ໃນວັນທີ 21 ກຸມພາ 2018 ຜ່ານມາ ແຂວງວຽງຈັນ ໄດ້ຈັດກອງປະຊຸມເຜີຍແຜ່ເຊື່ອມຊຶມ, ແນະນຳກ່ຽວກັບວຽກງານກໍ່ສ້າງພັກ ແລະ ວຽກງານຄຸ້ມຄອງພະນັກງານ ຂື້ນ ຢູ່ທີ່ສະໂມສອນໃຫຍ່ຂອງແຂວງ ໂດຍພາຍໃຕ້ການເປັນປະທານຂອງ ສະຫາຍ ວິດົງ ໄຊຍະສອນ ກຳມະການສູນກາງພັກ ເລຂາພັກແຂວງ ເຈົ້າແຂວງໆວຽງຈັນ ເຂົ້າຮ່ວມມີບັນດາທ່ານໃນຄະນະປະຈໍາ, ກໍາມະການພັກແຂວງ ແລະ ບັນດາທ່ານການນຳຂອງເມືອງເຂົ້າຮ່ວມ.
ກອງປະຊຸມໃນຄັ້ງນີ້ ແມ່ນໄດ້ພ້ອມກັນຮັບຟັງ ມະຕິຂອງກົມການເມືອງສູນກາງພັກ ເລກທີ 032/ກມສພ ລົງວັນທີ 3 ມັງກອນ 2018 ວ່າດ້ວຍ : ວຽກງານສ້າງແຜນກຳນົດພະນັກງານນຳພາ - ຄຸ້ມຄອງ, ມະຕິຂອງກົມການເມືອງສູນກາງພັກເລກທີ 030/ກມສພ ລົງວັນທີ 3 ມັງກອນ 2018 ວ່າດ້ວຍ: ມາດຕະຖານ ຂອງພະນັກງານນຳພາ - ຄຸ້ມຄອງ, ມະຕິຂອງກົມການເມືອງສູນກາງພັກ ເລກທີ 031/ກມສພ ລົງວັນທີ 3 ມັງກອນ 2018 ວ່າດ້ວຍ : ວຽກງານຄຸ້ມຄອງພະນັກງານ ແລະ ຄຳສັ່ງຂອງກົມການເມືອງສູນກາງພັກສະບັບເລກທີ 01/ກມສພ ລົງວັນທີ 3 ມັງກອນ 2018 ວ່າດ້ວຍ : ການເພີ່ມທະວີການກໍ່ສ້າງຫນ່ວຍພັກປອດໃສ,ເຂັ້ມແຂງ, ຫນັກແຫນ້ນ.
ຈຸດປະສົງ ຂອງການເຜີຍແຜ່ໃນຄັ້ງນີ້ ກໍເພື່ອເປັນການຈັກຕັ້ງປະຕິບັດວຽກງານກໍ່ສ້າງພັກ - ພະນັກງານ ເພື່ອຮັບປະກັນໃຫ້ແກ່ການຈັດຕັ້ງປະຕິບັດວຽກງານໃນທົ່ວແຂວງວຽງຈັນ, ໃຫ້ມີບາດກ້າວ ຂະຫຍາຍຕົວ ແລະ ເຂັ້ມແຂງ ໃນການສ້າງແຜນກຳນົດພະນັກງານເປັນວຽກງານພື້ນຖານທີ່ສຳຄັນ, ຮັບປະກັນໃນການຫັນວຽກພະນັກງານ ດຳເນີນຕາມລະບຽບແບບແຜນ ເພື່ອຕອບສະໜອງໜ້າທີ່ການເມືອງຂອງພັກ - ລັດ ໃນສະເພາະໜ້າ ແລະ ຍາວນານ, ເປັນການຫັນຍຸດທະສາດກ່ຽວກັບວຽກງານພະນັກງານເປັນອັນລະອຽດ, ສ້າງໂຄງການສັງລວມພື້ນຖານໃຫ້ແກ່ການສ້າງແຜນກໍ່ສ້າງບໍາລຸງຄາດຄະເນຊັບຊ້ອນ ແລະ ຈັດວາງພະນັກງານຢ່າງສົມເຫດສົມຜົນ ເຂົ້າໃນຕໍາແໜ່ງນຳພາຄຸ້ມຄອງແຕ່ລະຂັ້ນ, ແຕ່ລະຂະແໜງການ ແນໃສ່ຮັບປະກັນລັກສະນະສືບທອດປ່ຽນແທນໃຫ້ໄດ້ທາງດ້ານຈໍານວນ ແລະ ຄຸນນະພາບ ເພື່ອພ້ອມກັນຈັດຕັ້ງປະຕິບັດແຜນພັດທະນາເສດຖະກິດ - ສັງຄົມ ແລະ ການຫັນປະເທດເປັນອຸດສະຫະກຳ ແລະ ທັນສະໄໝແນໃສ່ສ້າງສາປະເທດຊາດຕາມຈຸດໝາຍສັງຄົມນິຍົມ ເພື່ອຍົກສູງຄວາມສາມາດນໍາພາຂອງພັກຕອບສະໜອງໄດ້ຄວາມເລັ່ງທວງຂອງການພັດທະນາປະເທດຊາດໃນເງື່ອນໄຂ ແລະ ສະພາບແວດລ້ອມໃໝ່ ພັກເຮົາຕ້ອງມີຄວາມຈໍາເປັນໃນການກໍ່ສ້າງໜ່ວຍພັກ, ຄະນະພັກ ແລະ ສະມາຊິກພັກໃຫ້ມີຄວາມສາມາດນໍາພາຈັດຕັ້ງປະຕິບັດໜ້າທີ່ການເມືອງຂອງພັກ ແລະ ແຜນພັດທະນາເສດຖະກິດ ຂອງລັດວາງອອກແຕ່ລະໄລຍະ ໃຫ້ປະກົດຜົນເປັນຈິງ ແລະ ອີກດ້ານໜື່ງ ກໍເພື່ອເປັນການສືບຕໍ່ເສີມຂະຫຍາຍມູນເຊື້ອ ແລະ ຜົນງານອັນໂດດເດັ່ນດ້ານດີ, ເດັດດ່ຽວປັບປຸງແກ້ໄຂຂໍ້ຄົງຄ້າງ ທີ່ເປັນໄພອັນຕະລາຍ ຕໍ່ພັກເພື່ອເຊີດຊູບົດບາດຄວາມສາມາດນໍາພາ ແລະ ຍົກສູງຄວາມເປັນແບບຢ່າງນໍາໜ້າໃຫ້ພັກເຮົາປອດໃສເຂັ້ມແຂງ ແລະ ໜັກແໜ້ນ
ແຫລ່ງຂ່າວຈາກ ທີມຂ່າວ ແຂວງວຽງຈັນ
Editor: ກຳປານາດ ລັດຖະເຮົ້າ
