ຢູ່ທີ່ສະໂມສອນ ຂອງເມືອງວັງວຽງ ແຂວງວຽງຈັນ. ໄດ້ເປີດກອງປະຊຸມຄົບຄະນະບໍລິຫານງານພັກເມືອງ ຄັ້ງທີ 7 ສະໄໝທີ 6 ຂຶ້ນຢ່າງເປັນທາງການ. ໂດຍການເປັນປະທານຂອງ ສະຫາຍ ຄຳຜອງ ດວງວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ, ກອງປະຊຸມໄດ້ເປັນກຽດຕ້ອນຮັບການເຂົ້າຮ່ວມຂອງ ສະຫາຍ ບຸນສອນ ເພັດລາວັນ ຄະນະປະຈຳພັກແຂວງ ຮອງເຈົ້າແຂວງໆວຽງຈັນ, ມີບັນດາສະຫາຍຄະນະບໍລິຫານງານພັກເມືອງ, ພະນັກງານອາວຸໂສບຳນານ, ຫົວໜ້າຫ້ອງການ, ແຂກຖືກເຊີນ, ເລຂາຄະນະພັກກຸ່ມບ້ານ – ເລຂາໜ່ວຍພັກພາຍໃນເມືອງເຂົ້າຮ່ວມຢ່າງພ້ອມພຽງ.
ໃນວາລະດໍາເນີນກອງປະຊຸມ ສະຫາຍ ຄໍາຜອງ ດວງວິໄລ ກໍາມະການພັກແຂວງ ເລຂາພັກເມືອງ ເຈົ້າເມືອງໆວັງວຽງ ຍັງໄດ້ໃຫ້ກຽດກ່າວເປີດກອງປະຊຸມຄົບຄະນະບໍລິຫານງານພັກເມືອງ ຄັ້ງທີ 7 ສະໄໝທີ 6 ຢ່າງເປັນທາງການ. ກອງປະຊຸມຍັງໄດ້ຮັບຟັງ ບົດລາຍງານທົບທວນຄືນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ກາງສະໄໝຂອງກອງປະຊຸມໃຫຍ່ຄັ້ງທີ 6ອົງຄະນະພັກເມືອງວັງວຽງ ແລະ ທິດທາງແຜນການ, ຜ່ານບົດລາຍງານສະພາບການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານຕິດພັນກັບວຽກງານ 3 ສ້າງ ປີ 2017 ແລະ ທິດທາງແຜນການ, ຜ່ານບົດລາຍງານສະພາບການປັບປຸງການຈັດຕັ້ງພັກ-ລັດ ແລະ ທິດທາງແຜນການໃນການປັບປຸງ ແລະ ກະກຽມດຳເນີນກອງປະຊຸມໃຫຍ່ຄັ້ງທີ 7 ຂອງອົງຄະນະພັກເມືອງ. ເຊິ່ງມັນສະແດງອອກໃນໄລຍະ 1 ປີຜ່ານມາ ຄະນະພັກ – ອົງການປົກຄອງທຸກຂັ້ນໄດ້ຖືສຳຄັນຕໍ່ວຽກງານການສຶກສາອົບຮົມການເມືອງນຳພາແນວຄິດ ເຮັດໃຫ້ສະມາຊິກພັກ, ພະນັກງານ – ລັດຖະກອນ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ ມີຄວາມຮັບຮູ້ເຂົ້າໃຈຕໍ່ແນວທາງນະໂຍບາຍຂອງພັກ, ມະຕິ, ຄຳສັ່ງ ລະບຽບກົດໝາຍຂອງລັດວາງອອກໃນແຕ່ລະໄລຍະ, ໂດຍມີການຈັດຕັ້ງເຊື່ອມຊືມ, ໂຄສະນາເຜີຍແຜ່, ຈັດຕັ້ງປາຖະກະຖາວັນສຳຄັນຕ່າງໆຂອງພັກ, ຂອງຊາດໃຫ້ແກ່ພະນັກງານຫຼັກແຫຼ່ງໃນຂັ້ນຕ່າງໆຢ່າງທົ່ວເຖິງ. ເມືອງວັງວຽງມີ 6 ກຸ່ມບ້ານ, ມີ 1.079 ຄົວເຮືອນ, ມີພົນລະເມືອງທັງໝົດ 60.026 ຄົນ, ຍິງ 29.528 ຄົນ, ການຂະຫຍາຍຕົວເສດຖະກິດຢູ່ໃນລະດັບ 8,5 - 9 % ຕໍ່ປີ, ມີມູນຄ່າ 1.255 ຕື້ກ່ວາກີບ, ສະເລ່ຍຕໍ່ຫົວຄົນໄດ້ປະມານ 2.527 ໂດລາ/ຄົນ/ປີ ຫຼື ເທົ່າກັບ 20 ລ້ານກວ່າກີບ/ຄົນ/ປີ. ການຂະຫຍາຍຕົວຂອງລວມຍອດຜະລິດຕະພັນພາຍໃນ ( GDP ) ເພີ່ມຂຶ້ນເປັນ 15,5 %, ກະສິກໍາປ່າໄມ້ເພີ່ມຂຶ້ນເປັນ 11 %, ອຸດສາຫະກໍາເພີ່ມຂຶ້ນເປັນ 8,31 % ແລະ ບໍລິການເພີ່ມຂຶ້ນ ເປັນ 22,8%, ສຳລັບການຜະລິດເຂົ້າເປືອກ 77,188 ໂຕນ, ການຊົມໃຊ້ໄຟຟ້າ 100% , ປະກາດບ້ານວັດທະນະທໍາໄດ້ 33 ບ້ານ, ໜ່ວຍພັກແຂງ- ຮູ້ນຳພາຮອບດ້ານໄດ້ 74 ໜ່ວຍ , ປະກາດບ້ານພັດທະນາໄດ້ 22 ບ້ານ. ຊຸກຍູ້ການລ້ຽງສັດໃຫຍ່ ຄວາຍ, ງົວ, ໝູ່, ແບ້ ມີການຂະຫຍາຍຕົວທຽບໃສ່ແຜນການໄດ້ 73,23 ສັດປີກໄດ້ 84,48 ແລະ ການຜະລິດຊີ້ນ ແລະ ປາໄດ້ 106,86 ລືນຄາດໝາຍ.
