ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໄດ້ຈັດພິທີເຜີຍແຜ່ກົດໝາຍວ່າດ້ວຍ ສິລະປະການສະແດງ ໃຫ້ແກ່ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ 8 ແຂວງພາກເໜືອ ຂຶ້ນໃນຕອນເຊົ້າວັນທີ 6 ມີນາ 2018 ນີ້ ຢູ່ທີ່ ຫ້ອງປະຊຸມພະແນກຖະແຫຼຂ່າວ, ວັດທະນະທຳ ແລະ ທ່ອງທ່ຽວ ແຂວງອຸດົມໄຊ ເພື່ອໃຫ້ຜູ້ເຂົ້າຮ່ວມໄດ້ເຊືຶອມຊືມກຳແໜ້ນເນື້ອໃນກົດໝາຍດັ່ງກ່າວ ພ້ອມທັງນຳເອົາໄປຈັດຕັ້ງປະຕິບັດຢູ່ພາຍໃນຂອບເຂດຄວາມຮັບຜິດຊອບຂອງຕົນເອງໃຫ້ໄດ້ຮັບຜົນສຳເລັດ.
ໂອກາດນີ້ ທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳແລະ ທ່ອງທ່ຽວ ໄດ້ຍົກໃຫ້ເຫັນຄວາມໝາຍສຳຄັນຂອງວຽກງານສິລະປະການສະແດງ ບາງຕອນທ່ານກ່າວວ່າ ກົດໝາຍສິລະປະການສະແດງ ແມ່ນກົດໝາຍໜຶ່ງ ທີ່ຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະ ໃໝ່ຂອງພັກ-ລັດ ກໍຄືຂອງປະຊາຊົນ ເຊິ່ງວຽກງານສິລະປະການສະແດງ ເປັນວຽກງານໜຶ່ງທີ່ໄດ້ຄຽງຄູ່ກັບວິວັດທະນາການຂອງຊາດເຮົາ ແລະ ຕິດພັນກັບການດຳລົງຊີວິດຂອງປະຊາຊົນບັນດາເຜົ່າມາແຕ່ດົນນານ ຈົນເຖິງປັດຈຸບັນ. ໃນສະໄໝຕໍ່ສູ້ກູ້ຊາດ ສຽງຂັບ, ສຽງລຳ ແລະ ການສະແດງຕ່າງໆໄດ້ເປັນສິ່ງໜຶ່ງໃນການປຸກລະດົມກຳລັງໃຈຂອງທົ່ວພັກ-ທົ່ວກອງທັບ ແລະ ທົ່ງປວງຊົນບັນດາເຜົ່າ ໃຫ້ລຸກຂຶ້ນຕໍ່ສູ້ຈົນສາມາດກອບກູ້ເອົາປະເທດຊາດໃຫ້ມີເອກະລາດ, ມີສັນຕິພາບ ມາໄດ້ເທົ້າທຸກວັນນີ້. ປັດຈຸບັນ ວຽກງານການສະແດງ ກໍຍັງໄດ້ມີບົດບາດສຳຄັນເຊິ່ງສອດຫ້ອຍກັບວິຖີຊິດວິດຂອງປະຊາຊົນພວກເຮົາຢູ່ທຸກບ່ອນ ສະແດງອອກ ຍາມມີບຸນ ມີງານສ້າງສັນຕ່າງໆ ພວກເຮົາຈະສັງເກດເຫັນມີສຽງຂັບ, ສຽງລຳ, ຮ້ອງເພງ ແລະ ການສະແດງມ່ວນຊື່ນໆຕ່າງໆ ດ້ວຍຄວາມເບິກບານມ່ວນຊື່ນ. ອັນໄດ້ສ້າງໃຫ້ຄົນພາຍໃນຊາດມີຄວາມຮັກ, ສາມັກຄີປອງດອງ, ມີໂລກະທັດ, ຊີວະທັດ ຕິດພັນກັບປະເທດຊາດບ້ານເມືອງ ແລະ ມີມິດຕະພາບກັບບັນດາປະເທດທັງໃກ້ ແລະ ໄກ.
ສຳລັບ ເນື້ອໃນກົດໝາຍວ່າດ້ວຍສິລະປະການສະແດງ ທີ່ນຳມາເຜີຍແຜ່ຄັ້ງນີ້ ມີຈຸດປະສົງ ກຳນົດຫຼັກການ, ລະບຽບການ ແລະ ມາດຕະການກ່ຽວກັບການຄຸ້ມຄອງ, ຕິດຕາມກວດກາ ການຈັດຕັ້ງ, ການເຄື່ອນໄຫວວຽກງານສິລະປະການສະແດງ ເພື່ອຮັບປະກັນໃຫ້ວຽກງານດັ່ງກ່າວມີຄຸນນະພາບ ແລະ ເຂັ້ມແຂງ ແນໃສ່ເສີມຂະຫຍາຍສິດເປັນເຈົ້າຂອງປະຊາຊົນບັນດາເຜົ່າເຂົ້າໃນການຟື້ນຟູ, ອານຸລັກ, ພັດທະນາ, ເຜີຍແຜ່, ຊົມໃຊ້ ສິລະປະວັດທະນະທຳ ທີ່ມີລັກສະນະຊາດ, ກ້າວໜ້າ, ມະຫາຊົນ; ສະກັດກັ້ນ ປາກົດການຫຍໍ້ທໍ້ທາງດ້ານສິລະປະວັດທະນະທຳໃນສັງຄົມ,ສາມາດເຊື່ອມໂຍງກັບພາກພື້ນ ແລະ ສາກົນ, ປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ. ເຊິ່ງລວມມີທັງໝົດ 10 ພາກ 74 ມາດຕາ.
ເຂົ້າຮ່ວມຮັບຟັງການເຜີຍແຜ່ຄັ້ງນີ້ ມີຫົວໜ້າ, ຮອງຫົວໜ້າພະແນກ, ຫົວໜ້າຫ້ອງການ ຖວທ ເມືອງຂອງ 8 ແຂວງພາກເໜືອຄື: ຜົ້ງສາລີ, ບໍ່ແກ້ວ, ຫຼວງນ້ຳທາ, ອຸດົມໄຊ, ຫຼວງພະບາງ, ຫົວພັນ, ຊຽງຂວາງ ແລະ ແຂວງໄຊຍະບູລີ ພ້ອມດ້ວຍບັນດາຄະນະພະແນກ, ຂະແໜງການ ແລະ ຜູ້ປະກອບການດ້ານການບໍລິການຮ້ານອາຫານພາຍໃນເທດສະບານແຂວງອຸດົມໄຊເຂົ້າຮ່ວມ.
Editor: ແຂວງອຸດົມໄຊ
