ໃນວັນທີ 23 ມີນາ 2018 ຜ່ານມານີ້ ຢູ່ທີ່ຫ້ອງປະຊຸມ ຫ້ອງວ່າການປົກຄອງເມືອງວຽງທອງ ແຂວງບໍລິຄຳໄຊ ທ່ານ ວົງສີ ທອງສີອິນທິປັນຍາ, ກໍາມະການພັກແຂວງ, ເລຂາພັກເມືອງ, ເຈົ້າເມືອງ ວຽງທອງ, ເປັນປະທານກອງປະຊຸມສະຫຼຸບວຽກງານກໍ່ສ້າງຮາກຖານການເມືອງ ພັດທະນາຊົນນະບົດ ແລະ ວຽກງານ 3 ສ້າງ ປະຈໍາປີ 2017 ແລະ ທິດທາງແຜນການປີ 2018 ເປັນກຽດເຂົ້າຮ່ວມຂອງ ທ່ານ ພັນເອກ ຈວງຈັນ ລາດຊະວົງ ຄະນະປະພັກແຂວງ, ຫົວໜ້າກອງບັນຊາການທະຫານແຂວງ, ມີບັນດາຫົວໜ້າພະແນກພາຍໃນແຂວງ, ຮອງຫົວໜ້າຫ້ອງວ່າການແຂວງ, ຮອງຫົວໜ້າກະສິກໍາ-ປ່າໄມ້ແຂວງ, ພະນັກງານກໍ່ສ້າງຮາກຖານ ແລະ ເລຂາພັກເຂດທົ່ວເມືອງເຂົ້າຮ່ວມຢ່າງພ້ອມພຽງ
ກອງປະຊຸມໄດ້ຜ່ານເອກະສານຕ່າງໆຂອງສູນກາງ ແລະ ແຂວງ. ຈາກນັ້ນ ກໍ່ໄດ້ຜ່ານບົດສະຫຼຸບການເຄື່ອນໄຫວໃນໄລຍະ 1 ປີ 2017 ແລະ ຜ່ານທິດທາງແຜນການປີ 2018. ບົດສະຫຼຸບໄດ້ຍົກໃຫ້ເຫັນດ້ານດີ, ດ້ານອ່ອນ ແລະ ຂໍ້ຄົງຄ້າງ ທີ່ກອງປະຊຸມຈະໄດ້ຊອກຫາວິທີທາງແກ້ໄຂໃນຕໍ່ໜ້າກໍ່ເພື່ອເຮັດໃຫ້ ເມືອງ ວຽງທອງ ມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບເປັນລະບຽບຮຽບຮ້ອຍ, ເສດຖະກິດຂະຫຍາຍຕົວຕໍ່ເນື່ອງ ແລະ ໝັ້ນທ່ຽງ, ຊິວິດການເປັນຢູ່ຂອງປະຊາຊົນດີຂຶ້ນ. ໄດ້ເອົາໃຈໃສ່ສູ້ຊົນແກ້ໄຂຄວາມທຸກຍາກ. ທົ່ວເມືອງມີຄອບຄົວພົ້ນທຸກທັງໝົດ 4.161 ຄອບຄົວ ເທົ່າກັບ 94,03 % ເພີ່ມຂຶ້ນ 89 ຄອບຄົວ, ບ້ານພົ້ນທຸກ 29 ບ້ານ ເທົ່າກັບ 70,73% , ບ້ານພັດທະນາ 10 ບ້ານ, ເທົ່າກັບ 24, 39 %, ໄດ້ເອົາໃຈໃສ່ຄຸ້ມຄອງກອງທຶນພັດທະນາບ້ານ, ກອງທຶນຂອງແຂວງ, ກອງທຶນຊ່ວຍເຫຼືອຂອງຕ່າງປະເທດໃຫ້ມີການໃຊ້ຈ່າຍ ແລະ ຖືກຕ້ອງ, ມີຄວາມຍືນຍົງ, ໄດ້ເອົາໃຈໃສ່ປັບປຸງການຈັດຕັ້ງບ້ານໄປຕາມ 5 ໜ່ວຍງານ ສໍາເລັດ 29 ບ້ານ ແລະ ວຽກງານດ້ານຕ່າງໆກໍ່ໄດ້ເອົາໃຈໃສ່ປະຕິບັດຢ່າງມີຜົນສໍາເລັດ.
ກອງປະຊຸມໄດ້ຜ່ານທິດທາງແຜນການສືບຕໍ່ປີ 2018 ພ້ອມທັງປະກອບຄໍາຄິດຄໍາເຫັນໃສ່ບົດສະຫຼຸບ ແລະ ທິດທາງເພື່ອຄວາມເປັນເອກະພາບ. ຈາກນັ້ນ ໄດ້ຜ່ານຂໍ້ຕົກລົງແຕ່ງຕັ້ງພະນັກງານກໍ່ສ້າງຮາກຖານ, ຕອນທ້າຍກອງປະຊຸມໄດ້ຮັບຟັງການໂອ້ລົມ, ຊິ້ນໍາ ຈາກຂັ້ນເທິງຕື່ມອີກ.
Editor: ເມືອງວຽງທອງ