ສໍາລັບທິດທາງແຜນການ 2 ປີ ໃນຕໍ່ໜ້າຈະສືບຕໍ່ນຳເອົາເນື້ອໃນຈິດໃຈມະຕິກອງປະຊຸມໃຫຍ່ຄັ້ງທີ 10 ຂອງພັກ, ມະຕິກອງປະຊຸມໃຫຍ່ຄັ້ງທີ 5 ຂອງອົງຄະນະພັກແຂວງ ວຽງຈັນ, ມະຕິກອງປະຊຸມໃຫຍ່ຄັ້ງທີ 6 ຂອງອົງຄະນະພັກເມືອງ ແລະສືບຕໍ່ປັບປຸງ ແລະ ສ້າງແຜນກຳນົດພະນັກງານເພື່ອກະກຽມໃຫ້ກອງປະຊຸມ 3 ຂັ້ນໃນທ້າຍປີ 2018 ໃຫ້ເປັນລະບົບ, ເອກະສານສຳຄັນຕ່າງໆໄປຈັດຕັ້ງຜັນຂະຫຍາຍ, ເພີ່ມທະວີການເຮັດໜ້າທີ່ວຽກງານ ປກສ – ປກຊ ທົ່ວປວງຊົນຮອບດ້ານຂອງພັກໃຫ້ມີຄວາມສະຫງົບປອດໄພ, ສືບຕໍ່ສູ້ຊົນເສດຖະກິດມະຫາພາກຂະຫຍາຍຕົວ 9,5%, ການຜະລິດເຂົ້າໃຫ້ໄດ້ 29.523 ໂຕ່ນ, ສະເລ່ຍລາຍຮັບຕໍ່ຫົວຄົນ 478 ກິໂລ/ຄົນ/ປີ, ລາຍໄດ້ສະເລ່ຍຫົວຄົນໄດ້ 20 ລ້ານກວ່າກີບ/ປີ, ເປັນເງີນໂດລາສະຫາລັດ 2.500 ໂດລາ/ຄົນ/ປີ
ພ້ອມນັ້ນຜູ້ແທນທີ່ເຂົ້າຮ່ວມກອງປະຊຸມແຕ່ລະສະຫາຍ ກໍ່ຍັງໄດ້ປະກອບຄໍາ ຄິດຄໍາ ເຫັນຢ່າງກົງໄປກົງມາ ກ່ຽວກັບວຽກງານ ປກສ-ປກຊ, ວຽກງານສ້າງໜ່ວຍພັກຮູ້ນຳພາຮອບດ້ານ, ວຽກງານການພັດທະນາເສດຖະກິດຕິດພັນກັບການພັດທະນາຊົນນະບົດຕາມທິດນຳ 3 ສ້າງ, ວຽກງານຄຸ້ມຄອງການທ່ອງທ່ຽວ, ວຽກງານໂຄສະນາເຜີຍແຜ່ກົດໝາຍແລະການດຳເນີນຄະດີ. ໃນການຈັດຕັ້ງປະຕິບັດໃນໄລຍະຜ່ານມາ ໃຫ້ມີຄວາມຖືກຕ້ອງຊັດເຈນ, ເພື່ອພ້ອມກັນ ຊອກຫາວິທີທາງແກ້ໄຂ ດ້ານອ່ອນ ແລະ ຂໍ້ຄົງຄ້າງໃຫ້ໝົດໄປໃນຕໍ່ໜ້າ.
ກອງປະຊຸມຍັງໄດ້ຮັບຟັງການໂອ້ລົມຂອງ ສະຫາຍ ບຸນສອນ ເພັດລາວັນ ຄະນະປະຈໍາ ພັກແຂວງ ຮອງເຈົ້າແຂວງໆວຽງຈັນ, ເຊິ່ງສະຫາຍໄດ້ກ່າວສະແດງຄວາມຍ້ອງຍໍຊົມ ເຊີຍ ພ້ອມທັງຕີລາຄາສູງຕໍ່ຜົນສຳເລັດໃນແຕ່ລະຂົງເຂດວຽກງານຕື່ມອີກ
Editor: ກຳປານາດ ລັດຖະເຮົ້າ
