ພິທີດັ່ງກ່າວໄດ້ຈັດຂື້ນ ໃນວັນທີ 13 ມີນາ 2018 ທີ່ຫ້ອງການປົກຄອງບ້ານສາຍລົມ ເມືອງຈັນທະບູລີ ນະຄອນຫຼວງວຽງຈັນ ໂດຍການເຂົ້າຮ່ວມໃນພິທີ ມີບັນດາເລຂາໜ່ວຍພັກ, ຄະນະພັກຂັ້ນເທິງ, ນາຍບ້ານ-ຮອງນາຍບ້ານ, ສະມາຊິກພັກສົມບູນ-ສຳຮອງ ແລະ ພາກສ່ວນກ່ຽວຂ້ອງເຂົ້າຮ່ວມ.
ການຮັບສະມາຊິກພັກສະໄໝສຳຮອງເຂົ້າເປັນສະມາຊິກພັກສົມບູນໃນຄັ້ງນີ້ແມ່ນປະຕິບັດຕາມກົດລະບຽບຂອງພັກປະຊາຊົນປະຕິວັດລາວ, ໃນພິທີໄດ້ມີການກ່າວຈຸດປະສົງ ສະເໜີໃຫ້ສະມາຊິກພັກສໍາຮອງ ອ່ານໃບສໍາຫຼວດຕົນເອງ ໃນໄລຍະ 12 ເດືອນຜ່ານມາ ແລະ ສະເໜີໃຫ້ສະມາຊິກພັກສົມບູນຕາງຫນ້າອ່ານໃບຢັ້ງຢືນ ຜົນງານການຕິດຕາມໃນໄລຍະຜ່ານມາ ເຊິ່ງພວກກ່ຽວໄດ້ຜ່ານສະໄໝສໍາຮອງຄົບຕາມກໍານົດເວລາ ແລະ ມາດຖານເງື່ອນໄຂຂອງພັກ ປະຊາຊົນ ປະຕິວັດລາວ ວາງອອກ ຢ່າງເຂັ້ມງວດ, ມີຄວາມສາມະຄີພາຍໃນ-ພາຍນອກຢ່າງກວ້າງຂວາງ, ມີນໍ້າໃຈບໍສິສຸດສັດຊື່, ມີຄຸນສົມບັດສິນທໍາປະຕິວັດ, ມີຫົວຄິດປະດິດສ້າງ, ມີຄວາມຫ້າວຫັນ ເປັນແບບຢ່າງນໍາໜ້າໃຫ້ແກ່ມະຫາຊົນ, ເຮັດສຳເລັດໜ້າທີ່ວຽກງານ ທີ່ການຈັດຕັ້ງມອບໝາຍໃຫ້ເປັນຢ່າງດີ.
ພ້ອມນັ້ນໃນພິທີກໍໄດ້ມີການອ່ານຂໍ້ຕົກລົງຂອງຄະນະພັກຂັ້ນເທິງ ວ່າດ້ວຍການອະນຸມັດເລື່ອນສະມາຊິກພັກສໍາຮອງເປັນສະມາຊິກພັກສົມບູນ ຈໍານວນ 3 ທ່ານ ພ້ອມນັ້ນເລຂາໜ່ວຍພັກກໍ່ໄດ້ມີການກ່າວຮັບ ແລະ ຂື້ນຈັບມືຮັບເອົາສະມາຊິກພັກໃຫມ່, ໃນພິທີຍັງໄດ້ມີການມອບບັດສະມາຊິກພັກ ໃຫ້ແກ່ສະມາຊິກພັກ ຈໍານວນ 5 ທ່ານ ອີກດ້ວຍ
ໃນຕອນທ້າຍຄະນະປະທານໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານໃນການນຳພາຂອງໜ່ວຍພັກ ແລະ ສະມາຊິກພັກສໍາຮອງ ທີ່ໄດ້ບຸກບືນຝຶກຝົນຫຼໍຫຼອມໃນການປະຕິບັດໜ້າທີ່ ທີ່ຕົນຮັບຜິດຊອບ ຕໍ່ການຈັດຕັ້ງມອບໝາຍໃຫ້ ແລະ ສ້າງຕົນເອງຈົນໄດ້ກ້າວເຂົ້າເປັນສະມາຊິກພັກສົມບູນ. ພ້ອມທັງໄດ້ເນັ້ນໃຫ້ສະມາຊິກພັກສົມບູນໃໝ່ ເອົາໃຈໃສ່ສືບຕໍ່ສຶກສາອົບຮົມວຽກງານການເມືອງແນວຄິດໃຫ້ໜັກແໜ້ນ, ປະຕິບັດກົດລະບຽບຂອງພັກຢ່າງເຂັ້ມງວດ, ກຳແໜ້ນແນວທາງນະໂຍບາຍຂອງພັກວາງອອກໃນແຕ່ລະໄລຍະ ແລະ ສຶບຕໍ່ຝຶກຝົນຫລໍ່ຫຼອມຕົນເອງໃຫ້ກາຍເປັນສະມາຊິກພັກທີ່ດີເດັ່ນໃນຕໍ່ໜ້າ.
Editor: ສິງຫາ ເລືອງວັນ
