ສະເລີມສະຫລອງວັນສ້າງຕັ້ງແຂວງບໍ່ແກ້ວ ຄົບຮອບ 35 ປີ ໄດ້ຈັດຂຶ້ນທີ່ສະໜາມກິລາບ້ານປ່າອ້ອຍ ເມືອງຫວ້ຍຊາຍ, ແຂວງບໍ່ແກ້ວ ໃນວັນທີ 26 ມີນາ 2018. ໂດຍເປັນກຽດເຂົ້າຮ່ວມຂອງທ່ານ ພັນຄຳ ວິພາວັນ, ກໍາມະການກົມການເມືອງ ສູນກາງພັກ ຮອງປະທານປະເທດ, ທ່ານ ຄຳພັນ ເຜີຍຍະວົງ ກໍາມະການສູນກາງພັກ ເລຂາພັກແຂວງ ເຈົ້າແຂວງໆບໍ່ແກ້ວ, ມີການນຳພັກລັດ, ແຂກຮັບເຊີນ ພ້ອມດ້ວຍພະນັກງານ ທະຫານ-ຕຳຫລວດ ແລະ ປະຊາຊົນ ອ້ອມຂ້າງແຂວງ ເຂົ້າຮ່ວມຢ່າງຫຼວງຫລາຍ.
ໂອກາດ ຂຶ້ນກ່າວປາໃສຕໍ່ງານໂຮມຊຸມນຸມ ທ່ານ ຄໍາພັນ ເຜີຍຍະວົງ ໄດ້ຍົກໃຫ້ຮູ້ວ່າ: ແຂວງບໍ່ແກ້ວໄດ້ຮັບການສ້າງຕັ້ງຂຶ້ນໃນວັນທີ 26 ມີນາ 1983 ປະກອບມີ 3 ເມືອງ ທີ່ແບ່ງອອກຈາກແຂວງຫລວງນ້ຳທາ ຄື: ເມືອງຫວ້ຍຊາຍ, ເມືອງຕົ້ນເຜີ້ງ ແລະ ເມືອງເມິງ. ມີ 22 ຕາແສງ, 265 ບ້ານ, ມີ 13.843 ຄອບຄົວ ແລະ ມີພົນລະເມືອງ ທັງໝົດ 54,441 ຄົນ. ມາຮອດ ວັນທີ 2 ກໍລະກົດ 1992 ສູນກາງພັກໄດ້ຕົກລົງ ໂອນເມືອງປາກທາ ແລະ ເມືອງຜາອຸດົມ ແຂວງອຸດົມໄຊ ໃຫ້ຂຶ້ນກັບແຂວງບໍ່ແກ້ວ. ປະຈຸບັນແຂວງບໍ່ແກ້ວ ປະກອບມີ 5 ເມືອງ 1 ເຂດເສດຖະກິດພິເສດສາມລ່ຽມຄຳ, ມີ 255 ບ້ານ ຈັດເປັນ 45 ກຸ່ມບ້ານ, ປະກອບມີ 13 ເຜົ່າ ມີພົນລະເມືອງ ທັງໝົດ 183.126 ຄົນ. ນັບແຕ່ມື້ສ້າງຕັ້ງແຂວງບໍ່ແກ້ວມາຮອດປະຈຸບັນ ຄະນະນຳ ໄດ້ອອກແຮງເຄື່ອນໄຫວຊີ້ນຳ-ນຳພາໃນທຸກຂົງເຂດວຽກງານ ເຮັດໃຫ້ແຂວງບໍ່ແກ້ວເຂັ້ມແຂງ ມີຄວາມສະຫງົບສຸກ, ຊີວິດການເປັນຢູ່ຂອງປະຊາຊົນ ກໍ່ໄດ້ຮັບການພັດທະນາໄປທາງທີ່ດີ, ການພັດທະນາເສດຖະກິດສັງຄົມ ມີການຂະຫຍາຍຢ່າງຕໍ່ເນື່ອງ ສະ ແດງແດງອອກໃນປີ 2017 ຍອດຜະລິດຕະພັນພາຍໃນ ຫຼື GDP ບັນລຸໄດ້ 2.770,33 ຕື້ກີບ ຂະຫຍາຍຕົວຢູ່ໃນລະດັບ 7,7% ສະເລຍລາຍຮັບຕໍ່ຫົວຄົນ 1.776 ໂດລາຕໍ່ຫົວຄົນ.
ໂອກາດນີ້, ທ່ານ ພັນຄຳ ວິພາວັນ ກໍາມະການກົມການເມືອງສູນກາງພັກ ຮອງປະທານປະເທດ ໄດ້ຂຶ້ນມີຄວາມເຫັນຕໍ່ພິທີ ທ່ານ ໄດ້ຍົກໃຫ້ເຫັນວ່າ: ຕະຫລອດ 35 ປີແຫ່ງການປົກປັກຮັກສາ ແລະ ພັດທະນາແຂວງບໍ່ແກ້ວ ຜ່ານມາ ດ້ວຍຄວາມບຸກບືນສູ້ຊົນຂອງປະຊາຊົນລາວບັນດາເຜົ່າຊາວແຂວງບໍ່ແກ້ວ ພາຍໃຕ້ການນຳພາຂອງອົງຄະນະພັກ ແຂວງໄດ້ເຮັດໃຫ້ແຂວງບໍ່ແກ້ວ ສາມາດຍາດຜົນງານອັນໃຫຍ່ຫລວງທີ່ພາກພູມໃຈ ແຕ່ທຽບໃສ່ຄວາມຮຽກຮ້ອງຕ້ອງການໃນໄລຍະໃໝ່ແຂວງບໍ່ແກ້ວ ຕ້ອງອອກແຮງບຸກບືນສູ້ຊົນໃຫ້ສູງຂຶ້ນ, ຕ້ອງເພີ່ມທະວີຄວາມສາມັກຄີເປັນປຶກແຜ່ນພາຍໃນ, ເສີມຂະຫຍາຍນ້ຳໃຈຮັກຊາດ, ຮັກລະບອບໃໝ່, ເຊີດຊູຈິດໃຈເອກະລາດ, ເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ, ພ້ອມກັນຂຸດຄົ້ນທ່າແຮງຢູ່ພາຍໃນຢ່າງແຂງແຮງ ໃນການຊຸກຍູ້ການຜະລິດເປັນສິນຄ້າ, ຫັນປ່ຽນຈາກເສດ ຖະກິດທຳມະຊາດໄປສູ່ເສດຖະກິດຕະຫລາດ, ປັບປຸງແບບແຜນການຊີ້ນຳນຳພາ ກົນໄກວິທີການຈັດ ຕັ້ງປະຕິບັດໜ້າທີ່ວຽກງານໃຫ້ເຂົ້າສູ່ລະບຽບ, ສ້າງຖ່ວງທ່າ ແລະ ພື້ນຖານອັນໜັກແໜ້ນ ເພື່ອນຳເອົາແຂວງບໍ່ແກ້ວຫຼຸດພົ້ນ ອອກຈາກສະຖານະພາບຄວາມດ້ອຍພັດທະນາໃນປີ 2020.
Editor: ວິທະຍຸກະຈາຍສຽງແຫ່ງຊາດ
