ແຂວງສາລະວັນ ເປັນໜຶ່ງໃນສີ່ແຂວງພາກໃຕ້ຂອງລາວເຮົາ ເຊິ່ງເປັນດິນແດນທີ່ອຸດົມສົມບູນໄປດ້ວຍຊັບພະຍາກອນທຳມະຊາດ ທີ່ຫຼາກຫຼາຍ ແລະ ຂຶ້ນຊື່ລືນາມທາງດ້ານມູນເຊື້ອປະຫວັດສາດ, ວັດທະນະທຳອັນເກົ່າແກ່ທີ່ໜ້າສົນໃຈເປັນຢ່າງຍິ່ງ. ດິນແດນແຫ່ງນີ້ ແມ່ນມີຄວາມສວຍສົດງົດງາມທາງດ້ານທໍາມະຊາດ ເຊິ່ງປະກອບດ້ວຍຄວາມປະສົມປະສານ ຄວາມເກົ່າແກ່ຂອງວັດທະນະທຳທີ່ມີມາແຕ່ດົນນານ. ເມື່ອເວົ້າເຖິງສະຖານທີ່ທ່ອງທ່ຽວທາງທຳມະຊາດແຫ່ງນີ້ ນັ້ນກໍ່ຄືສະຖານທີ່ທ່ອງທ່ຽວ ນໍ້າຕົກຕາດແກ້ງກຸ ທີ່ບົ່ງບອກເຖິງຄວາມອຸດົມສົມບູນຂອງທຳມະຊາດ ແລະ ຄຽງຄູກັບການດຳລົງຊີວິດຂອງປະຊາຊົນທີ່ຍັງອາໄສທຳມະຊາດເປັນສຳຄັນ.
ນໍ້າຕົກຕາດແກ້ງກຸ ເປັນອີກສະຖານທີ່ໜຶ່ງ ທີ່ມີຄວາມໂດດເດັ່ນ ແລະ ສວຍສົດງົດງາມທາງທໍາມະຊາດທີ່ເຕັມໄປດ້ວຍປ່າໄມ້ອັນດົກໜາຂຽວງາມ ເຮັດໃຫ້ອາກາດເຂດນີ້ມີຄວາມສົດຊຸ່ມຊື່ນດີ ຈຶ່ງກາຍເປັນສະຖານທີ່ທ່ອງທ່ຽວໄດ້ຮັບຄວາມນິຍົມຊົມຊອບຈາກນັກທ່ອງທ່ຽວທັງພາຍໃນ ແລະ ຕ່າງປະເທດ ເປັນຈໍານວນບໍ່ໜ້ອຍ. ນໍ້າຕົກຕາດແກ້ງກຸ ຕັ້ງຢູ່ເຂດບ້ານປ່າສັກ, ເມືອງວາປີ ແຂວງສາລະວັນ ເຊິ່ງຫ່າງຈາກເທດສະບານເມືອງ ໄປປະມານ 8 ກິໂລແມັດ. .
ຕາມການບອກເລົ່າຂອງເຈົ້າຖິ່ນເຂດບ້ານປ່າສັກ ໃຫ້ຮູ້ວ່າ ນໍ້າຕົກຕາດແກ້ງກຸ ໄດ້ມີຕໍານານເລົ່າຂານກັນມາວ່າ ແຕ່ກີ້ແຕ່ກ່ອນມີ ຄອບຄົວຂອງພໍ່ເຖົ້າກຸ ເຊິ່ງເປັນຄອບຄົວທີ່ທຸກຍາກ ໄດ້ມາຕັ້ງຖິ່ນຖານພູມລໍາເນົາ ຢູ່ແຄມນໍ້າເຊໂດນ ທີ່ອຸດົມສົມບູນແຫ່ງນີ້ ເຊິ່ງແຕ່ລະມື້ພໍ່ເຖົ້າກຸພ້ອມດ້ວຍຄອບຄົວໄດ້ອາໄສທໍາມາຫາກິນດ້ວຍການລົງຫາປາຢູ່ຕາມແກ້ງ, ມີມື້ໜຶ່ງພໍ່ເຖົ້າກຸ ໄດ້ລົງໄປຫາປາຢູ່ໃນແກ້ງພຽງລໍາພັງ, ໃນຂະນະທີ່ກໍາລັງເພີດເພີນກໍ່ແນມເຫັນປາຢູ່ໃນນໍ້າ, ຊໍ້າພັດໂຊກຮ້າຍຍ່າງໄປໝື່ນກ້ອນຫີນເຮັດໃຫ້ລົ້ມລົງໄປທີ່ແກ້ງແລ້ວກໍເສຍຊີວິດຄາທີ່. ຫລາຍປີຜ່ານມາ ດ້ວຍຄວາມເຄົາລົບນັບຖືພໍ່ເຖົ້າກຸ, ປະຊາຊົນພາຍໃນບ້ານ ຈຶ່ງພາກັນເອີ້ນນໍ້າຕົກຕາດແຫ່ງນີ້ວ່າ: ແກ້ງກຸ ຫລື ນໍ້າຕົກຕາດແກ້ງກຸ ຈົນຮອດປັດຈຸບັນ.

Editor: ເມືອງວາປີ