ໃນວັນທີ 13 ມີນາ 2018 ນີ້, ຢູ່ທີ່ສະໂມສອນຂອງເມືອງອາດສະພັງທອງ, ແຂວງສະຫວັນນະເຂດ ໄດ້ຈັດພິທີ ປາຖະກະຖາ 2 ວັນປະຫວັດສາດ ຄື: ວັນສ້າງຕັ້ງພັກປະຊາຊົນ ປະຕິວັດລາວ ວັນທີ 22 ມີນາ 1955 ຫາ ວັນທີ 22 ມີນາ 2018 ຄົບຮອບ 63 ປີ ແລະ ວັນຄຽດແຄ້ນຂອງປະຊາຊົນລາວ ວັນທີ 21 ມີນາ 1946 ຫາ ວັນທີ 21 ມີນາ 2018 ຄົບຮອບ 72 ປີ ໂດຍການເຂົ້າຮ່ວມຂອງສະຫາຍ ບົວສີ ເພຍພົມມະລິນ ຫົວໜ້າຄະນະຈັດຕັ້ງປະຈໍາເມືອງອາດສະພັງທອງ, ມີຫົວໜ້າ, ຮອງຫົວໜ້າຫ້ອງການ, ທະຫານ, ຕໍາຫຼວດ, ພະນັກງານ-ລັດຖະກອນອ້ອມຂ້າງເມືອງ, ອໍານາດການປົກຄອງບ້ານ, ເທດສະບານເມືອງເຂົ້າຮ່ວມ.
ໃຫ້ກຽດຂຶ້ນປາຖະກະຖາ ໂດຍສະຫາຍ ບົວສີ ເພຍພົມມະລິນ ຫົວໜ້າຄະນະຈັດຕັ້ງປະຈໍາເມືອງອາດສະພັງທອງ ໂດຍສະຫາຍໄດ້ເວົ້າເຖິງການກໍາເນີດຂອງພັກປະຊາຊົນ ປະຕິວັດລາວ ວັນທີ 22 ມີນາ 1955 ເປັນຕົ້ນມາ, ຜົນສໍາເລັດແຫ່ງການຊີ້ນໍາ-ນໍາພາຂອງພັກປະຊາຊົນ ປະຕິວັດລາວ ໂດຍແບ່ງອອກເປັນ 3 ໄລຍະ ຄື: ໄລຍະແຫ່ງການຕໍ່ສູ້ປົດປ່ອຍຊາດ, ໄລຍະການປົກປັກຮັກສາ ແລະ ສ້າງສາປະເທດຊາດ ແລະ ໄລຍະແຫ່ງການຈັດຕັ້ງປະຕິບັດແນວທາງປ່ຽນແປງໃໝ່ ແລະ ຍັງເວົ້າເຖິງການເສີມຂະຫຍາຍມູນເຊື້ອຂອງພັກປະຊາຊົນ ປະຕິວັດລາວ. ນອກຈາກນັ້ນ, ສະຫາຍ ຍັງໄດ້ປາຖະກະຖາແກ່ວັນຄຽດແຄ້ນຂອງປະຊາຊົນລາວ ວັນທີ 21 ມີນາ 1946 ໂດຍສະຫາຍໄດ້ກ່າວເຖິງສະພາບການກະກຽມການຕໍ່ສູ້ຕ້ານພວກລ່າເມືອງຂຶ້ນຝຣັ່ງຂອງໜ່ວຍພັກເມືອງທ່າແຂກ, ເຫດ
ການ-ການຕໍ່ສູ້ຢ່າງພິລະອາດຫານຂອງທະຫານ ແລະ ປະຊາຊົນຢູ່ເມືອງທ່າແຂກ ແລະ ຄວາມໝາຍຄວາມສໍາຄັນຂອງບັ້ນຮົບປ້ອງກັນຕົວເມືອງທ່າແຂກ.
ທັງນີ້, ເຮັດໃຫ້ພະນັກງານ-ລັດຖະກອນ, ທະຫານ, ຕໍາຫຼວດ ແລະ ອໍານາດການປົກຄອງບ້ານ ໃນເທດສະບານເມືອງ ອາດສະພັງທອງ ໄດ້ຮັບຮູ້ ແລະ ເຊື່ອມຊຶ່ມຕໍ່ກັບ 2 ວັນປະຫວັດສາດດັ່ງກ່າວຫຼາຍຂຶ້ນກວ່າເກົ່າ.
Editor: ເມືອງອາດສະພັງທອງ
