ກອງປະຊຸມປະຈໍາປີ 2017 ແລະ ວາງທິດທາງແຜນການປີ 2018 ຂອງກອງບັນຊາການ ປກສ ເຂດເສດຖະກິດພິເສດສາມລ່ຽມຄຳ ໄດ້ເປີດຂື້ນໃນວັນທີ 12 ມີນາ 2018 ນີ້ ຢູ່ທີ່ຫ້ອງປະຊຸມກອງບັນຊາການ ປກສ ເຂດເສດຖະກິດພິເສດສາມລ່ຽມຄຳ. ໂດຍການເປັນປະທານຂອງ ທ່ານ ພັນໂທ ມະນີວອນ ຜິວຜາສຸກ, ເລຂາຄະນະພັກຮາກຖານ ຫົວໜ້າກອງບັນຊາການ ປກສ ເຂດເສດຖະກິດພິເສດສາມລ່ຽມຄຳ, ໃຫ້ກຽດເຂົ້າຮ່ວມຂອງ ທ່ານ ພັນເອກ ປະລິຍາເອກ ຖາວອນ ອິນທະວົງ ເລຂາຄະນະພັກ ຫົວໜ້າກອງບັນຊາການ ປກສ ແຂວງບໍ່ແກ້ວ, ມີບັນດາຫົວໜ້າພະແນກ, ຮອງພະແນກ, ພະນັກງານ-ນັກຮົບກອງບັນຊາການ ປກສ ເຂດ ແລະ ແຂກຖືກເຊີນເຂົ້າຮ່ວມ.
ໃນພິທີ ທ່ານ ພັນໂທ ວຽງມະນີ ແພງເຈື້ອຫຼ້າ ຮອງຫົວໜ້າກອງບັນຊາການ ປກສ ເຂດ ກໍ່ໄດ້ຂື້ນຜ່ານບົດສະຫຼຸບປະຈຳປີ 2017 ແລະ ວາງທິດທາງແຜນການປີ 2018. ໃນໄລຍະ 1 ປີທີ່ຜ່ານມາ ມີຄົນເຂົ້າ-ອອກ ເມືອງທັງໝົດ 57,485 ຄົນ, ຍິງ 21,596 ຄົນ, ຄົນອອກມີ 56,006 ຄົນ, ຍິງ 21.540 ຄົນ, ມີ 27 ສັນຊາດ, ເຮັດບັດພັກເຊົາໃຫ່ມ ມີ 2.064 ຄົນ, ຍິງ 914 ຄົນ, ອອກໃບຜ່ານແດນ 3.123, ຍິງ 1.849 ຄົນ, ຄົນເຂົ້າ-ອອກ ດອນຊາວມີ 250.637 ຄົນ, ມີຄະດີເກີດຂື້ນທັງໝົດ 33 ເລື່ອງ, ມີຜູ້ຖືກຫາ 47 ຄົນ, ຍິງ 06 ຄົນ, ຄະດີເສດຖະກິດ-ຢາເສບຕິດ ມີ 12 ເລື່ອງ, ມີຜູ້ຖືກຫາ 21 ຄົນ, ຍິງ 05 ຄົນ, ຂອງກາງຢາບ້າ ຈໍານວນ 402 ເມັດ, ຫົວນຳ້ແຂງ 23 ຫຼອດນ້ອຍ, ເງິນໂດລາປອມ 1000 ໂດລາ ແລະ ຄະດີລັກສັບພົນລະເມືອງມີ 12 ເລື່ອງ ຜູ້ຖືກຫາ 26 ຄົນ.
ທິດທາງແຜນການປີ 2018 ແມ່ນຈະສືບຕໍ່ປະຕິບັດ 4 ຄາດໝາຍ 4 ໜ້າທີ່ ແລະ ການພົວພັນຂອງວຽກງານປ້ອງກັນຄວາມສະຫງົບ, ສືບຕໍ່ສູ້ຊົນປະຕິບັດ 4 ຄາດໝາຍໃຫ້ປະສົບຜົນສຳເລັດ, ສຸມໃສ່ຈັດຕັ້ງປະຕິບັດ 13 ແຜນວຽກງານຍຸດທະສາດຂອງກຳລັງປ້ອງກັນຄວາມສະຫງົບວາງອອກ, ວຽກງານກໍ່ສ້າງຮາກຖານ, ຄຸ້ມຄອງຄົນຕ່າງປະເທດ ແລະ ເຂົ້າ-ອອກເມືອງ, ວຽກງານສະກັດກັ້ນ ແລະ ຕ້ານປະກົດການຫຍໍ້ທໍ້ໃນສັງຄົມ, ວຽກງານສະກັດກັ້ນຢາເສບຕິດ, ວຽກງານປັບປຸງກໍ່ສ້າງ ແລະ ປົກປັກຮັກສາກຳລັງປ້ອງກັນຄວາມສະຫງົບ.
ຕອນທ້າຍກອງປະຊຸມຍັງໄດ້ຮັບຟັງຄໍາໂອລົມຂອງທ່ານ ພັນເອກ ປະລິຍາເອກ ຖາວອນ ວິນທະວົງ ກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ຜົນງານທີ່ກອງບັນຊາການ ປກສ ເຂດ ຍາດມາໄດ້ໃນໄລຍະທີ່ຜ່ານມາ. ພ້ອມກັນນັ້ນ, ກໍ່ໄດ້ເນັ້ນໜັກໃຫ້ຄະນະພັກ-ຄະນະບັນຊາກອງບັນຊາການ ປກສ ເຂດ ເພີ່ມທະວີເອົາໃຈໃສ່ສຶກສາ-ອົບຮົມການເມືອງ-ນຳພາແນວຄິດໃຫ້ພະນັກງານ-ນັກຮົບ ໃຫ້ຖືເປັນວຽກງານສຳຄັນ ແລະ ເຮັດຢ່າງຕໍ່ເນື່ອງ ເພື່ອເຮັດໃຫ້ສະມາຊິກພັກ ແລະ ພະນັກງານນັກຮົບມີແນວຄິດຫຼັກໝັ້ນ ການເມືອງໜັກແໜ້ນ ມີສະຕິຕໍ່ການຈັດຕັ້ງ ຮູ້ທັນທຸກກົນອຸບາຍ ເລ່ລ່ຽມຂອງກຸ່ມຄົນບໍ່ດີ ທີ່ຫວັງກໍ່ຄວາມບໍ່ສະຫງົບ ຄວາມບໍ່ເປັນລະບຽບຮຽບຮ້ອຍຂອງສັງຄົມ ເອົາໃຈໃສ່ປະຕິບັດໜ້າທີ່ວິຊາສະເພາະຢ່າງຕັ້ງໜ້າດ້ວຍຄວາມຮັບຜິດຊອບສູງ.
Editor: ແຂວງບໍແກ້ວ
