ໃນວັນທີ 13 ມີນາ 2018 ກະຊວງສາທາລະນະສຸກ ໄດ້ຈັດກອງປະຊຸມວຽກງານຈັດຕັ້ງ-ກໍ່ສ້າງພັກ-ພະນັກງານ 2017 ຂື້ນ ທີ່ ສູນຝຶກອົບຮົມລາວ-ຍີ່ປຸ່ນ ນະຄອນຫຼວງວຽງຈັນ. ໂດຍການເປັນປະທານ ແລະ ກ່າວເປີດກອງປະຊຸມຂອງທ່ານ ຮອງສາດສະດາຈານ ບຸນກອງ ສີຫາວົງ ຮອງເລຂາຄະນະພັກກະຊວງ ລັດຖະມົນຕີກະຊວງສາທາລະນະສຸກ, ທ່ານ ດຣ. ແສງຈ້ອຍ ປັນຍາວົງ ຄະນະປະຈໍາພັກ ຫົວຫນ້າກົມຈັດຕັ້ງ-ກໍ່ສ້າງພັກ-ພະນັກງານ, ເຂົ້າຮ່ວມີບັນດາຮອງກົມ, ຄະນະພັກກະຊວງ, ຫົວຫນ້າພະແນກ. ສະມາຊິກພັກ ແລະ ພະນັກງານ ເຂົ້າຮ່ວມຢ່າງພ້ອມພຽງ.
ເພື່ອເປັນການທົບທວນຄືນການຈັດຕັ້ງປະຕິບັດວຽກງານຈັດຕັ້ງ-ກໍ່ສ້າງພັກ-ພະນັກງານ ຂອງຂະແໜງສາທາລະນະສຸກ 2017 ແລະ ກໍານົດທິດທາງໃນປິ 2018, ຖອດຖອນບົດຮຽນ, ປຶກສາຫາລື ແລະ ແລກປ່ຽນຄວາມຄິດເຫັນບາງບັນຫານທີ່ເປັນບູລິມະສິດ ເພື່ອປັບປຸງ ແລະ ພັດທະນາວຽກງານຈັດຕັ້ງ,ກໍ່ສ້າງພັກ-ພະນັກງານ ໃນຕໍ່ຫນ້າ, ເຜີຍແຜ່, ແນະນໍາ ແລະ ຊີ້ນໍາບາງບັນຫາກ່ຽວກັບວຽກດັ່ງກ່າວ ໃຫ້ເປັນເອກະພາບ ໃນການຈັດຕັ້ງປະຕິບັດ, ກອງປະຊຸມດັ່ງກ່າວ ນອກຈາກຈະເປັນການທົບທວນ ແລະ ຕີລາຄາຄືນຜົນການຈັດຕັ້ງປະຕິບັດວຽກງານຈັດຕັ້ງ-ກໍ່ສ້າງພັກ-ພະນັກງານແລ້ວ ຜູ້ເຂົ້າຮ່ວມກອງປະຊຸມຍັງຈະໄດ້ປະກອບຄໍາຄິດເຫັນເຂົ້າໃສ່ບົດສະຫຼຸບ, ທິດທາງແຜນການ ແລະ ບັນຫາບູລິມະສິດຈໍານວນໜຶ່ງທີ່ຕ້ອງໄດ້ປັບປຸງແກ້ໄຂ.
ໃນໄລຍະໜຶ່ງປີຜ່ານມາວຽກງານຈັດຕັ້ງ-ກໍ່ສ້າງພັກ-ພະນັກງານ ຂອງຂະແໜງສາທາລະນະສຸກ ໄດ້ຮັບການຈັດຕັ້ງປະຕິບັດຢ່າງຕັ້ງຫນ້າ ແລະ ມີຜົນງານຫລາຍດ້ານ: ພະນັກງານສາທາລະນະສຸກສ່ວນຫລາຍຍັງມີຄຸນທາດການເມືອງໜັກແໜ້ນ, ມີຄຸນສົມບັດສີນທໍາປະຕິວັດ, ມີຄວາມຈົງຮັກພັກດີຕໍ່ພັກ-ຕໍ່ປະເທດຊາດ, ຄະນະພັກແຕ່ລະຂັ້ນ ກໍ່ໄດ້ຮັບການປັບປຸງໃຫ້ມີຄວາມໜັກແໜ້ນເຂັ້ມແຂງເທື່ອລະກ້າວ, ກົງຈັກຈັດຕັ້ງແຕ່ຂັ້ນກະຊວງລົງຮອດທ້ອງຖີ່ນຮາກຖານໄດ້ຮັບການປັບປຸງ ເຮັດໃຫ້ການບໍລິການສຸຂະພາບນັບມື້ນັບດີຂື້ນ, ຄຽງຄູ່ກັນນັ້ນກໍຍັງມີຂ້າງຄົງຄ້າງຈໍານວນໜຶ່ງທີ່ກອງປະຊຸມຕ້ອງໄດ້ສຸມໃສ່ຄົ້ນຄົ້ວ, ປຶກສາຫາລືເພື່ອແກ້ໄຂ ໃຫ້ບັນລຸຕາມຈຸດປະສົງເປົ້າໝາຍ
Editor: ສິງຫາ ເລືອງວັນ
