ໃນຕອນເຊົ້າຂອງວັນທີ 1 ມີນາ 2018 ຢູ່ຫ້ອງປະຊຸມຕຶກ ວັດທະນະທໍາ-ສັງຄົມເມືອງ ໄດ້ເປີດຮຽນເອກະສານສະໜັບສະໜູນໃຫ້ມະຫາຊົນຜູ້ກ້າວໜ້າ ເປົ້າໝາຍຂະຫຍາຍເຂົ້າເປັນສະມາຊິກພັກ ຊຸດທີ 1 ປະຈໍາປີ 2018 ຂື້ນ ໂດຍການເປັນປະທານຂອງ ສະຫາຍ ກອງ ແສງພະຈັນ ກຳມະການພັກເມືອງ ຫົວໜ້າໂຄສະນາອົບຮົມເມືອງ ມີບັນດາມະຫາຊົນຜູ້ກ້າວໜ້າ ເປົ້າໝາຍເຂົ້າພັກ ອ້ອມຂ້າງສໍານັກງານເມືອງເຂົ້າຮ່ວມ ທັງໝົດ 10 ທ່ານ, ຍິງ 6 ທ່ານ.
ທ່ານ ກອງ ແສງພະຈັນ ໄດ້ຂື້ນບັນຍາຍເນື້ອໃນເອກະສານສະໜັບສະໜູນ 11 ຄໍາຖາມ, 11 ຄໍາຕອບ ມີຄື: ພັກການເມືອງແມ່ນຫຍັງ, ເປັນຫຍັງຈື່ງມີພັກການເມືອງ, ພັກປະຊາຊົນປະຕິວັດລາວ ແມ່ນພັກແນວໃດ, ພັກປະຊາຊົນປະຕິວັດລາວ ໄດ້ຮັບການສ້າງຕັ້ງຂື້ນຄືແນວໃດ, ພັກປະຊາຊົນປະຕິວັດລາວມີອຸດົມຄະຕິ ແລະ ວັດຖຸປະສົງຄືແນວໃດ, ທາດແທ້ຂອງພັກປະຊາຊົນປະຕິວັດລາວ ແມ່ນແນວໃດ, ມາດຖານ ແລະ ເງື່ອນໄຂຜູ້ຈະເຂົ້າເປັນສະມາຊິກພັກປະຊາຊົນປະຕິວັດລາວ ມີແນວໃດ, ສະມາຊິກພັກມີໜ້າທີ່ຫຍັງແດ່, ໄດ້ຮັບຜົນປະໂຫຍດຫຍັງແດ່.
ຈຸດປະສົ ງເພື່ອເຮັດໃຫ້ ບັນດາມະຫາຊົນຜູ້ກ້າວໜ້າ ເປົ້າໝາຍຂະຫຍາຍເຂົ້າເປັນສະມາຊິກພັກ ມີຄວາມຮັບຮູ້ ແລະ ເຂົ້າໃຈກ່ຽວກັບຄວາມໝາຍ, ຄວາມເປັນມາ, ອຸດົມຄະຕິ ແລະ ທາດແທ້ຂອງພັກປະຊາຊົນປະຕິວັດລາວ, ເຂົ້າໃຈກ່ຽວກັບມາດຖານ ແລະ ເງື່ອນໄຂຜູ້ທີ່ຈະເຂົ້າເປັນສະມາຊິກພັກ ແລະ ຜົນປະໂຫຍດທີ່ສະມາຊິກພັກໄດ້ຮັບ, ເຮັດໃຫ້ມະຫາຊົນຜູ້ກ້າວໜ້າ ຕັ້ງໜ້າຝຶກຝົນຫຼໍ່ຫຼອມຕົນເອງ ໃຫ້ມີມາດຖານເງື່ອນໄຂຄົບຖ້ວນ ແລະ ມີຄວາມຕື່ນຕົວສະມັກເຂົ້າເປັນສະມາຊິກພັກປະຊາຊົນປະຕິວັດລາວ ແລະ ກາຍເປັນບຸກຄົນທີ່ໄວ້ວາງໃຈຈາກສັງຄົມ.
ບັນດາມະຫາຊົນຜູ້ກ້າວໜ້າ ເປົ້າໝາຍຂະຫຍາຍເຂົ້າເປັນສະມາຊິກພັກພັກ ທີ່ໄດ້ຮັບການຮ່ຳຮຽນສະໜັບສະໜູນໃນຊຸດນີ້ ມາຈາກ 6 ໜ່ວຍພັກອ້ອມຂ້າງເມືອງ ແລະ ຮາກຖານບ້ານຄື: ໜວ່ຍພັກ ກຸ່ມ - ພະນັກງານ, ໜວ່ຍພັກສຶກສາ, ໜວ່ຍພັກກະສິກໍາ ແລະ ປ່າໄມ້ ,ໜ່ວຍພັກບ້ານກາງ, ໜ່ວຍພັກບ້ານວັງປານ ແລະ ໜ່ວຍພັກ ບ້ານດອນເງິນ.
ໃນຕອນທ້າຍ ໄດ້ມີພິທີມອບໃບຢັ້ງຢືນໃຫ້ແກ່ມະຫາຊົນຜູ້ກ້າວໜ້າ ເປົ້າໝາຍຂະຫຍາຍເຂົ້າເປັນສະມາຊິກພັກ ໂດຍແມ່ນ ທ່ານກອງ ແສງພະຈັນໃຫ້ກຽດຂື້ນມອບ.

Editor:  ເມືອງໂພນທອງ