ໃນວັນທີ 28 ກຸມພາ 2018 ທີ່ຜ່ານມາ ຢູ່ທີ່ສະໂມສອນເມືອງ ບົວລະພາ ແຂວງ ຄໍາມ່ວນ ໄດ້ຈັດກອງປະຊຸມເປີດກ້ວາງ ຄົບຄະນະບໍລິຫານງານພັກເມືອງ ຄັ້ງທີ 13 ສະໃໝທີ X ຂຶ້ນ ໂດການເປັນປະທານຂອງສະຫາຍ ຄຳເພົ່າ ທອງເທພາຮັກ ເຈົ້າເມືອງ ເມືອງບົວລະພາ, ມີບັນດາຄະນະປະຈໍາພັກເມືອງ, ຫົວໜ້າຫ້ອງການ, ຮອງຫົວ ໜ້າຫ້ອງການອ້ອມຂ້າງເມືອງ, ເລຂາພັກຮາກຖານ, ຮອງເລຂາໜ່ວຍພັກບ້ານພ້ອມດ້ວຍນາຍບ້ານ ແຕ່ລະບ້ານພາຍໃນເມືອງເຂົ້າຮ່ວມ.
ກອງປະຊຸມຄັ້ງນີ້ ສະຫາຍ ຄຳເພົ່າ ທອງເທພາຮັກ ໄດ້ສະເໜີ ໃຫ້ທຸກຂະແໜງການ ລາຍງານ, ທົບທວນຄືນ ການຈັດຕັ້ງປະຕິບັດວຽກງານທີ່ກຳນົດໄວ້ ໃນມະຕິກອງປະຊຸມໃຫ່ຍຄັ້ງທີ X ຂອງອົງຄະນະພັກເມືອງ ພ້ອມທັງຜ່ານແຜນການດຳເນີນງານ ເພື່ອບັນລຸຕາມມະຕິດັ່ງກ່າວ ພ້ອມກັນນັ້ນທ່ານ ກໍ່ໄດ້ສະເໜີຕື່ມໃຫ້ທຸກພາກສ່ວນ ທຸກຂະແໜງການປະກອບຄຳຄິດເຫັນ ໃນການຈັດຕັ້ງປະຕິບັດໜ້າທີ່ວຽກງານຂອງຕົນ ໃນໄລຍະຜ່ານມາ ເພື່ອພ້ອມກັນແກ້ໄຂ ແລະ ຈັດຕັ້ງປະຕິບັດ ໃຫ້ເກີດດອກອອກຜົນ ແລະ ຜູ້ເຂົ້າຮ່ວມຍັງໄດ້ຮັບຟັງການສະຫລຸບຕີລາຄາ ກ່ຽວກັບການຊີ້ນຳ-ນຳພາຮອບດ້ານ ຂອງຄະນະບໍລິຫານງານພັກເມືອງ ໃນການຈັດຕັ້ງປະຕິບັດມະຕິຂອງກອງປະຊຸມໃຫ່ຍຄັ້ງທີ IX ຂອງອົງຄະນະພັກແຂວງ ແລະ ຄັ້ງທີ X ຂອງອົງຄະນະພັກເມືອງ ແລະ ຍັງໄດ້ຮັບຟັງການລາຍງານວຽກງານຂະແໜງການຕ່າງໆ ທັງຂົງເຂດ ການເມືອງ, ຂົງເຂດເສດຖະກິດ, ຂົງເຂດວັດທະນະທຳ-ສັງຄົມ, ຂົງເຂດປ້ອງການຊາດ-ປ້ອງກັນຄວາມສະຫງົບ ແລະ ການຜ່ານບົດສະຫລຸບແຜນພັດທະນາເສດຖະກິດ-ສັງຄົມ ປີ 2017 ແລະ ທິດທາງແຜນການປີ 2018 ຂອງຫ້ອງການແຜນການ ແລະ ການລົງທຶນເມືອງ, ບົດລາຍງານການຈັດຕັ້ງປະຕິບັດວຽກງານຊັບພະຍາກອນທຳມະຊາດ ແລະ ສິ່ງແວດລ້ອມ, ວຽກງານຫ້ອງການກະສິກຳ ແລະ ປ່າໄມ້ ແລະ ພັດທະນາຊົນນະບົດ ໃນໄລຍະ 1 ປີຜ່ານມາ ແລະ ທິດທາງແຜນການໃນ 1 ປີຕໍ່ໜ້າ ແລະ ວຽກງານການເງິນ ການເກັບລາຍຮັບ-ຄຸ້ມຄອງລາຍຈ່າຍ ປີ 2017 ແລະ ທິດທາງແຜນການ ໃນການຈັດເກັບລາຍຮັບ ປີ 2018.
ຈາກນັ້ນ ກໍ່ໄດ້ພ້ອມກັນຄົ້ນຄ້ວາ ປະກອບຄຳຄິດຄຳເຫັນປືກສາຫາລື ໃນທຸກຂົງເຂດວຽກງານ ເພື່ອຕື່ມໃສ່ຮ່າງບົດປະຊາມະຕິ ໃຫ້ມີເນື້ອໃນ ແລະ ຄວາມໝາຍທີ່ສົມບູນ ເພື່ອນຳໄປຈັດຕັ້ງຜັນຂະຫຍາຍໃນຂັ້ນຕໍ່ໄປ.
Editor: ເມືອງບົວລະພາ
