ເພື່ອຜັນຂະຫຍາຍຜົນສໍາເລັດຂອງລະບົບກອງທຶນພັດທະນາບ້ານ ແລະ ເຄື່ອຂ່າຍການສະ ໜັບສະໜູນ ລະບົບ ການຈັດຕັ້ງ ແລະ ຮູບແບບການລົງທຶນຮ່ວມກັບຊາວກະສິກອນ, ການຈັດຕັ້ງພາກລັດ ແລະ ຜູ້ປະກອບ ການ. ດັ່ງນັ້ນ, ໃນທ້າຍອາທິດຜ່ານມາ, ກະຊວງແຜນການ ແລະ ການລົງທຶນ ຮ່ວມກັບ ກອງທຶນສາກົນເພື່ອການ ພັດທະນາກະສິກໍາ ຫລື ອິຟັດ (IFAD) ໄດ້ຈັດກອງປະຊຸມປຶກສາຫາລືກ່ຽວກັບການສ້າງຍຸດທະສາດການຮ່ວມມື ລະຫວ່າງ ສປປ ລາວ ແລະ ອົງການກອງທຶນສາກົນເພື່ອການພັດທະນາກະສິກໍາ ໃນໄລຍະປີ 2018-2024 ຂຶ້ນທີ່ຫ້ອງປະຊຸມ ໂຮງແຮມເສດຖາພາເລດສ໌, ນະຄອນຫຼວງວຽງຈັນ ໃຫ້ກຽດເປັນປະທານ ໂດຍ ທ່ານ ປອ. ກິແກ້ວ ຈັນທະບູຣີ ຮອງລັດຖະມົນຕີກະຊວງແຜນການ ແລະ ການລົງທຶນ, ທ່ານ ໂທມັດຣັດ ຜູ້ປະສານງານອີຟັດ ປະຈໍາພາກພື້ນ, ທັງເປັນຜູ້ບໍລິຫານ ອີຟັດ ປະຈໍາ ສປປ ລາວ. ມີບັນຫົວໜ້າກົມ-ຮອງກົມ, ຜູ້ຕາງ ໜ້າອົງການອາຫານ ແລະ ການກະເສດ FAO, ຜູ້ປະສານງານໂຄງການ ພ້ອມດ້ວຍແຂກຖືກເຊີນເຂົ້າຮ່ວມ.
ໃນທີປະຊຸມ ທ່ານ ໂທມັດ ຣັດ ຜູ້ປະສານງານອີຟັດ ປະຈໍາພາກພື້ນ, ທັງເປັນ ຜູ້ບໍລິຫານ ອີຟັດ ປະຈໍາ ສປປ ລາວ ໄດ້ຂຶ້ນລາຍງານແລກປ່ຽນບັນດາຜົນສໍາເລັດທີ່ສໍາຄັນ, ສິ່ງທ້າທ້າຍ ແລະ ການຈັດຕັ້ງປະຕິບັດ ນະວັດຕະກໍາທີ່ ເປັນຕົວແບບເປັນບົດຮຽນຊື່ງຖອດຖອນໄດ້ຈາກ ກອງປະຊຸມປຶກສາຫາລື ກ່ຽວກັບ ການສ້າງຍຸດທະສາດການ ຮ່ວມມື ລະຫວ່າງປີ 2011-2016 ຊື່ງຖືໄດ້ວ່າເປັນປັດໃຈສໍາຄັນສໍາລັບກອງປະຊຸມປຶກສາຫາລືກັນໃນຄັ້ງນີ້. ນອກນັ້ນ ທ່ານ ໂທມັດ ຣັດ ຍັງໄດ້ສະເໜີບັນຫາຕ່າງໆ ແລະ ແລກປ່ຽນບົດຮຽນເຊິ່ງກັນ ແລະກັນ ໃນກອງ ປະຊຸມຕື່ມອີກ. ກ່ຽວກັບຮ່າງແນວຄວາມຄິດແຜນຍຸດທະສາດທີ່ອີ່ງໃສ່ຜົນໄດ້ຮັບ ແລະ ແຜນຍຸດທະສາດການ ຮ່ວມມື ລະຫວ່າງ ລັດຖະບານລາວ ແລະ ກອງທຶນສາກົນເພື່ອການພັດທະນາກະສິກໍາ ສໍາລັບປີ 2018-2024.
ໂອກາດນີ້, ບັນດາຜູ້ແທນກອງປະຊຸມໄດ້ ພ້ອມກັນປຶກສາຫາລື ແລະ ແລກປ່ຽນຄໍາຄິດຄໍາເຫັນ ຕໍ່ກອງປະຊຸມ ດັ່ງກ່າວໂດຍສະເພາະ ແມ່ນບັນດາຍຸດທະສາດກ່ຽວກັບຊາວກະສິກອນຂະໜາດນ້ອຍ ຈະຕ້ອງໄດ້ຮັບການ ຍົກລະດັບໃນການຮັບມືກັບໄພທໍາມະຊາດ ແລະ ປັບປຸງວຽກງານການຄໍ້າ ປະກັນດ້ານສະບຽງອາຫານ ແລະ ໂພສະນາການ. ພ້ອມນີ້, ກໍ່ຕ້ອງໄດ້ຮັບການຍົກລະດັບຄວາມສາມາດ ເຂົ້າເຖິງການບໍລິການດ້ານການເງິນ ແລະ ການຕະຫຼາດນໍາອີກ.
Editor: ກຳປານາດ ລັດຖະເຮົ້າ
