ກອງປະຊຸມຄົບຄະນະ ໃນຂົງເຂດວັດທະນະທໍາ-ສັງຄົມເມືອງທ່າແຕງ ປະຈໍາໄຕມາດ 3 ເດືອນ ຄັ້ງທີ 1 ປີ 2018 ເມືອງທ່າແຕງ ໄດ້ຈັດຂື້ນເມື່ອບໍ່ດົນມານີ້, ຢູ່ທີ່ຫ້ອງປະຊຸມຊັ້ນສອງຫ້ອງວ່າການປົກຄອງເມືອງທ່າແຕງ, ແຂວງເຊກອງ ໂດຍພາຍໃຕ້ການເປັນປະທານຂອງ ທ່ານ ຄໍາໄພ ສິມມາວັດ ຄະນະປະຈໍາພັກເມືອງ ຮອງເຈົ້າເມືອງທ່າແຕງ, ຜູ້ຊີ້ນໍາຂົງເຂດວັດທະນະທໍາ-ສັງຄົມ, ມີຫົວໜ້າ-ຮອງຫ້ອງການ, ຜູ້ຕາງໜ້າຈາກຂະແໜ່ງການກ່ຽວຂ້ອງ ພ້ອມດ້ວຍເຂດຈຸດສຸ່ມພັດທະນາ ທີ 2 ແລະ ແຂກຖືກເຊີນເຂົ້າຮ່ວມ.
ກອງປະຊຸມຄັ້ງນີ້ ໄດ້ຄົ້ນຄວ້າ, ປຶກສາຫາລື ແລະ ຕີລາຄາຜົນການຈັດຕັ້ງປະຕິບັດຊີ້ນໍາ-ນໍາພາຮອບດ້ານປະຈໍາໄຕມາດ 3 ເດືອນ, ນັບແຕ່ເດືອນມັງກອນ ຫາເດືອນ ມີນາ ນີ້ ແລະ ທິດທາງສໍາລັບ 3 ເດືອນ, ເມສາ ຫາ ເດືອນ ມິຖຸນາ ປີ 2018 ຂອງບັນດາຂະແໜ່ງການ-ຫ້ອງການທີ່ນອນ ຢູ່ໃນຂົງເຂດວັດທະນະທໍາ-ສັງຄົມ ພາຍໃນເມືອງທ່າແຕງ, ໂດຍສະເພາະ ຂະແໜ່ງຖະແຫຼ່ງຂ່າວ,ວັດທະນະທໍາ ແລະ ທ່ອງທ່ຽວ, ສຶກສາທິການແລະກິລາ, ສາທາລະນະສຸກ, ສະຫວັດດີການ ແລະສັງຄົມ, ໄປສະນີໂທລະຄົມ, ເຕັກໂນໂລຊີ ແລະ ຫ້ອງການກາແດງ ພ້ອມວຽກງານເຂດຈຸດສຸ່ມພັດທະນາທີ 2 ໃນໄລຍະ 3 ເດືອນຜ່ານມາ, ໄດ້ຈັດຕັ້ງປະຕິບັດວຽກງານຮອບດ້ານ ເຊິ່ງໄດ້ຍົກຜົນງານທີ່ພົ້ນເດັ່ນ ພາຍໃຕ້ການຊີ້ນຳ-ນຳພາ ແລະ ເປັນຄວາມຮັບຜິດຊອບຂອງຄະນະພັກແຕ່ລະຂັ້ນມີຄວາມຮັບຜິດຊອບສູງ, ແຕ່ລະຂະແໜ່ງແມ່ນໄດ້ເອົາໃຈໃສ່ເປັນເຈົ້າການສະກັດກັ້ນປະກົດການຫຍໍ້ທໍ້ຕ່າງໆພາຍໃນກົມກອງທີ່ຂື້ນກັບຄວາມຮັບຜິດຊອບຂອງຕົນຢ່າງໜັກແໜ້ນ, ເຮັດໃຫ້ແຕ່ລະຂະແໜ່ງການມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພ ທີ່ຕິດກັບວິຊາສະເພາະຂອງແຕ່ລະກົມກອງ-ຫ້ອງການ, ເຊິ່ງກອງປະຊຸມໄດ້ປະກອບຄໍາຄິດເຫັນໃສ່ແຕ່ລະຂະແໜ່ງການ ພ້ອມທັງຍົກເອົາຫຼາຍບັນຫາເພື່ອນຳມາພິຈາລະນາ, ຄົ້ນຄ້ວາ ນັບທັງຂໍ້ຂາດຕົກບົກຜ່ອງ, ບົດຮຽນທີ່ຖອດຖອນໄດ້ຂອງຄະນະພັກໃນແຕ່ລະຫ້ອງການ ພ້ອມທັງຮັບເອົາຄໍາສະເໜີຂອງແຕ່ລະຂະແໜ່ງການທີ່ຈໍາເປັນນໍາໄປແກ້ໄຂໃນຕໍ່ໜ້າ.
ໂອກາດນີ້ ທ່ານ ຄໍາໄພ ສິມມາວັດ ຄະນະປະຈໍາພັກເມືອງ ຮອງເຈົ້າເມືອງທ່າແຕງ ຜູ້ຊີ້ນໍາຂົງເຂດວັດທະນະທໍາ-ສັງຄົມ ໄດ້ຕີລາຄາສູງຕໍ່ຄະນະພັກທຸກຂັ້ນ ພ້ອມເນັ້ນໃຫ້ເອົາໃຈໃສ່ຊີ້ນໍາ-ນໍາພາແຕ່ລະໜ້າວຽກທີ່ຂື້ນກັບຄວາມຮັບຜິດຊອບຂອງຕົນໃຫ້ດີຂື້ນກວ່າເກົ່າ ຖືເອົາການດໍາເນີນຊີວິດການເມືອງພາຍໃນຈຸພັກຂອງແຕ່ລະກົມກອງ, ປັບປຸງແບບແຜນການນໍາພາຂອງພັກໃຫ້ມີຄວາມໜັກແໜ້ນ ແລະ ເຂັ້ມແຂງທາງດ້ານການຈັດຕັ້ງ, ບັນດາຫ້ອງການ,ໜ່ວຍງານ, ບຸກຄະລາກອນໃຫ້ສຸ່ມໃສ່ຜັນຂະຫຍາຍທຸກມະຕິຄໍາສັ່ງຂອງຂັ້ນເທິງວາງອອກ, ຕັ້ງໜ້າຫັນລົງຮາກຖານຢ່າງແຂງແຮງເປັນປົກກະຕິຕໍ່ເນື່ອງ,ສ້າງຂະບວນການແຂ່ງຂັນປະຕິບັດໜ້າທີ່ຂອງຕົນເອງໃຫ້ສໍາເລັດ, ບັນດາຂະແໜ່ງການ ຕ້ອງມີການກວດກາ,ວາງແຜນການ, ຄຸ້ມຄອງບຸກຄະລາກອນໃຫ້ໄດ້ຄຸນນະພາບ ເພື່ອເຮັດໃຫ້ພະນັກງານພາຍໃນກົມກອງຫ້ອງການໄດ້ປະຕິບັດວຽກງານຂອງຂັ້ນເທິງວາງອອກໃຫ້ດີຂື້ນກວ່າເກົ່າ
ທີມຂ່າວ ຖວທ ເມືອງທ່າແຕງ
Editor: ກຳປານາດ ລັດຖະເຮົ້າ
