ກອງປະຊຸມເປີດກ້ວາງຄົບຄະນະບໍລິຫານງານພັກຮາກຖານ ກອງບັນຊາການ ປກສ ເມືອງ ປາກຊັນ, ແຂວງ ບໍລິຄໍາໄຊ ຄັ້ງທີ I ສະໄໝທີ I ໄດ້ໄຂຂື້ນຢ່າງເປັນທາງການ ໃນລະຫວ່າງ ວັນທີ 20-21 ມີນາ 2018 ຜ່ານມານີ້ ໂດຍການເປັນປະທານຂອງ ສະຫາຍ ພັນໂທ ຄຳຜັນ ພົມມະຈັນ ເລຂາຄະນະພັກຮາກຖານ ຫົວໜ້າກອງບັນຊາການ ປກສ ເມືອງປາກຊັນ , ເປັນກຽດເຂົ້າຮ່ວມຂອງສະຫາຍ ພັນໂທ ບຸນຮຽງ ພຽນວົງ ຮອງເລຂາພັກເມືອງ ຫົວໜ້າການເມືອງກອງບັນຊາການທະຫານເມືອງປາກຊັນ, ມີຄະນະພັກ-ຄະນະກອງບັນຊາການ, ເລຂາ ໜ່ວຍພັກ, ແຂກຖືກເຊີນ, ບັນດາສະມາຊິກພັກສົມບູນ-ສໍາຮອງ ເຂົ້າຮ່ວມ.
ປະທານກ່າວເປີດກອງປະຊຸມຢ່າງເປັນທາງການແລ້ວ ສະຫາຍ ພັນໂທ ລາຕີ ພິລາວົງ ປະທານກວດກາພັກຮາກຖານ, ຮອງຫົວໜ້າກອງບັນຊາການ ປກສ ເມືອງ ໄດ້ຂື້ນຜ່ານບົດສະຫຼຸບການຊີ້ນໍາ-ນໍາພາຂອງຄະນະພັກຮາກຖານ, ຕີລາຄາຄືນການຈັດຕັ້ງປະຕິບັດວຽກງານໄລຍະ 1 ປີຜ່ານມາ, ສາມາດຍາດໄດ້ຜົນງານໃນຫຼາຍດ້ານເຊັ່ນ: ດ້ານການເມືອງ-ແນວຄິດ ໄດ້ຖືເອົາການສຶກສາອົບຮົມການເມືອງ-ແນວຄິດເປັນບັນຫາສໍາຄັນຕົ້ນຕໍໃນຖັນແຖວພະນັກງານ-ນັກຮົບ ຈື່ງເຮັດໃຫ້ຫຼາຍສະຫາຍມີຄວາມອຸ່ນອຽນທຸ່ນທ່ຽງ, ເຊື່ອໝັ້ນຕໍ່ແນວທາງນະໂຍບາຍຂອງພັກ, ເຄົາລົບລະບຽບກົດໝາຍຂອງລັັດ, ດ້ານວຽກງານກໍ່ສ້າງພັກ-ພະນັກງານ ສາມາດຂະຫຍາຍມະຫາຊົນກ້າວໜ້າເຂົ້າພັກໄດ້ 20 ສະຫາຍ, ຍິງ 7 ສະຫາຍ, ສົ່ງພະນັກງານ-ນັກຮົບໄປຍົກລະດັບວິຊາສະເພາະລະບົບບໍາລຸງ ແລະ ລະບົບກໍ່ສ້າງ ໄດ້ 9 ສະຫາຍ, ຍິງ 8 ສະຫາຍ, ໄປຍົກລະດັບທິດສະດີການເມືອງ-ການປົກຄອງທັງພາຍໃນ ແລະ ຕ່າງປະເທດ ຈໍານວນ 20 ສະຫາຍ, ຍິງ 4 ສະຫາຍ, ສົ່ງພະນັກງານໄປຝືກອົບຮົມວຽກງານສືບຂ່າວອາຍາ ໄດ້ 1 ຄັ້ງ, ມີ 5 ສະຫາຍ, ຝືກອົບຮົມວຽກງານກວດການ-ກວດກາ 1 ຄັ້ງ, ມີ 2 ສະຫາຍ. ດ້ານແບບແຜນນໍາພາ-ບັນຊາ ແລະ ວິທີເຮັດວຽກ ຄະນະພັກໄດ້ນໍາເອົາມະຕິ, ຄໍາສັ່ງ ແລະ ແນວທາງນະໂຍບາຍຂອງພັກ ມາຫັນເປັນແບບແຜນວິທີການເຮັດວຽກ, ປະຕິບັດຫຼັກການລວມສູນປະຊາທິປະໄຕ ເຮັດວຽກເປັນຫມູ່ຄະນະ, ມອບໃຫ້ບຸກຄົນຮັບຜິດຊອບ.ດ້ານວຽກງານຮັກສາຄວາມສະຫງົບທາງການເມືອງ ແລະ ຄວາມເປັນລະບຽບຮຽບຮ້ອຍທາງສັງຄົມ ກວດກາປະຫວັດພະນັກງານລັດຖະກອນ ບັນດາຫ້ອງການເຂົ້າພັກ ໄດ້ 22 ຊຸດ, ກວດກາປະຫວັດເຂົ້າກໍາລັງໃໝ່ໄດ້ 7 ຊຸດ, ອອກບັດພັກເຊົາໄດ້ 124 ບັັດ, ລົງປ້ອງກັນການນໍາ, ແຂກທັງພາຍໃນ ແລະ ຕ່າງປະເທດໄດ້ 6 ຄັ້ງ, ມີຄະດີເກີດຂື້ນທັງໝົດ 140 ລາຍ, ຜູ້ຖືກຫາ 157 ຄົນ, ຍິງ 19 ຄົນ. ໃນນັ້ນມີຄະດີອາຍາເກີດຂື້ນ 78 ລາຍ,ມ້າງໄດ້ 55 ລາຍ, ຄະດີຢາເສບຕິດ 43 ລາຍ, ຄະດີເສດຖະກິດ 19 ລາຍ, ມີຄະດີອຸປະຕິເຫດເກີດຂື້ນ 35 ເລື່ອງ, ແກ້ໄດ້ 33 ເລື່ອງ, ພາຫະນະເປ່ເພ່ 65 ຄັນ, ຄົນໄດ້ຮັບບາດເຈັບ 69 ຄົນ, ເສຍຊີວິດ 2 ຄົນ, ປະເມີນມູນຄ່າເສຍຫາຍທັງໝົດ 580.000.000 ກີບ, ລົງປັບປຸງກໍາລັງ ປກສ ບ້ານ ໄດ້ 2 ບ້ານ, ສ້າງບ້ານປ້ອມໝັ້ນສູ້ຮົບຕິດລຽນໄດ້ 2 ບ້ານ. ພ້ອມນັ້ນ ຍັງໄດ້ສຸ່ມໃສ່ແກ້ໄຂ 4 ເຖື່ອນ, ຍືດໄດ້ຂອງກາງຫຼາຍປະເພດເຊັ່ນ: ຢາບ້າ ຈໍານວນ 3.983 ເມັດ, ປືນແກ໊ບ 37 ກະບອກ, ໝໍ້ຊ໊ອດ 25 ໜ່ວຍ, ຈັກສະຕີ່ນ 1 ເຄື່ອງ, ລະເບີດ 3 ໜ່ວຍ.
Editor: ປກສ ແຂວງບໍລິຄຳໄຊ
