ກອງປະຊຸມເປີດກ້ວາງຄົບຄະນະບໍລິຫານງານພັກ ກອງບັນຊາການ ປກສ ເມືອງທ່າພະບາດ ແຂວງ ບໍລິຄໍາໄຊ ຄັ້ງທີ V ສະໄໝທີ່ III ໄດ້ໄຂຂຶ້ນຢ່າງເປັນທາງການ ໃນລະຫວ່າງ ວັນທີ 26-27 ກຸມພາ 2018 ຜ່ານມານີ້ ຢູ່ທີ່ສະໂມສອນສຳນັກງານປົກຄອງເມືອງທ່າພະບາດ , ໂດຍການເປັນປະທານຂອງ ສະຫາຍ ພັນໂທ ຄໍາຜັນ ບຸນມີໄຊ ກໍາມະການພັກເມືອງ, ເລຂາຄະນະພັກຮາກຖານ, ຫົວໜ້າກອງບັນຊາການ ປກສ ເມືອງທ່າພະບາດ , ເປັນກຽດເຂົ້າຮ່ວມຂອງ ສະຫາຍ ຄໍາປຸ່ນ ສີຫາລາດ ຮອງເລາຂາພັກເມືອງ ຮອງເຈົ້າເມືອງ ທ່າພະບາດ, ມີທ່ານ ພັນໂທ ທອງໄຫຼ ໄຊຍະລາດ ຄະນະພັກ ຮອງຫົວໜ້າກອງບັນຊາການ ປກສ ແຂວງ, ມີຄະນະພັກ-ຄະນະກອງບັນຊາການ, ເລຂາໜ່ວຍພັກ, ແຂກຖືກເຊີນ, ບັນດາສະມາຊິກພັກສົມບູນ -ສໍາຮອງ ເຂົ້າຮ່ວມ.
ພີທີໄດ້ຜ່ານມະຕິຕົກລົງຂອງຄະນະປະຈໍາພັກ ເມືອງທ່າພະບາດ ວ່າດ້ວຍການອະນຸມັດໃຫ້ຄະນະພັກຮາກຖານ ປກສ ເມືອງ ເປີດກອງປະຊຸມຄົບຄະນະພັກຮາກຖານຂັ້ນຂອງຕົນຂຶ້ນ, ໂອກາດດຽວກັນ ສະຫາຍ ພັນໂທ ຄໍາຜັນ ບຸນມີໄຊ ກໍ່ໄດ້ກ່າວເປີດກອງປະຊຸມຢ່າງເປັນທາງການ, ຫຼັງຈາກນັ້ນສະຫາຍ ພັນຕີ ມີລິນດາ ວົງສໍາພັນ ຮອງເລຂາຄະນະພັກຮາກຖານ, ຮອງຫົວໜ້າກອງບັນຊາການ ປກສ ເມືອງໄດ້ຂື້ນຜ່ານບົດສະຫຼຸບການຊີ້ນໍາ-ນໍາພາຂອງຄະນະພັກຮາກຖານ ໃນໄລຍະ 1 ປີຜ່ານມາ, ຕີລາຄາຄືນການຈັດຕັ້ງປະຕິບັດ 4 ຄາດໝາຍ, 4 ບຸກທະລຸ ທີ່ທາງຄະນະບໍລິຫານງານສູນກາງພັກວາງອອກ ແລະ ສາມາດຍາດໄດ້ຜົນງານໃນຫຼາຍດ້ານເຊັ່ນ:
ດ້ານການເມືອງ-ແນວຄິດ ໄດ້ຖືເອົາການສຶກສາອົບຮົມການເມືອງ-ແນວຄິດເປັນບັນຫາສໍາຄັນຕົ້ນຕໍ ໃນຖັນແຖວພະນັກງານ-ນັກຮົບ ຈື່ງເຮັດໃຫ້ຫຼາຍສະຫາຍມີຄວາມອຸ່ນອຽນທຸ່ນທ່ຽງ ເຊື່ອໝັ້ນຕໍ່ແນວທາງຂອງພັກ, ເຄົາລົບລະບຽບກົດໝາຍຂອງລັັດ.
ດ້ານວຽກງານກໍ່ສ້າງພັກ-ພະນັກງານ ສາມາດຂະຫຍາຍມະຫາຊົນກ້າວໜ້າເຂົ້າພັກໄດ້ 21 ສະຫາຍ, ສົ່ງພະນັກງານ-ນັກຮົບໄປຍົກລະດັບວິຊາສະເພາະໄດ້ 03 ຄັ້ງ, ມີ 07 ສະຫາຍ, ໄປຍົກລະດັບທິດສະດີການເມືອງ-ການປົກຄອງ ໄດ້ 02 ຄັ້ງ, ມີ 08 ສະຫາຍ, ສົ່ງພະນັກງານໄປຝືກອົບຮົມວຽກງານສືບຂ່າວອາຍາໄດ້ 01 ຄັ້ງ, ມີ 05 ສະຫາຍ.
ດ້ານແບບແຜນນໍາພາ-ບັນຊາ ແລະ ວິທີເຮັດວຽກ ຄະນະພັກໄດ້ນໍາເອົາມະຕິ, ຄໍາສັ່ງ ແລະ ແນວທາງນະໂຍບາຍຂອງພັກ ມາຫັນເປັນແບບແຜນວິທີການເຮັດວຽກ, ປະຕິບັດຫຼັກການລວມສູນປະຊາທິປະໄຕ ເຮັດວຽກເປັນຫມູ່ຄະນະ, ມອບໃຫ້ບຸກຄົນຮັບຜິດຊອບ.
Editor: ປກສ ແຂວງບໍລິຄຳໄຊ
