເປັນໜ່ວຍແມ່ຍິງ 3 ດີ ໃຫ້ແກ່ໜ່ວຍສະຫະພັນແມ່ຍິງ ຄະນະໂຄສະນາອົບຮົມ ແຂວງວຽງຈັນ ເປັນກຽດຂຶ້ນມອບໂດຍ ທ່ານນາງ ສຸກສະຫວັນ ພະຈອມພົນ ຮອງປະທານສະຫະພັນແມ່ຍິງ ແຂວງວຽງຈັນ ແລະ ເປັນກຽດຂຶ້ນຮັບຂອງ ທ່ານນາງ ມະນີຈັນ ທຳມະໂຄດ ຫົວຫນ້າຫນ່ວຍສະຫະພັນແມ່ຍິງຄະນະໂຄສະນາອົບຮົມ ແຂວງວຽງຈັນ

ທີມຂ່າວ ແຂວງວຽງຈັນ

Editor: ກຳປານາດ ລັດຖະເຮົ້າ