ໃນຕອນເຊົ້າ ວັນທີ 22 ມີນາ 2018, ກອງປະຊຸມລັດຖະບານ ເປີດກວ້າງ ຄັ້ງທີ 1 ປະຈໍາປີ 2018 ໄດ້ໄຂຂຶ້ນເປັນທາງການ ຢູ່ເມືອງວຽງໄຊ ແຂວງຫົວພັນ ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາ ທ່ານຮອງນາຍົກລັດຖະມົນຕີ, ສະມາຊິກລັດຖະບານ, ເຈົ້າຄອງນະຄອນຫລວງວຽງຈັນ ແລະ ບັນດາເຈົ້າແຂວງ, ຜູ້ຕາງໜ້າ ອົງການຈັດຕັ້ງພັກ, ສະພາແຫ່ງຊາດ, ສານປະຊາຊົນສູງສຸດ, ອົງການໄອຍະການ ປະຊາຊົນສູງສຸດ, ສູນກາງແນວລາວສ້າງຊາດ, ອົງການຈັດຕັ້ງ ມະຫາຊົນຂັ້ນສູນກາງ, ພ້ອມດ້ວຍແຂກ ຖືກເຊີນເຂົ້າຮ່ວມ ຈໍານວນ 450 ທ່ານ.
ກອງປະຊຸມລັດຖະບານ ເປີດກວ້າງຄັ້ງນີ້, ເປັນກອງປະຊຸມສັນຈອນ ເທື່ອທໍາອິດ ທີ່ມີລັກສະນະພິເສດ ຂອງ ຄະນະລັດຖະບານ ຊຸດ ທີ 8, ເຊິ່ງໄດ້ຈັດຂຶ້ນ ໃນໄລຍະເວລາທີ່ພໍດີ ກັບວັນສ້າງຕັ້ງພັກ 22 ມີນາ ຄົບຮອບ 63 ປີ (22 ມີນາ 1955-22 ມີນາ 2018). ໃນໂອກາດ ກ່າວເປີດກອງປະຊຸມ ທ່ານ ນາຍົກລັດຖະມົນຕີ ໄດ້ກ່າວບາງຕອນ ສຳຄັນວ່າ: ຈຸດປະສົງ ຂອງການຈັດກອງປະຊຸມ ລັດຖະບານ ຢູ່ ເມືອງວຽງໄຊ ໃນຄັ້ງນີ້, ເນື່ອງຈາກວ່າ ສະຖານທີ່ດັ່ງກ່າວ ເປັນສະຖານທີ່ ທີ່ມີຄວາມໝາຍ, ຄວາມສໍາຄັນຍິ່ງ, ເປັນຖິ່ນກໍາເນີດຂອງສູນບັນຊາສູ້ຮົບ ແລະ ຖານທີ່ໝັ້ນຂອງການປະຕິວັດ, ທັງເປັນຈຸດກໍາເນີດ ຂອງ ສປປ ລາວ. ປີນີ້, ຍັງເປັນປີກະກຽມການ ສະເຫລີມສະຫລອງວັນສ້າງຕັ້ງ ເມືອງວຽງໄຊ ຄົບຮອບ 50 ປີ (30 ພະຈິກ 1968-30 ພະຈິກ 2018). ພ້ອມກັນນີ້, ກໍເປັນປີທີ່ພວກເຮົາ ຫາກໍ່ສະເຫລີມສະຫລອງ ວັນປົດປ່ອຍຜາຖີ່ ຄົບຮອບ 50 ປີ (11 ມີນາ 1968-11 ມີນາ 2018). ສິ່ງສໍາຄັນກວ່ານັ້ນ ແມ່ນການສ້າງເງື່ອນໄຂ ໃຫ້ພວກເຮົາໝົດທຸກຄົນ ໄດ້ທົບທວນ ແລະ ລໍ້າລຶກເຖິງບຸນຄຸນ ອັນໃຫຍ່ຫລວງ ສູງສົ່ງ ຂອງຜູ້ນໍາປະຕິວັດ, ບຸນຄຸນຂອງການປະຕິວັດ, ບຸນຄຸນອັນໃຫຍ່ຫລວງ ທີ່ຝັ່ງໄວ້ໃນຫົວໃຈ ຂອງປະຊາຊົນລາວ ຕະຫລອດໄປ, ໂດຍສະເພາະ ແມ່ນຜູ້ເສຍສະຫລະ ເພື່ອພາລະກິດ ຂອງການປະຕິວັດປົດປ່ອຍຊາດ, ປົດປ່ອຍປະຊາຊົນອອກຈາກ ການຄອບຄອງຂອງຈັກກະພັດລ່າເມືອງຂຶ້ນ ເຊິ່ງ ນໍາມາເຖິງປັດຈຸບັນຄື: ການປົກປັກຮັກສາ ແລະ ພັດທະນາ ສປປ ລາວ ຂອງພວກເຮົາ.
