ໃນວັນທີ 14 ມີນາ 2018 ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມສະເຫຼີມສະຫຼອງ ວັນແມ່ຍິງສາກົນ ວັນທີ 8 ມີນາ 2018 ຄົບຮອບ 108 ປີ ພາຍໃຕ້ຫົວຂໍ້: ເຖິງເວລາຮ່ວມໃຈປັບປຸງຊີວິດການເປັນຢູ່ຂອງແມ່ຍິງໃນຕົວເມືອງ ແລະ ຊົນນະບົດ ໂດຍການເປັນປະທານຂອງທ່ານ ນາງ. ເຂົ້ມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ, ທ່ານ ນາງຈັນສຸກ ແສງພະຈັນ ປະທານຄະນະບໍລິຫານງານສູນກາງສະຫະພັນແມ່ຍິງ, ກະຊວງອຸດສາຫະກໍາ ແລະ ການຄ້າ, ມີບັນດາສະມາຊິກແມ່ຍິງພາຍໃນກະຊວງ ແລະ ພາກສາວນທ່ກ່ຽວຂ້ອງເຂົ້າຮ່ວມ.
ໃນພິທີທ່ານ ນາງ ຈັນສຸກແສງພະຈັນ ໄດ້ເລົ່າປະຫວັດຄວາມເປັນມາຂອງວັນແມ່ນຍິງ ນັບແຕ່ວັນທີ 8 ມີນາ 1910 – 8 ມີນາ 2018 ຄົບຮອບ 108 ປີ ແລະ ໄດ້ລາຍງານສະພາບການຈັດຕັ້ງປະຕິບັດວຽກງງານ 1 ປະຜ່ານມາ ຂອງສະມາຊິກແມ່ຍິງ ກະຊວງອຸດສາຫະກໍາ ແລະ ການຄ້າ ໂດຍໄດ້ຖືສໍາຄັນວຽກງານສຶກສາອົບຮົມການເມືອງ-ແນວຄິດ ຊຶ່ງໄດ້ສະແດງອອກໃນການເອົາໃຈໃສ່ເຂົ້າຮ່ວມເຊື່ອມຊືມແນວທາງນະໂຍບາຍ, ມະຕິຄໍາສັ່ງ ແລະ ນິຕິກໍາຕ່າງໆຂອງພັກ - ລັດ ມູນເຊື້ອຂອງຊາດ, ວັນປະຫວັດສາດສໍາຄັນຕ່າງໆທີ່ຄະນະພັກ ຄະນະນໍາຈັດຂື້ນຢູ່ສະເໝີ, ຄະນະໜ່ວຍ ແລະ ເອື້ອຍນ້ອງແມ່ຍິງໄດ້ມີຄວາມເອົາໃຈໃສ່ຕໍ່ການກໍ່ສ້າງ ແລະ ຍົກລະດັບຄວາມຮູ້ ຄວາມສາມາດໃນດ້ານຕ່າງໆ ໃຫ້ແກ່ຕົນເອງ ທັງພາຍໃນ ແລະ ຕ່າງປະເທດ , ເຄື່ອນໄຫວວຽກງານຕາມພາລະບົົດບາດ ແລະ ເປັນເຈົ້າໃນການປະຕິບັດຂໍ້ແຂ່ງຂັນ 3 ດີຢ່າງເປັນຂະບວນ.
ໃນໂອກາດດັ່ງກ່າວ ທ່ານ ນາງ. ເຂັ້ມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ເນັ້ນໜັກໃຫ້ເອົາໃຈໃສ່ 5 ບັນຫາຄື: 1. ໃຫ້ຄະນະບໍລິຫານງານ, ຄະນະໜ່ວຍຈົ່ງເອົາໃຈໃສ່ຕິດຕາມເກັບກໍາສະພາບຂອງສະມາຊິກ ທີ່ຢູ່ໃນຄວາມຮັບຜິດຊອບຂອງຕົນຢ່າງໃກ້ສິດ, 2.ໃຫ້ສະມາຊິກສະຫະພັນແມ່ຍິງທົ່ວກະຊວງອຸດສາຫະກໍາ ແລະ ການຄ້າ ຈົ່ງເຊີດຊູຄວາມເປັນແບບຢ່າງນໍາຫນ້າໃນການຫັດແໜ້ນຄວາມສາມັກຄີພາຍໃນ, ຮັກສາບົດບາດ ແລະ ຮີດຄອງປະເພນີຂອງຊາດໃຫ້ໝັ້ນຄົງ, 3. ສະມາຊິກທຸກຄົ້ນຕ້ອງເປັນເຈົ້າການ ໃນການພັດທະນາຕົນເອງຢ່າງຮອບດ້ານ ເປັນຕົ້ນການບໍາລຸງ ຍົກລະດັບທາງດ້ານວິຊາສະເພາະ, ທິດສະດີ ແລະ ພາສາຕ່າງປະເທດ, 4. ສະມາຊິກທຸກຄົນຕ້ອງພ້ອມກັນຕັ້ງຫນ້າ ປະກອບສ່ວນເຂົ້າໃນວິຊາສະເພາະຕາມພາລະບົດບາດຂອງຂະແໜງການ ໃຫ້ຕິດພັນກັບທຸກຂະບວນການທີ່ຂັ້ນເທິງວາງອອກ, 5. ຮຽກຮ້ອງໃຫ້ເອື້ອຍນ້ອງແມ່ຍິງ ໃນທົ່ວກະຊວງອຸດສາຫະກໍາ ແລະ ການຄ້າ ຈົ່ງເອົາໃຈໃສ່ ແລະ ເປັນເຈົ້າການໃນການຈັດຕັ້ງປະຕິບັດ ຂໍ້ແຂ່ງຂັນ 3 ດີ ໂດຍຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ ແຜນການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຂອງໜ່ວຍພັກຕົນເອງວາງອອກ ໃຫ້ປະກົດຜົນເປັນຈິງ.
Editor: ສິງຫາ ເລືອງວັນ
