ໃນທ້າຍອາທິດທີ່ຜ່ານມາ ຢູ່ທີ່ຫ້ອງປະຊຸມຂອງ ກອງບັນຊາການ ປກສ ເມືອງ ຄໍາເກີດ, ແຂວງ ບໍລິຄໍາໄຊ ໄດ້ຈັດກອງປະຊຸມໃຫຍ່ຄະນະຮາກຖານຊາວໜຸ່ມ ປກສ ເມືອງ ຄໍາເກີດ ຄັ້ງທີ V ຂື້ນ, ໂດຍການເປັນປະທານຂອງ ສະຫາຍ ຮ້ອຍເອກ ໄພມະນີ ກຸລະວົງສາ ເລຂາຮາກຖານຊາວໜຸ່ມ ປກສ ເມືອງ ຄໍາເກີດ, ໃຫ້ກຽດເຂົ້າຮ່ວມຂອງ ສະຫາຍ ເຂັມພອນ ປັນຍານຸວົງ ກໍາມະການພັກເມືອງ ເລຂາຄະນະບໍລິຫານງານຊາວໜຸ່ມ ເມືອງ ຄໍາເກີດ, ມີ ສະຫາຍ ພັນໂທ ກົງຈັນ ໄຊປັນຍາ ກໍາມະການພັກເມືອງ, ຫົວໜ້າກອງບັນຊາການ ປກສ ເມືອງ ຄໍາເກີດ, ມີຄະນະບໍລິຫານງານຊາວໜຸ່ມແຂວງ, ແຂກທີ່ຖືກເຊີນ ຕະຫຼອດຮອດສະມາຊິກຊາວໜຸ່ມພາຍໃນກົມກອງເຂົ້າຮ່ວມ.
ສະຫາຍ ຮ້ອຍເອກ ໄພມະນີ ກຸລະວົງສາ ເລຂາຮາກຖານຊາວໜຸ່ມ ປກສ ເມືອງ ຄໍາເກີດ ຂື້ນກ່າວເປີດກອງປະຊຸມ ພ້ອມທັງຜ່ານບົດລາຍງານການເມືອງທັງສອງພາກຕໍ່ທີ່ປະຊຸມ, ເຊີ່ງໄດ້ຍົກໃຫ້ເຫັນຜົນສຳເລັດໃນການຊີ້ນຳ-ນຳພາວຽກງານຂະບວນການຕ່າງໆ ໃນການປະຕິບັດວຽກງານ 4 ບຸກຂອງສູນກາງຊາວໜຸ່ມປະຊາຊົນປະຕິວັດລາວວາງອອກ ກໍ່ຄືແຜນການເຄື່ອນໄຫວຈັດຕັ້ງປະຕິບັດວຽກງານຂອງຄະນະຮາກຖານຊາວໜຸ່ມ ປກສ ເມືອງ ຄໍາເກີດ ໃນໄລຍະ 5 ປີຜ່ານມາ ເຊິ່ງໄດ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ກັບສະຊິກຊາວ ໜຸ່ມເປັນຫຼັກ ເພື່ອສ້າງຖັນແຖວສະມາຊິກຊາວໜຸ່ມໃຫ້ມີແນວຄິດຫຼັກໝັ້ນ, ມີນ້ຳໃຈຮັກຊາດ, ຮັກບ້ານເກີດເມືອງນອນ, ມີຄຸນສົມບັດສິນທຳປະຕິວັດ, ມີສະຕິເຄົາລົບລະບຽບກົດໝາຍ, ປະຕິບັດທຸກມະຕິ, ຄໍາສັງທີ່ຂັ້ນເທິງວາງອອກຢ່າງເຂັ້ມງວດ, ໃນດ້ານວຽກງານວິຊາສະເພາະ ໄດ້ປະຕິບັດວຽກງານຕາມການຊີ້ນໍາ-ນໍາພາຈາກຄະນະພັກຂັ້ນເທິງຢ່າງໃກ້ຊິດຕາມພາລະບົດບາດ ເພື່ອເຮັດສໍາເລັດທຸກໜ້າທີ່ໆການຈັດຕັ້ງມອບໝາຍໃຫ້ໄດ້ເປັນຢ່າງດີ, ວຽກງານປັບປຸງການຈັດຕັ້ງ ແລະ ນະໂຍບາຍຕ່າງໆ ໄດ້ປະຕິບັດຕາມຫຼັກການລວມສູນປະຊາທິປະໄຕ, ນໍາພາເປັນຫມູ່ຄະນະ, ແບ່ງໜ້າທີ່ໃຫ້ບຸກຄົນຮັບຜິດຊອບ, ສ້າງຖັນແຖວສະມາຊິກຊາວໜຸ່ມມີຄວາມປອດໃສ, ໜັກແໜ້ນ ແລະ ເຂັ້ມແຂງ ໂດຍໄດ້ສົ່ງພະນັກງານສະມາຊິກຊາວໜຸ່ມໄປຍົກລະດັບວິຊາສະເພາະຕາມເງື່ອນໄຂ, ນອກນັ້ນ ຍັງມີນະໂຍບາຍຕໍ່ພະນັກງານຜູ້ເຈັບປ່ວຍນອນໂຮງຫມໍ, ເກີດລູກ ແລະ ອື່ນໆ, ປະກອບສ່ວນໃນງານຕັ້ງຄ້າຍເຍົາວະຊົນທີ່ເມືອງຄໍາເກີດເປັນເຈົ້າພາບ ເປັນຈໍານວນເງິນ 1.500.000 ກີບ, ຊ່ວຍເຫຼືອໄພນ້ຳຖ້ວມທີ່ ສສ ຫວຽດນາມ 1.500.000 ກີບ, ວຽກງານຂະບວນການ ແລະ ຊ່ວຍເຫຼືອສັງຄົມ: ໄດ້ເອົາໃຈໃສ່ນໍາພາສ້າງຂະບວນການແຂ່ງຂັນກິລາກາຍຍະກໍາ ເພື່ອຕ້ອນຮັບວັນສໍາຄັນຕ່າງໆຂອງພັກ-ຂອງຊາດ ໃນຂອບເຂດເທດສະບານເມືອງ, ແຂວງ ຄື:ໄດ້ນໍາພາສະມາຊິກຊາວໜຸ່ມເຂົ້າຮ່ວມແຂ່ງຂັນກິລາເປຕັງ 3 ຄັ້ງ, ບານສົ່ງ 7 ຄັ້ງ, ກະຕໍ້ຫວາຍ 1 ຄັ້ງ, ກິລາບານເຕະ 3 ຄັ້ງ, ແຂງຂັນເຮືອຊ່ວງປະຈໍາປີ 3 ຄັ້ງ, ເຂົ້າຮ່ວມປ້ອງກັນການນໍາ ແລະ ວັນສໍາຄັນຂອງຊາດໄດ້ 98 ຄັ້ງ,ອອກແຮງງານລວມບໍລິເວນປົດຄ້າຍ ແລະ ສະຖານທີ່ສໍາຄັນຂອງເມືອງໄດ້ 359 ຄັ້ງ, ອອກແຮງງານສ້າງຫ້ອງນໍ້າໃຫ້ປະຊາຊົນ ບ້ານ ນາກະດົກ ໄດ້ 1 ຄັ້ງ 15 ແຮງງານ, ອອກແຮງງານຊ່ວຍເຫຼືອປະຊາຊົນຕ້ານໄພນໍ້າຖ້ວມເຂດ ບ້ານ ໜອງອໍ້-ນາແປໄດ້ 1 ຄັ້ງ 25 ແຮງງານ, ສ້າງເດີນກິລາເປຕັງ, ເດີນກະຕໍ້ຫວາຍ ລວມ 3 ເດີນ ມີ 125 ແຮງງານ.
ຈາກນັ້ນ ຄະນະຮາກຖານຊາວໜຸ່ມຊຸດເກົ່າກໍ່ໄດ້ອໍາລາໜ້າທີ່. ກອງປະຊຸມໄດ້ມີການປ່ອນບັດເລືອກຕັ້ງເອົາຄະນະຮາກຖານຊາວໜຸ່ມຊຸດໃໝ່ ໂດຍມີຜູ້ລົງສະໝັກຈໍານວນ 7 ສະຫາຍ, ເລືອກເອົາ 5 ສະຫາຍ, ຜ່ານການປ່ອນບັດເລືອກຕັ້ງ ແລະ ກອງປະຊຸມຄັ້ງປະຖົມມະລຶກໄດ້ຕົກລົງເລືອກເອົາ ສະຫາຍ ຮ້ອຍເອກ ສົມບັດ ຈັນທະລັງສີ ເປັນເລຂາຮາກຖານຊາວໜຸ່ມ ປກສ ເມືອງ ຄໍາເກີດ ຊຸດໃຫມ່, ຮ້ອຍເອກ ອານົງ ກິແກ້ວ ເປັນຮອງ, ຮ້ອຍໂທ ນາງ ແກ້ວ ຖຽນສົມພູ ເປັນປະທານກວດກາ ແລະ 2 ສະຫາຍ ເປັນກໍາມະການ.
Editor: ປກສ ແຂວງບໍລິຄຳໄຊ
