ໃນຕອນເຊົ້າຂອງວັນທີ່ 6 ມີນາ 2018 ນີ້. ຢູ່ສະໂມສອນໃຫ່ຍເມືອງໂພນທອງ, ແຂວງຫຼວງພະບາງ ໄດ້ຈັດພິທີເຊືອມຊືມມະຕິກອງປະຊຸມຄົບຄະນະຄັ້ງທີ 5 ຂອງຄະນະບໍລິຫານງານສູນກາງພັກສະໄໜທີ 10 ແລະ ຜົນສຳເລັດເວທີສາກົນ 1 ແຫຼວ 1 ເສັ້ນທາງ, ໃຫ້ກຽດຂຶ້ນເຜີຍແຜ່ເອກະສານ ຂອງ ສະຫາຍ ສົມມາລີ ຄໍາເກັ່ງ ກຳມະການພັກແຂວງ ເລຂາຄະນະບໍລິຫານງານພັກເມືອງໂພນທອງ, ສະຫາຍ ຄໍາຜາຍ ແກ້ວລາວັນ ຮອງເລຂາຄະນະບໍລິຫານງານພັກເມືອງໂພນທອງ, ມີບັນດາສະຫາຍຄະນະປະຈໍາພັກເມືອງ, ກຳມະການພັກເມືອງ, ຄະນະພັກຮາກຖານ 5 ກຸ່ມບ້ານ, ພະນັກງານອາວຸດໂສບໍານານ, ຫົວໜ້າ, ຮອງຫົວໜ້າຫ້ອງການ, ນາຍ ແລະ ພົນທະຫານ ນາຍ ແລະ ພົນຕໍາຫຼວດ, ພະນັກງານລັດຖະກອນ, ພະນັກງານອາສາສະມັກເຂົ້າຮ່ວມຢ່າງພ້ອມພຽງ.
ໃນພິທິ ສະຫາຍ ຄໍາຜາຍ ແກ້ວລາວັນ ກໍ່ໄດ້ເປັນກຽດຂຶ້ນເຜີຍແຜ່ເຊື່ອມຊືມມະຕິກອງປະຊຸມຄົບຄະນະຄັ້ງທີ 5 ຂອງຄະນະບໍລິຫານງານສູນກາງພັກສະໄໜທີ 10 ໂດຍເຜີຍແຜ່ເຊື່ອມຊືມຕາມເອກະສານ, ມະຕິຂອງຄະນະບໍລິຫານງານສູນກາງພັກສະບັບເລກທີ່ 026 /ຄບສພ, ລົງວັນທີ່ 3 ສິງຫາ 2017 ວ່າດ້ວຍການເພີ່ມທະວີວຽກງານຄຸ້ມຄອງ ແລະ ພັດທະນາທີ່ດີນໃນໄລຍະໃໜ່, ມະຕິກອງປະຊຸມສະໄໜສາມັນຂອງສະພາແຫ່ງຊາດ ແລະ ສະພາປະຊາຊົນແຂວງເທື່ອທີ 4 ນະໂຍບາຍຊຸກຍູ້-ສົ່ງເສີມວິສາຫະກິດຂະໜາດນ້ອຍ ແລະ ກາງ. ເປັນຕົ້ນການຕິລາຄາຜົນຂອງການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມສູນກາງຄົບຄະນະຄັ້ງທີ 5 ຂອງຄະນະບໍລິຫານງານສູນກາງພັກສະໄໜທີ 10, ສະພາບແວດລ້ອມສາກົນ ແລະ ພາຍໃນປະເທດ, ການຈັດຕັ້ງປະຕິບັດແຕ່ລະຂົງເຂດວຽກງານ, ທິດທາງລວມ ແລະ ໜ້າທີ່ຈຸດສຸມໃນຕໍ່ໜ້າ, ສຸມໃສ່ການຫັນປ່ຽນອັນແຂງແຮງຢູ່ພາຍໃນພັກ, ຕິດພັນກັບການຜັນຂະຫຍາຍຜົນຂອງບັ້ນດໍາເນີນຊີວິດການເມືອງປັບປຸງປົວແປງພັກ, ແນ່ໃສ່ສ້າງພັກໃຫ້ປອດໃສໜັກແໜ້ນ ແລະ ເຂັ້ມແຂງ, ເປັນປັດໃຈຄໍ້າປະກັນພາລະກິດປ່ຽນແປງໃໜ່ໃຫ້ດຳເນີນໄປຖືກທິດ ແລະ ສອດຄ່ອງກັບເນື້ອໃນຈິດໃຈຂອງມະຕິກອງປະຊຸມໃຫ່ຍຄັ້ງທີ 10 ຂອງພັກ, ນໍາພາການພັດທະນາເສດຖະກິດ-ສັງຄົມ ໂດຍສູ້ຊົນຈັດຕັ້ງປະຕິບັດບັນດາຄາດໜາຍເສດຖະກິດມະຫາພາກ ແລະ ການຢຸດຕິການສໍ້ລາດບັງຫຼວງ ໃຫ້ບັນລຸຕາມແຜນທີ່ວາງໄວ້. ການຫັນລົງຮາກການເມືອງ, ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ, ປັບປຸງລະບົບການເມືອງຢູ່ຂັ້ນຮາກຖານບ້ານໃຫ້ໜັກແໜ້ນເຂັ້ມແຂງ, ເອົາໃຈໃສ່ສືກສາອົບຮົມປະຊາຊົນຊັ້ນຄົນຕ່າງໆ, ເສີມຂະຫຍາຍມູນເຊື້ອສາມັກຄີປອງດອງ, ຈິດໃຈຮັກຊາດ, ເຕົ້າໂຮມປຸກລະດົມມະຫາຊົນ ເຂົ້າຮ່ວມໃນການປົກປັກຮັກສາ ແລະ ສ້າງສາພັດທະນາປະເທດຊາດ, ຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງທີ 10 ໃຫ້ໄດ້ຮັບຜົນດີ ສອດຄ່ອງຕາມແນວທາງຂອງພັກ-ລັດວາງໄວ້ ໃຫ້ມີປະສິດທິພາບຂຶ້ນເທື່ອລະກ້າວ. ພ້ອມດ່ຽວກັນ ສະຫາຍ ສົມມາລີ ຄໍາເກັ່ງ ກໍ່ໄດ້ເຜີຍແຜ່ຊີແຈ້ງບັນຫາອັນພົ້ນເດັ່ນຜົນສຳເລັດເວທີສາກົນ 1 ແຫຼວທາງ 1 ເສັ້ນທາງ ຕາມເອກະສານຂອງ ພັກ-ລັດ ເປັນແຕ່ລະຂັ້ນຕອນຂອງແຜນຍຸດທະສາດການຮ່ວມມືຂອງບັນດາປະເທດເພື່ອນບ້ານ, ສ້າງກົນໄກລະຫວ່າງຊາດໃຫ້ເຂັ້ມແຂງ ທາງດ້ານເສດຖະກິດຂອງ ລາວ-ຈີນ ທາງດ້ານການຂົນສົ່ງສິນຄ້າເສັ້ນທາງລົດໄຟຄວາມໄວສູງ.
Editor: ເມືອງໂພນທອງ
