ລັກສະນະ ຖ້ຳນ້ຳລອດເຊບັ້ງໄຟ ພາຍໃນເປັນຫ້ອງໂຖງຂະຫນາດໃຫຍ່ ແລະ ມີຄວາມສວຍງາມຫນ້າປະທັບໃຈ ແລະ ຫນ້າອັດສະຈັນທີ່ສຸດ, ພາຍໃນຖ້ຳແມ່ນມີລັກສະນະໂຄ້ງກົ່ງ-ສູງ, ມີຂະຫນາດກວ້າງຂວາງ ນັກສຳຫລວດໄດ້ເອີ້ນຊື່ພາຍໃນຫ້ອງໂຖງນີ້ວ່າ: ຫໍວິຫານ, ມີທັງຫີນງອກ ຂະຫນາດໃຫຍ່ຕັ້ງໃກ້ກັບປາກຖ້ຳ. ພາຍໃນຖ້ຳແຫ່ງນີ້ ແມ່ນຖືກຕົບແຕ່ງດ້ວຍທຳມະຊາດຢ່າງສວຍສົດງົດງາມ, ເປັນຕົ້ນ ຫີນທີ່ມີລັກສະນະຄ້າຍຄືກັບຕົ້ນໄມ້ ມີຄວາມຍາວຕິດຕໍ່ກັນ ຍາວເຖິງ 3 ກີໂລແມັດ. ສ່ວນທາງບໍລິເວນປາກຖ້ຳເບື້ອງລຸ່ມມີກ້ອນຫີນຮູບ 4 ຫລ່ຽມ ເອີ່ນວ່າ: ຫີນໄຂມຸກ ຍັງຍາຍຕາມພື້ນຖ້ຳ, ຫີນດັ່ງກ່າວເກີດຈາກການສະສົມຂອງທາດຫີນປູນໂຮມກັນເປັນອ່າງ, ເປັນລອກລອກ. ຖ້ຳນ້ຳລອດເຊບັ້ງໄຟ ແມ່ນມີຄວາມສວຍງາມ ແລະ ເຕັມໄປດ້ວຍສິ່ງໃຫຍ່ໂຕ ມະໂຫຖານເປັນພິເສດ ເຊັ່ນ: ກາບຂອງຫີນປູນຂະຫນາດໃຫຍ່ ແລະ ຫີນງອກ ທີ່ງົດງາມ. ຈົນບໍ່ສາມາດບັນລະຍາຍ
ຖ້ຳດັ່ງກ່າວ ໄດ້ຖືກສຳຫລວດຄັ້ງທຳອິດ ໃນປີ ຄສ 1905 ຫລື 100 ກວ່າປີຜ່ານມາ, ເບື່ອງຕົ້ນໄດ້ມີນັກສຳຫລວດຊາວຝຣັ່ງ ໄດ້ໃຊ້ໄມ້ໄຜ່ເຮັດເປັນເຮືອແພ ເພື່ອລ່ອງເຂົ້າໄປສຳຫລວດພາຍໃນຖ້ຳ ແຕ່ກໍ່ໄດ້ພຽງຂໍ້ມູນເລັກນ້ອຍເທົ່ານັ້ນ. ຕໍ່ມາໃນປີ 1995 ໄດ້ມີທີມນັກສຳຫລວດຈາກປະເທດຝຣັ່ງ ໄດ້ກັບມາສຳຫລວດຄັ້ງໃຫມ່, ໄດ້ພຽງແຕ່ຂໍ້ມູນສ່ວນຫນຶ່ງ ແລະ ການສຳຫລວດຍັງບໍ່ທັນສຳເລັດ. ມາໃນປີ 2006 ທ່ານ ຈອນໂພເລັກ ຊ່ຽວຊານດ້ານຖ້ຳ ໄດ້ນຳພາທີມງານຂອງລາວ ເຂົ້າໄປສຳຫລວດພາຍໃນຖ້ຳ ຈິ່ງຮູ້ວ່າ ຖ້ຳນີ້ມີຄວາມໃຫຍ່ຫລາຍ ແລະ ມີຄວາມສວຍງາມຫລາຍ ຈິ່ງຮູ້ວ່າ ຖ້ຳນີ້ມີຄວາມຍາວທັງໝົດ 11. ກິໂລແມັດ ເປັນຖ້ຳທີ່ມີສາຍນ້ຳເຊບັ້ງໄປໄຫລຜ່ານ.
ສະຖານທີ່ຖ້ຳນ້ຳລອດເຊບັ້ງໄຟ ໄດ້ເປີດໃຫ້ເປັນສະຖານທີ່ທ່ອງທ່ຽວຢ່າງເປັນທາງການ ໃນ ປີ 2013 ເພື່ອເປັນການດຶງດູດ ແລະ ເປີດປະຕູຕ້ອນຮັບເອົານັກທ່ອງທ່ຽວຈາກຕ່າງປະເທດ ແລະ ພາຍໃນ ໄດ້ເຂົ້າໄປທ່ຽວຊົມ ແລະ ສຳຜັດກັບຄວາມງາມອັນມະຫັດສະຈັນ ທີ່ເປັນຂອງຂວັນ ຈາກທຳມະຊາດ ສ້າງໄວ້ ໃຫ້ໄດ້ເຫັນເຖິງຄຸນຄ່າຄວາມສວຍສົດງົດງາມຢ່າງຫນ້າອັດສະຈັນ.
Editor: ກຳປານາດ ລັດຖະເຮົ້າ
