ໃນອາທິດຜ່ານມານີ້ ສະມາຊິກສະພາແຫ່ງຊາດ ເຂດເລືອກຕັ້ງທີ 13 ມີທ່ານ ດຣ ບຸນຂວາງ ຄໍາບຸນເຮືອງ, ທ່ານ ນາງ ຄໍາເພັງ ວິໄລທອງ ສະພາປະຊາຊົນແຂວງສະຫວັນນະເຂດ, ເຂດເລືອກຕັ້ງເມືອງຊົນນະບູລີ, ມີທ່ານ ສຸວິໄລ ຫຼວງຊະລາດ ຫົວໜ້າຄະນະຈັດຕັ້ງເມືອງ, ທ່ານ ພູຂົງ ພັນທະວະດີ ຫົວໜ້າຫ້ອງການແຜນການ ແລະ ການລົງທຶນເມືອງ.
ການລົງເຄື່ອນໄຫວພົບປະໂອ້ລົມກັບອໍານາດການປົກຄອງທ້ອງຖິ່ນຢູ່ເຂດເມືອງຊົນນະບູລີ ແຂວງສະຫວັນນະເຂດ ຊຶ່ງມີ 4 ຈຸດຄື: ເຂດຈຸດສຸມຕັ້ງຫວາຍລໍາທວາຍ, ຈຸດສຸມນາມີໄຊ, ບ້ານກະລືມວັງແຂ້, ບ້ານດົງໜອງແຄນ, ໂດຍມີອໍານາດການປົກຄອງພໍ່ແມ່ປະຊາຊົນເຂດດັ່ງກ່າວໃຫ້ການຕ້ອນຮັບຢ່າງອົບອຸ່ນ. ແຕ່ລະຈຸດ ແມ່ນໄດ້ຜັດປ່ຽນກັນຂຶ້ນເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ VIII ແລະ ສະພາປະຊາຊົນແຂວງຊຸດທີ I ໃຫ້ກັບພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ຕໍ່ກັບເນື້ອໃນທີ່ໄດ້ຜັນຂະຫຍາຍໃນຄັ້ງນີ້ ມະຕິກອງປະຊຸມສະພາແຫ່ງຊາດວ່າດ້ວຍການຮັບຮອງເອົາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ, ຄາດຄະເນໝົດປີ 2017 ແລະ ແຜນປີ 2018, ມະຕິກອງປະຊຸມສະພາແຫ່ງຊາດວ່າດ້ວຍການຮັບເອົາບົດລາຍງານກວດສອບບົດສະຫຼຸບຂາດຕົວ ແລະ ການຈັດຕັ້ງປະຕິບັດແຜນງົບປະມານແຫ່ງລັດ ສົກປີ 2015-2016 ແລະ ມະຕິຕ່າງໆ, ນອກນັ້ນ ຍັງມີກົດໝາຍສ້າງໃໝ່ຈໍານວນ 8 ສະບັບ. ພ້ອມທັງໄດ້ຮັບຟັງການສະເໜີ ແລະ ຄວາມຮຽກຮອງຕ້ອງການຂອງປະຊາຊົນໃນຫຼາຍດ້ານ ຊຶ່ງສະມາຊິກສະພາແຫ່ງຊາດ ແລະ ສະພາປະຊາຊົນແຂວງ ກໍ່ໄດ້ຊີ້ແຈງອະທີບາຍຢ່າງລະອຽດ ໃນການສະເໜີບາງບັນຫາໃຫ້ປະຊາຊົນໄດ້ເຂົ້າໃຈເຖິງນະໂຍບາຍຂອງພັກ-ລັດ ໃນການພັດທະນາເສດຖະກິດ-ສັງຄົມ ເຊິ່ງບັນຫາໃດຫາກແຕະຕ້ອງສິດຜົນປະໂຫຍດຂອງປະຊາຊົນ ແລະ ບໍ່ສາມາດຕອບຂໍ້ຂ້ອງໃຈກັບທີ່ ແມ່ນຈະໄດ້ນໍາໄປສະເໜີໄປຍັງພາກສວນກ່ຽວຂ້ອງ ເພື່ອຊອກຫາທາງແກ້ໄຂຕື່ມ.
ນອກຈາກນັ້ນ ກໍ່ໄດ້ນໍາເອົາປຶ້ມຕໍາລາຮຽນຊັ້ນປະຖົມຈໍານວນ 110 ຫົວ, ມອບໃຫ້ໂຮງຮຽນໃນເຂດບ້ານດັ່ງກ່າວ, ແລະ ຜ້າຫົມ ຈໍານວນ 200 ຜືນ, ແຈກຍ້າຍໃຫ້ກັບຄອບຄົວຜູ້ທີ່ຂາດເຂີນ ແລະ ແນວພັນປູກ ຈໍານວນ 150 ກະປ໋ອງ, ແຈກຍ້າຍໃຫ້ກັບປະຊາຊົນເພື່ອນໍາໄປເພາະປູກນຳອີກດ້ວຍ.
Editor: ເມືອງຊົນນະບູລີ
