ໃນທ້າຍອາທິດຜ່ານມານີ້; ຢູ່ທີ່ສະໂມສອນຂອງເມືອງ ອາດສະພັງທອງ ໄດ້ຈັດພິທີປະກາດຮັບຮອງ 12 ບ້ານ ເປັນບ້ານສາມັກຄີປອງດອງ ເປັນຄັ້ງທໍາອິດ ໂດຍການເຂົ້າຮ່ວມຂອງທ່ານ ລໍາທອງ ຂອບສີລາວົງ ເຈົ້າເມືອງອາດສະພັງທອງ, ມີທ່ານ ສິນໄຊ ວົງລະຄອນ ຮອງປະທານແນວລາວສ້າງຊາດແຂວງ ສະຫວັນນະເຂດ, ມີຫົວໜ້າ,ຮອງຫົວໜ້າຫ້ອງການ, ທະຫານ, ຕໍາຫຼວດ, ເລຂາຄະນະພັກຮາກຖານ, ເລຂາພັກບ້ານ, ນາຍບ້ານພາຍໃນ 12 ບ້ານເຂົ້າຮ່ວມ.
ໂດຍປະຕິບັດຕາມຄໍາສັ່ງແນະນໍາເລກທີ 033/ຄປຈ.ສນຊ ຂອງຄະນະປະຈໍາສູນກາງແນວລາວສ້າງຊາດ ວ່າດ້ວຍການຈັດຕັ້ງປະຕິບັດ ສ້າງຂະບວນການຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດ ໂດຍຕິດພັນກັບບ້ານພັດທະນາ ແຕ່ປີ 2017 ຫາ ປີ 2020 ຜ່ານການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ຂອງແນວລາວສ້າງຊາດ ໃນໄລຍະຜ່ານມາ ທາງຫ້ອງການແນວລາວສ້າງຊາດປະຈໍາເມືອງ ອາດສະພັງທອງ ແມ່ນໄດ້ປະກາດຈໍານວນ 12 ບ້ານຄື: ບ້ານ ແຈລະມ໋ອງ, ດົງກຶມ, ດົງນາຂາມ, ນາໄລ່ໂຄກ, ຫຼຽນໄຊ, ສີວິໄລ, ດົງກິໂລ, ດົງເຫັນ, ນາຈານ, ໂພນຜາງ, ນາແສນແກ້ວ ແລະ ບ້ານໜອງຫອຍ ເປັນບ້ານສາມັກຄີປອງດອງ.
ໃນຈໍານວນ 12 ບ້ານ ປະກອບມີ ພົນລະເມືອງທັງໝົດ 17,473 ຄົນ, ຍິງ 8,813 ຄົນ, ມີ 2,303 ຫຼັງຄາ ແລະ ມີ 2,18 ຄອບຄົວ. ໃນນີ້, ປະຊາຊົນສ່ວນຫຼາຍໄດ້ຢຶດຖືເອົາອາຊີບປູກຝັງ ແລະ ລ້ຽງສັດເປັນຕົ້ນຕໍ່ ນັບຖືສາດສະໜາພຸດ 100% ປະກອບ ມີ 3 ຊົນເຜົ່າ ຄື: ເຜົ່າລາວ, ເຜົ່າຜູ້ໄທ ແລະ ເຜົ່າບຣູມະກອງ. ຈາກນັ້ນ ກໍ່ໄດ້ມີການມອບໃບຢັ້ງຢືນຄອບຄົວ ແລະ ບ້ານສາມັກຄີປອງດອງໃຫ້ແກ່ 12 ບ້ານ ໃຫ້ກຽດມອບໂດຍທ່ານ ລໍາທອງ ຂອບສີລາວົງ ເຈົ້າເມືອງອາດສະພັງທອງ ແລະ ທ່ານ ສິນໄຊ ວົງລະຄອນ ຮອງປະທານແນວລາວສ້າງຊາດແຂວງ ສະຫວັນນະເຂດ ໃຫ້ກຽດມອບ.
Editor: ເມືອງອາດສະພັງທອງ
