ປັດຈຸບັນ ມີອົງການຈັດຕັ້ງສາກົນ ທີ່ບໍ່ສັງກັດ ລັດຖະບານ (INGOs) ທັງໝົດ 159 ອົງການ ທີ່ໄດ້ຮັບອະນຸມັດມາປະຕິບັດງານຢູ່ ສປປ ລາວ ແລະ ພວມຈັດຕັ້ງ ປະຕິບັດໂຄງການຢູ່ໃນຂອບເຂດ ທົ່ວປະເທດ, ເຊິ່ງການຊ່ວຍເຫລືອ ໃນໄລຍະ ປີ 2015 ຮອດປັດຈຸບັນ ໄດ້ມີການອະນຸມັດ 313 ໂຄງການ ແລະ 44 ກິດຈະການ ລວມມູນຄ່າທັງໝົດ 376.277.948 ໂດລາສະຫະລັດ, ໂດຍກວມເອົາ ຫລາຍຂະແໜງການ ເຊັ່ນ: ຂະແໜງ ສະຫວັດດີການ-ສັງຄົມ ກວມເອົາປະມານ 33% (ພັດທະນາຊົນນະບົດ, ເກັບກູ້ລະເບີດ, ຄົນພິການ ແລະ ໄພສຸກເສີນ), ຂະແໜງ ສຶກສາທິການ ແລະ ກິລາ ກວມເອົາປະມານ 25%, ຂະແໜງ ສາທາລະນະສຸກກວມເອົາປະມານ 24% ແລະ ຂົງເຂດກະສິກຳ ກວມເອົາປະມານ 17%
ໃນວັນທີ 28 ກຸມພາ 2018, ທີ່ ນະຄອນຫລວງວຽງຈັນ ກະຊວງ ການຕ່າງປະເທດ ໄດ້ຈັດກອງປະຊຸມ ທົບທວນຄືນການຮ່ວມມື ລະຫວ່າງ ລັດຖະບານ ແຫ່ງ ສປປ ລາວ ກັບ ອົງການຈັດຕັ້ງສາກົນ ທີ່ບໍ່ສັງກັດລັດຖະບານ ຄັ້ງທີ III ຂຶ້ນ, ໂດຍການເປັນປະທານ ຂອງ ທ່ານ ສະເຫລີມໄຊ ກົມມະສິດ, ລັດຖະມົນຕີ ກະຊວງການຕ່າງປະເທດ, ມີຄະນະຜູ້ແທນຂັ້ນສູງ ຈາກຂະແໜງການ ແລະ ທ້ອງຖິ່ນ ຂອງ ສປປ ລາວ, ອົງການຈັດຕັ້ງສາກົນ ທີ່ບໍ່ສັງກັດລັດຖະບານ, ບັນດາປະເທດໃຫ້ທຶນ, ອົງການ ຈັດຕັ້ງສາກົນ, ສະມາຄົມ ແລະ ມູນນິທິຂອງລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ. ນັບແຕ່ປີ 2015 ເປັນຕົ້ນມາ ໂດຍສະເພາະ ການຕີລາຄາຜົນສຳເລັດ, ດ້ານດີ-ດ້ານອ່ອນ ແລະ ສິ່ງທ້າທາຍຕ່າງໆ ກໍຄື ບົດຮຽນທີ່ຖອດຖອນໄດ້ ໃນໄລຍະຜ່ານມາ ແລະ ພ້ອມກັນປຶກສາຫາລື ວິທີການແກ້ໄຂ ແລະ ທິດທາງການຮ່ວມມື ໃນຕໍ່ໜ້າ.
ໃນໂອກາດດັ່ງກ່າວ, ທ່ານ ສະເຫລີມໄຊ ກົມມະສິດ ໄດ້ເນັ້ນເຖິງ ຄວາມໝາຍສຳຄັນ ຂອງກອງປະຊຸມແບບເປີດກວ້າງ ໃນຄັ້ງນີ້ ເພື່ອແລກປ່ຽນ ຄໍາຄິດຄຳເຫັນ, ປຶກສາຫາລືກັນ ຢ່າງກົງໄປກົງມາ ແລະ ມີຄວາມຮັບຜິດຊອບ ແນ່ໃສ່ຮັບປະກັນປະສິດທິພາບ ແລະ ປະສິດທິຜົນຂອງການຮ່ວມມືຊ່ວຍເຫລືອ ຂອງຕ່າງປະເທດ ລວມທັງອົງການ ຈັດຕັ້ງສາກົນ ທີ່ບໍ່ສັງກັດລັດຖະບານ ແລະ ຄູ່ຮ່ວມພັດທະນາອື່ນໆ ໃຫ້ໄດ້ຮັບຜົນປະໂຫຍດສູງສຸດ, ສອດຄ່ອງ ກັບລະບຽບຫລັກການ ແລະ ແຜນພັດທະນາ ເສດຖະກິດແຫ່ງຊາດ ກໍຄືແຜນພັດທະນາ ຂອງຂະແໜງການ ແລະ ທ້ອງຖິ່ນ ໃນແຕ່ລະໄລຍະ. ພ້ອມນີ້, ກອງປະຊຸມ ຍັງໄດ້ຮັບຟັງ ການລາຍງານ ຂອງທ່ານ ທອງຜ່ານ ສະຫວັນເພັດ ຮອງລັດຖະມົນຕີ ກະຊວງການຕ່າງປະເທດ ກ່ຽວກັບສະພາບການຮ່ວມມືລະຫວ່າງ ລັດຖະບານແຫ່ງ ສປປ ລາວ ກັບອົງການຈັດຕັ້ງສາກົນ ທີ່ບໍ່ສັງກັດລັດຖະບານ, ພ້ອມທັງໄດ້ຮັບຟັງຄຳເຫັນ ຂອງຄະນະຜູ້ແທນ ຈາກອົງການຈັດຕັ້ງສາກົນ ທີ່ບໍ່ສັງກັດລັດຖະບານ, ຄູ່ຮ່ວມພັດທະນາ, ກະຊວງ ຂະແໜງການ ແລະ ທ້ອງຖິ່ນ ແລະ ພິຈາລະນາ ປະກອບຄຳຄິດເຫັນໃສ່ຮ່າງ ຂໍ້ຕົກລົງ ຂອງລັດຖະມົນຕີ ກະຊວງການຕ່າງປະເທດ ວ່າດ້ວຍ ລະບຽບການອະນຸມັດຮັບເອົາທຶນ, ຊັບສິນ ແລະ ຊ່ຽວຊານ ຈາກຕ່າງປະເທດ ໃຫ້ແກ່ສະມາຄົມ ແລະ ມູນນິທິລາວ.
Editor: ຂ່າວສານປະເທດລາວ