ສໍາລັບ ໃນກອງປະຊຸມທີ່ຈະນໍາ ມາຄົ້ນຄວ້າ, ປຶກສາຫາລືກັນ ໃນກອງປະຊຸມລັດຖະບານ ເປີດກວ້າງຄັ້ງນີ້, ບັນດາຜູ້ເຂົ້າຮ່ວມ ຈະໄດ້ຮັບຟັງ ແລະ ປະກອບຄໍາເຫັນ ຢ່າງກົງໄປກົງມາ ຕໍ່ການເຜີຍແຜ່ແນະນໍາ ແລະ ຊຸກຍູ້ ແຕ່ຫົວທີ ກ່ຽວກັບການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ ແລະ ແຜນງົບປະມານ ແຫ່ງລັດ ປະຈໍາປີ 2018 ເຊິ່ງກວມເອົາບັນຫາຫົວຂໍ້ດັ່ງຕໍ່ໄປນີ້: ການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ ປະຈໍາປີ 2018, ບັນດາໂຄງການຈຸດສຸມ ພັດທະນາຂອງລັດຖະບານ ຢູ່ສູນກາງ ແລະ ທ້ອງຖິ່ນ, ການປັບປຸງຄວາມສະດວກ ໃນການດໍາເນີນທຸລະກິດ ແລະ ການລົງທຶນ ຜ່ານປະຕູດຽວ; ການຜັນຂະຫຍາຍຜົນ ແລະ ການຈັດຕັ້ງປະຕິບັດ ແຜນການຮ່ວມມືລາວ-ຫວຽດນາມ, ການຜັນຂະຫຍາຍ ແລະ ການຈັດຕັ້ງປະຕິບັດ ແຜນການຮ່ວມມືລາວ-ຈີນ; ສະພາບການຈັດຕັ້ງປະຕິບັດ ແຜນງົບປະມານແຫ່ງລັດ ປະຈໍາ 2 ເດືອນ, ຄາດຄະເນ ງວດ 1 ແລະ ຄາດຄະເນ 6 ເດືອນຕົ້ນປີ 2018 ແລະ ທິດທາງແຜນການ ປີ 2018; ການຈັດຕັ້ງປະຕິບັດແຜນ ພັດທະນາຊົນນະບົດ ແລະ ລຶບລ້າງ ຄວາມທຸກຍາກ. ການສົ່ງເສີມ ການຜະລິດເປັນສິນຄ້າ ແລະ ຄໍ້າປະກັນສະບຽງອາຫານ; ການຄຸ້ມຄອງລາຄາສິນຄ້າ ແລະ ການບໍລິການ, ການດັດສົມໂຮງງານປຸງແຕ່ງໄມ້, ການສົ່ງເສີມວິສາຫະກິດ ຂະໜາດນ້ອຍ ແລະ ຂະ ໜາດກາງ; ສະພາບການຈັດຕັ້ງ ປະຕິບັດປີທ່ອງທ່ຽວລາວ 2018; ຄວາມຄືບໜ້າ ໃນການກະກຽມ ສະເຫລີມສະຫລອງວັນສ້າງຕັ້ງ ເມືອງວຽງໄຊ ຄົບຮອບ 50 ປີ.
ເພື່ອຮັບປະກັນ ໃຫ້ກອງປະຊຸມ ມີປະສິດທິຜົນ ແລະ ບັນລຸຄາດໝາຍ ທ່ານນາຍົກລັດຖະມົນຕີ ໃນນາມປະທານ ກອງປະຊຸມ ໄດ້ແຈ້ງໃຫ້ລາຍງານ ຕາມວາລະທີ່ໄດ້ກໍານົດໄວ້ກ່ອນ, ຫລັງຈາກນັ້ນຈຶ່ງປະກອບຄໍາເຫັນ ຕາມພາຍຫລັງ. ພ້ອມດຽວກັນນີ້, ຍັງໄດ້ຮຽກຮ້ອງ ມາຍັງຜູ້ແທນກອງປະຊຸມ ຈົ່ງຍົກສູງຄວາມຮັບຜິດຊອບ ຂອງຕົນ ເຂົ້າໃນການປະກອບຄໍາເຫັນ ຢ່າງກົງໄປກົງມາ, ກະທັດຮັດ ແລະ ມີຈຸດສຸມ ໂດຍລົງເລິກເຖິງຂໍ້ຄົງຄ້າງ ທີ່ຍັງປະຕິບັດບໍ່ທັນໄດ້ດີ, ວິເຄາະວິໄຈ ເຖິງສາຍເຫດ ແລະ ສະເໜີທິດທາງ, ມາດຕະການແກ້ໄຂຕົວຈິງ ເພື່ອຮັບປະກັນ ການຄຸ້ມຄອງ ແລະ ບໍລິຫານປະເທດ ດໍາເນີນໄປດ້ວຍ ປະສິດທິພາບ ແລະ ມີປະສິດທິຜົນສູງ.

Editor: ຂ່າວສານປະເທດລາວ